Әзербайжан шетелге әскери базасын пайдалануға бермейді

Әзербайжанның сыртқы істер министрлігі ел территориясының ешбір мемлекетке көрші елдерге шабуыл жасау үшін пайдалануға берілмейтінін мәлімдеді.

Журналистермен сұхбатында министрлік өкілі Эльман Абдуллаев үкіметтің бұл ұстанымы "берік және өзгермейтінін", "Әзербайжан көрші елдермен қашанда достық қарым-қатынаста болатынын" айтты.

Бұған дейін ақпарат құралдарында "Израиль Иранға соққы бере қалса, Әзербайжан Тель-Авивке өз әскери базаларын пайдалануға береді" деген ақпар тараған.

Әзербайжан мен Иранның қарым-қатынасы кейбір себептерге байланысты соңғы айларда шиеленісіп кеткен.