Accessibility links

Жаңаөзен абақтысы бұрынғы басшысының шағымы қаралды


Жаңаөзен қалалық уақытша қамау изоляторының бұрынғы бастығы Жеңісбек Теміров. Ақтау, 25 сәуір 2012 жыл.

Жаңаөзен қалалық уақытша қамау изоляторының бұрынғы бастығы Жеңісбек Теміров. Ақтау, 25 сәуір 2012 жыл.

Маңғыстау облыстық соты Жаңаөзендегі уақытша қамау изоляторының (УҚИ) бұрынғы бастығы, 5 жылға сотталған Жеңісбек Теміровтің апелляциялық шағымын қарады. Судья Бейсенбаев Мақсат Теміровке кесілген жаза мерзімін өзгертпеді, тек дүние-мүлкін тәркілеу шешімінің күшін жойды. Бұл туралы Азаттық тілшісіне жәбірленуші жақтың қорғаушысы Шамин Базаров хабарлады.

Жеңісбек Теміров «2011 жылы 16 желтоқсандағы оқиға кезінде Базарбай Кенжебаевты УҚИ-ге заңсыз қаматты, оны дер кезінде ауруханаға жібермей, Кенжебаев содан көз жұмды» деген айып бойынша биыл 25 қаңтарда жауапқа тартылған.

17 маусымда Ақтау қалалық соты Жеңісбек Теміровті 5 жыл бас бостандығынан айыруға және дүние-мүлкін тәркілеуге үкім кескен. Сотқа жәбірленуші ретінде қатысқан Базарбай Кенжебаевтың қызы Әсем Кенжебаеваға Теміровтің 1 миллион теңге өндіріп беруін үкім еткен.
XS
SM
MD
LG