Accessibility links

"Қазғарыш": "Протон" ұшыруға келісуіміз мүмкін


Байқоңыр ғарыш айлағындағы ресейлік "Протон-М" зымыран тасығышы. 2 шілде 2013 жыл.

Байқоңыр ғарыш айлағындағы ресейлік "Протон-М" зымыран тасығышы. 2 шілде 2013 жыл.

Қазақстан Ресейге Байқоңыр ғарыш айлағынан "Протон-М" зымыран тасығышын қайта ұшыра бастауға рұқсат етуі мүмкін деп мәлімдеді "Қазғарыш" ұлттық агенттігінің төрағасы орынбасары Еркін Шаймағамбетов.

Ақпарат агенттіктерінің хабарлауынша, ол "Протон-М" зымыран тасығышының биыл шілдеде апатқа ұшырауынан кейінгі зардаптарды жоюды бақылайтын комиссия отырысында "30 қыркүйектен бастап "Протонды" қайта ұшыра бастауға келісім жасалуы мүмкін екенін" айтқан.

2 шілдеде ресейлік үш "Глонасс-М" аппаратын тиеген "Протон-М" зымыран тасығышы Байқоңырдан ұша бере апатқа ұшырап, жарылып кеткен еді. Апат кезінде ғарыш айлағы маңы зымыран тасығыштың бірнеше жүз тонна улы отыны – гептилмен ластанған.

Ресейлік «Известия» басылымы 24 қыркүйекте "Ресей Қазақстандағы ресми орындарының жауабын күтпей, қыркүйектің 30-ы күні Байқоңырдан «Протон-М» зымыран тасығышын ұшыра беретіні" туралы жазған еді. "Известияның" хабарлауынша, "Роскосмос" Ресей сыртқы істер министрлігі арқылы Қазақстан үкіметіне ескерту жіберген.
XS
SM
MD
LG