Accessibility links

Мектеп жасындағы балалар арасында тұмау өршіп тұр

  • Айнагүл САҒДИ

Балалар арасында тұмау ауруының өрши түсуіне байланысты Шымкент қаласындағы мектеп оқушыларының қысқы демалысы ұзартылды.

Шымкент қалалық эпидемиологиялық қадағалау басқармасының мәліметіне қарағанда, желтоқсан айында тұмаумен ауырған бір-екі адам ғана тіркелсе, қаңтар айының басынан бері бұл дертті жұқтырғандар саны күрт көбейіп кеткен.

Басқарма басшысы Гауһар Әлиеваның айтуынша, тіпті күніне 500-ден астам адам көмек сұрап, жедел жәрдемге телефон шалады екен.

- Сондықтан облыстық денсаулықсақтау департаменті осы аурудың алдын алу үшін қосымша 5 жедел жәрдем автокөлігін бөліп отыр. Тіркелгендердің 80 пайызы оқушылар болғандықтан қысқы демалыс уақытын ұзартуға тура келді. 2004 жылдың желтоқсан айынан бастап тыныс органдарының вирусты инфекциясы 2 жағдайда тіркелген. Ал қазір 20 есеге артып отыр. Бұлай болмаған жағдайда біз дабыл қақпас едік, - дейді басқарма басшысы.

Астана қалалық мемлекеттік санитарлық эпидемиологиялық қадағалау департаментінің директоры Жандарбек Мұхтарұлының айтуынша, Астанада аса қатты қауіп жоқ.

- Дегенмен де, басқа аймақтарда ауру көрсеткіші өсетін болса, бізге карантиндік шараларды енгізуге тура келеді. Оқушылар дүйсенбіден бастап қана сабаққа кірісті, әзірге ондай ауруға шалдыққандар көп емес, - дейді Жандарбек Мұхтарұлы.

Қазақстанның жекелеген аймақтарында «тұмаумен ауырғандар әзірге 2003 жылмен салыстырғанда 2 есе аз» делініп отыр ресми деректерде. Жамбыл облыстық санитарлық эпидемиология басқармасының маманы Нұргүл Серғазықызы «тұмау қаңтар айының орта тұсында өрши түседі» деген болжам жасап отырғандарын жеткізді.

- Сондықтан қазір аурудың алдын-алу шаралары жүргізіліп жатыр, - дейді ол.

Астана қалалық мемлекеттік санитарлық эпидемиологиялық қадағалау департаментінің директоры Жандарбек Мұхтарұлы тұмаудан сақтану үшін егіліп тұрудың қажеттігін айтады.

- Егу жұмыстарын әлі де жалғастаруға болады. Өйткені, тұмау наурыз айына дейін созылуы ықтимал. Ал басқа жедел респираторлық аурулардан сақтану үшін біріншіден, суық тигізіп алмау қажет. Екіншіден, С витаминіне бай шөптердің қайнатылған тұнбасын жиі ішіп тұрған жөн. Шикі сарымсақ та адам денсаулығына пайдалы. Және үйде ауру адам болатын болса, оның басқалардан бөлек жерде емделгені дұрыс, - дейді Жандарбек Мұхтарұлы.

Денсаулық сақтау мекемелері тұмау дертінің шарықтау кезеңі қаңтардың екінші жартысынан басталатынын ескертіп отыр. Биыл тұмау және жедел вирусты респираторлық дертіне шалдыққандар саны өткен жылмен салыстырғанда 30-50 пайызға дейін көбеюі мүмкін деген болжам бар.
XS
SM
MD
LG