Accessibility links

Украинада "Шахтерск" батальоны таратылды


Украинаның ішкі істер министрі Арсен Аваков.

Украинаның ішкі істер министрі Арсен Аваков.

Украина ішкі істер министрі Арсен Аваков кей сарбаздары тонаушылықпен айналысқан "Шахтерск" арнайы батальонын таратуды бұйырды. Бұл жайында ол "1+1" телеарнасына берген сұхбатында айтқан. Ол "Батальондағы 700 еріктінің барлығы емес, ішіндегі 50 шақты сарбазы тонаушылықпен айналысқан. Сол 50 адам батальонның абыройына нұқсан келтірді" деген.

"Ақпараттық қарсылық" тобының жетекшісі Дмитрий Тымчук Facebook-тегі парақшасында кеше Украинаның шығысында сепаратистер Украина армиясы позицияларын 50 мәрте атқылағанын хабарлады. Сепаратистер әскер шебін минометтен, дүркіндете оқ ататын реактивті кешеннен, танктер мен артиллерия қаруларынан атқылаған.

16 қазан күні Украина президенті Петр Порошенко "Донецк мен Луганск облыстарының жекелеген аудандарында жергілікті өзін-өзі басқарудың ерекше тәртібі туралы" заңға қол қойған еді. Заң жергілікті өзін-өзі басқаруды ұйымдастыру тәртіптерін, Донецк және Луганск облыстарының жекелеген аудандарының жергілікті билік органдары қызметін анықтайды.

Бұл аудандарға ерекше тәртіп үш жыл мерзімге енгізіледі.

Донецк мен Луганск облыстарының жекелеген аудандарында аудандық, қалалық және ауылдық кеңес депутаттарын сайлау 2014 жылдың 7 желтоқсанына белгіленген.

XS
SM
MD
LG