Accessibility links

Карачи әуежайындағы атыс аяқталды


Пәкістанның оңтүстік-батысындағы Карачи қаласының әуежайына жасалған шабуыл аяқталды. Дүйсенбіге қараған түні ауыр қару-жарағы бар бір топ содыр Карачидегі елдің ең ірі әуежайына шабуыл жасаған. Ұрыс 6 сағатқа созылды.

9 маусым күні Пәкістан армиясы өкілі генерал Асим Баджва Карачи әуежайына шабуылдан жиыны 13 адам қаза тапқанын хабарлады. Оның сөзінше, әуежайға 10 содыр шабуыл жасаған. Олардың барлығы қаза тапқан.

Оқиға орнында бірнеше жарылыс дыбысы естілген. Шабуылдаушылар әуежайдың VIP жолаушылар мен жүктерін тасымалдауға арналған ғимаратқа гранаттар лақтырып, автоматтан атқылаған.

Бұған дейін әскерилер қаза тапқандардың көпшілігі әуежайдың қауіпсіздік қызметінің өкілдері деген еді. Бірақ кейін мерт болғандардың кім екенін анықтау барысында шабуыл жасағандар әуежайдың қауіпсіздік қызметінің арнайы киімдерін киіп алғандығы белгілі болған.

Генерал Асим Баджва содырлар әуежайдағы екі реактивті ұшақты жойды деген ақпаратты жоққа шығарды. Бұған дейін журналистер әуежай терминалында екі ұшақ өртеніп жатыр деп хабарлаған еді. "Тілшілер терминалда өрт шыққанына қарап ұшақтар жойылды деп ойлап қалған болуы керек" деді генерал.

"Шабуылдан ешқандай ұшақ және бір де бір жолаушы зардап шеккен жоқ" деп хабарланды. Бұл шабуылға жауапкершілікті әзірге ешкім мойнына алған жоқ.
XS
SM
MD
LG