Accessibility links

Қазақстан кәсіпкерлері форумы: "Шағын бизнес өркен жая алмай отыр"

  • Болатбек ТӨЛЕПБЕРГЕН

Қазақстан кәсіпкерлерінің форумы 2004 жылғы істерінің қорытындысын шығарып, елдегі шағын және орта бизнестің өркен жаюы үшін кәсіпкерлікке қатысты барлық заңдарға өзгерістер мен толықтырулар енгізу қажеттігін мәлімдеді.

Қазақстан кәсіпкерлері форумының басшылығы елдегі кәсіпкерлікке қатысты қаржылық-экономикалық мәселелер мен құқықтық және әкімшілік істерді мемлекет тарапынан қолдаудың құрылымдық жүйесін жетілдіруді ұсынып отыр.

"Республикадағы салық пен кедендік тариф саясатын, кедендік бақылауда кәсіпкерлердің жұмысын жеңілдету жайы басты мәселелердің бірі болып қалып отыр" дейді олар. Және өздерінің қол жеткізген табыстары ретінде қазіргі уақыттағы үкіметте әлеуметтік салықты төмендету, сондай-ақ, кедендік құжат рәсімдеуді жетілдіру мен кәсіпкерлердің тендерге қатысуларын мейлінше ашық жүргізу ісі қаралып жатқандығын айтады.

Қазақстан кәсіпкерлері форумының төрағасы кәсіпкер Райымбек Баталовтың айтуынша, бүгінде Қазақстанда шағын және орта бизнес өкілдерінің құқын қорғайтын өкілетті орынның жоқтығы істің алға басуына кедергі келтіріп отыр. "Дегенменде бұған дейін өте маңызды болып келген биліктегілермен тіл табысу мәселесін шештік" дейді ол.

Алматы қалалық кәсіпкерлер қауымдастығының төрағасы Виктор Ямбаев көптеген мемлекеттік мекемелердің кәсіпкерлерге әкімшілік жолымен қысым жасап, жұмыстарына кедергі келтіріп отырғанын айтады. Оның пайымдауынша, кәсіпкерлердің көп уақыты құжат толтыруға кетеді. Жүздеген бақылаушы органдардың коррупциялық-криминалдық әрекетін енді шағын бизнес көтермейді. "Одан қоғамға қауіп төнеді" дейді ол.

Алайда кәсіпкер Құрманғали Ашанұлы "бұл ретте аса қауіптенудің жөні жоқ, тек жемқорлықты ауыздықтау қажет" дейді.

Қазақстан базарлары мен кәсіпкерлері қауымдастығының атқарушы директоры Жібек Әжібаева кәсіпкерлердің құқықтық жағдайын "сын көтермейді" деп бағалайды. "Соған орай алдағы уақытта осы сала жұмысын реттеп отыратын арнайы заң жобасын дайындау қажеттігі туындап отыр. Соның ішінде кеден мәселесі бірінші кезекте қаралуға тиіс" дейді ол.

Қазақстан кеденшілері одағының төрағасы Нұрлан Бұршақбаев "қабылданғанына бір жылдан енді асқан Қазақстанның “Кеден кодексі” кәсіпкерлер ісін жеңілдетпесе, қиындатып отырған жоқ" дейді.

Сонымен қатар Қазақстан кәсіпкерлері форумының басшылығы ел аумағында шағын және орта кәсіпкерлікті қолдаудың аймақтық бағдарламасын құру туралы ұсыныстарын үкіметке жолдағандықтарын жеткізді.
XS
SM
MD
LG