14 қарашадағы ресми дерек бойынша, Филиппинде «Хайян» тайфуны салдарынан құрбан болғандар саны 2357 адам деп хабарланды. Мұның алдында ел президенті Бениньо Акино құрбандар саны бұған дейін хабарланғандай 10 мың емес, одан аз болуы мүмкін екенін мәлімдеген. Дауылдан зардап шеккен аймақтарда азық-түлік пен дәрі-дәрмек жеткізуге зәру тұрғындар арасында үкіметтің іс-қимылына наразылық күшейіп отыр. Билік өкілдері инфрақұрылымы қатты бүлінген көптеген аудандарға жету әлі қиын екенін айтады. Көптеген жерлерде талап-тонау оқиғалары болған.