Accessibility links

АҚШ-та ғарыш кемесі апатынан ұшқыш қаза тапты


SpaceShip жеке меншік ғарыш кемесі алғашқы сынақ кезінде. Калифорния штаты, АҚШ. 10 қазан 2010 жыл.
SpaceShip жеке меншік ғарыш кемесі алғашқы сынақ кезінде. Калифорния штаты, АҚШ. 10 қазан 2010 жыл.

АҚШ-та жеке меншік ғарыш кемесі әуеге көтеріле бергенде апатқа ұшырап, салдарынан ұшқыштардың бірі мерт болып, екіншісі жараланған.

Калифорния штатының оңтүстігіндегі Мохаве даласында болған төтенше оқиғаның куәсі болған фотограф Кен Браун журналистерге ғарыш аппараты әуеде ұшақтан ажыраған кезде жарылыс болғанын айтқан.

Көп мәрте пайдалануға арналған SpaceShipTwo жеке меншік ғарышын кемесін алғашқы сапарға шығар алдында сынақтан өткізіп жатқан еді. Ол 20 километр биіктікке ұшақ көмегімен көтерілген соң одан ажырап өздігінен ұшуы тиіс болған. Экипажы екі ұшқыштан тұратын SpaceShipTwo кемесі бортына алты жолаушыға дейін алып ұша алатындай етіп жасалған. Ол алғаш рет сынақтан 2010 жылы өткізілген еді.

Бұл осы аптада АҚШ-та апатқа ұшыраған екінші ғарыш аппараты болып отыр. Бұның алдында, 28 қазан күні Вирджиния штатының жағалауындағы Уоллопс аралындағы ғарыш айлағынан ұшырылған Antares жеке меншік зымыраны әуеге көтеріле бере жарылып кеткен еді.

XS
SM
MD
LG