Иранның сүннит топтары тұтқындағы екі полицейді өлтірді

Бүгін әл-Арабия теледидары өздеріне ирандық сүннит тобынан тағы екі полиция қызметкерін жазалағандары туралы хабар түскенін айтып отыр. Өздерін "Құдайдың сарбазымыз" деп айтатын Жундалла тобы маусымның 12-де Сарван қаласындағы 16 полицейді ұстап әкеткен. Бұл топ оларды көрші Пәкістан шекарасына апарып, Иран билігінен өздерінің 200 тұтқынын босатуды талап еткен. Жундалла тобы талаптары орындалмаса, апта сайын екі полицейді өлтіріп отыратындықтарын мәлімдеген. Содан бері 16 полицейдің 10-ы өлтірілген.