Accessibility links

Қазақстан Ресейдің «ескі көлік» салығына қарсылық білдірді


Көрнекі сурет.

Көрнекі сурет.

Қазақстан Ресейдің елде сатылған шетелдік ескі көліктерді утилизациялау үшін шетелдік көлік өндірушілерге салық салу туралы жаңа заңына қатысты келіссөздер жүргізіп жатыр. Бұл туралы бүгін үкімет сағатында экономикалық интеграциялар министрі Жанар Айтжанова мәлімдеді.

Жергілікті агенттіктердің хабарлауынша, Айтжанова Астана Мәскеумен утилизация үшін Қазақстаннан импортталатын көліктерден салық алмау туралы келіссөздер жүргізіп жатқанын айтқан. Айтжанованың сөзінше, «егер келіссөз нәтиже бермесе Қазақстан да ресейлік автомобильдерге қатысты жауап шараларын қабылдауға мәжбүр болады».

Бірақ Айтжанова Қазақстанда ондай салық енгізу күрделі мәселе екенін айтады.

«Ресей Дүниежүзілік сауда ұйымына (ДСҰ) кірген соң импортталатын көліктерге утилизация салығын енгізді. Бұл ДСҰ талаптарына қайшы келеді. Қазір Еуропа Одағы және Жапонияның бастамасымен бұл мәселе ДСҰ-да қаралып жатыр. Егер біз Ресейдегідей утилизация салығын енгізетін болсақ, онда ДСҰ-ға кіру туралы жүргізіп жатқан келіссөздеріміз тоқтап қалады» деген ол.

Еуропа Одағы бұған дейін ДСҰ аясында Ресейдің утилизация үшін салық енгізуіне қарсылық білдіріп, шағым түсірген еді.

Елдің ДСҰ-ға кіру шарттарының бірі - импортталатын заттарға салынатын салықты азайту болатын. «Мәскеу импорт салығын азайтқаннан келген шығынды осы заң арқылы өндіріп алмақ» дейді Еуропа Одағы.

Ресей ДСҰ-ға 2012 жылы тамызда, 18 жыл келіссөзден кейін кірген. Қазақстан қазір ДСҰ-ға кіру жөнінде ұйыммен келіссөз жүргізіп жатыр.
XS
SM
MD
LG