Алматыда бүгін тұңғыш президент саябағында жыл сайынғы дәстүрлі «Алматы – гүл қала» фестивалі өтіп жатыр. Саябақтың кіре берісіндегі бағандардан бастап орталық және қапталдағы аллеялар, субұрқақтарына дейін гүлдермен безендірілген.
Саябаққа келушілер ондағы ландшафты бау-бақша түрлерімен (олардың бірі – жапон үлгісінде), гүл жәрмеңкесіне қойылған өнімдермен танысты. Көгал үстінде балаларға арналған аймақтар бар. Саябаққа кіреберіске жақын қойылған сахнада ойын-сауық бағдарламасы өтіп жатыр. Бүгін саябақта ашық аспан астындағы кинотеатр да жұмыс істейді. Фестиваль аясында Алматы қаласындағы аудандар арасында байқау өтіп жатыр.
Бүгінгі шарада жұрт назарына ұсынылған «гүл-кілемді» жасауға мыңдаған гүл мен 30-дан аса табиғи материал түрлері пайдаланылған.
Осымен бесінші жыл қатарынан өтіп жатқан «Алматы – гүл қала» фестивалін қала әкімдігі ұйымдастырған.
