Accessibility links

Табылған заттың «жоғалған цезий» екені тексеріледі


Радиоактивті" цезий-137" салынған темір контейнер. Сурет Маңғыстау облыстық ішкі істер басқармасынан алынған. 28 тамыз 2014 жыл.

Радиоактивті" цезий-137" салынған темір контейнер. Сурет Маңғыстау облыстық ішкі істер басқармасынан алынған. 28 тамыз 2014 жыл.

Қызылорда облысы ішкі істер департаментінің кезекшісі, подполковник Нұрлан Қалиевтің Азаттық тілшісіне хабарлауынша, жоғалды деп жарияланған цезий радиоактивті заты «6 қыркүйек күні түнде Қызылорда облысы Шиелі ауданы, Бәйгеқұм ауылының маңынан табылған».

- Біздің қызметкерлер бір КамАЗ көлігін ұстап, ішінен жоғалған затты алды. Зат ашылмаған, бүтін, - дейді ол.

Ал Қызылорда облысы ішкі істер департаментінің ақпарат бөлімі басшысы Гүлжаһан Қайыргелденова:

- 6 қыркүйек, түнгі сағат екілер шамасында Шиелі ауданында Батыс Қытай - Батыс Еуропа жолымен кетіп бара жатқан КамАЗ-дан радиоактивті цезий контейнері табылды. Ол КамАЗ туралы Қызылорда тұрғыны хабарлады. Жорамалымыз бойынша, табылған контейнер - жоғалған цезий радиоактивті заты. Шиелі ауданының ішкі істер бөлімінде қазір оны мамандар тексеріп жатыр. Анық сол ма, жоқ па - дүйсенбі хабарлаймыз. Қазір КамАЗ жүргізушісін де тексеру жұмыстары жүріп жатыр, - деді.

Радиоактивті заттың Маңғыстау облысында жоғалғаны туралы ақпарат тамыздың 28-і күні тарады. «Цезий-137» радиоактивті затының жоғалуына байланысты қылмыстық іс қозғалып, оны ҰҚК жүргізе бастаған еді. Оны іздеу аясының Атырау облысы аумағына дейін кеңейтілгені де хабарланған. Цезийлі контейнердің иесі - «Казпромгеофизика» компаниясы контейнерді тапқан адамға 1 миллион 500 мың теңге сыйақы тағайындаған.

Маңғыстау атом электр комбинатындағы БН-350 департаметінің директоры Юрий Широбоков Азаттыққа «егер ол контейнерді біреу-міреу ашса, санаулы секундтарда-ақ залалы 70 жылға созылатын радиоактивті улануға ұшырайтынын» айтқан болатын. Радиоактивті заттың қаупі және оны іздеу шаралары туралы Азаттықтың «Жоғалған» радиоактивті затты жаппай іздеу» мақаласынан оқуыңызға болады.

XS
SM
MD
LG