Мәскеу қалалық соты украиналық ұшқыш Надежда Савченконың Басман аудандық сотының өзін қамауға алу мерзіміні ұзарту шешіміне берген шағымын қарастырмайтын болды. Сот өкілі кейбір процессуалдық заң бұзушылықтарға байланысты шағым желтоқсанның 15-і күнгі қараудан алынып тасталғанын айтады. Заң бұзушылықтар түзелгеннен кейін шағымды қарайтын күн белгіленбек.
Қазанның 27-сінде Мәскеудің Басман аудандық соты Савченконы қамау мерзімін 2015 жылғы ақпанның 13-іне дейін созған.
Ресей билігі Надежда Савченконы Украинаның Луганск қаласының түбінде екі журналисті өлтірді деп айыптайды. Савченко айыбын жоққа шығарып, өзін сепаратистер ұстап алып Ресейге жеткізгенін айтады.
Қазанның 26-сында Украинада өткен парламент сайлауында Надежда Савченко Юлия Тимошенко басқаратын "Батъкившина" партиясының тізімі бойынша парламентке өткен.