Accessibility links

Борышкерлер: "Халық банкі" талабымызды орындамады


"Халық банкі" бөлімшесінде тұрған борышкерлер. Алматы, 26 қаңтар 2016 жыл.

"Халық банкі" бөлімшесінде тұрған борышкерлер. Алматы, 26 қаңтар 2016 жыл.

Алматыда бүгін банктен ипотекалық несиемен үй алып, қарызын төлей алмай жүрміз деген ондаған борышкер Алматы қаласы әкімінің орынбасары Ерлан Әукеновпен және "Халық банкі" басшылығымен кездесті.

Шамамен 70-ке тарта борышкер Абай даңғылы мен Әуезов көшесі қиылысындағы бөлімшесіне жиналды.

Азаттық тілшісінің банктен хабарлауынша, ипотекалық қарыз келісімшартын қайта қарауды талап еткен борышкерлерді банк өкілдері мен Алматы қаласы әкімінің орынбасары Ерлан Әукенов жеке-жеке ішке кіргізіп, қабылдады.

Борышкерлердің айтуынша, олар кеше түстен кейін, Ерлан Әукеновпен кездесіп, бүгін банк алдында наразылық шарасын өткізу туралы өтініш білдірген. Әукенов борышкерлерге мәселелерін әр банк басшыларымен жеке сөйлесіп, талқылауды ұсынып, олардан наразылыққа шықпауды сұраған.

Борышкерлер банктен келісім-шарттарында қарастырылғандай "әлеуметтік жағдайына қарап, қарызын шегеру, қайта есептеуді" талап еткен. Кездесуге кірген борышкерлер банк өздерінің талаптарын орындамады дейді. Бірақ "Халық банкі" төрағасының орынбасары Айбар Боданов "қарызын қайта есептеу туралы талап әр борышкердің әлекуметтік жағдайына қарап" орындалатынын ғана айтты.

Борышкерлер әуелде банк талаптарын орындамаса наразылық танытатынын ескерткен. Кездесуден соң талабымыз орындалмады деген борышкерлер келесі аптада наразылық танытатынын айтып, тарқасты.

  • 16x9 Image

    Нұртай ЛАХАНҰЛЫ

    Нұртай Лаханұлы. 1973 жылы дүниеге келген. 1998 жылы әл-Фараби атындағы қазақ ұлттық университетінің филология факультеті бойынша тәмамдаған.  «Қазақстан-Заман» газеті мен «Қазақ радиосында» қызмет еткен. 2010 жылдан бері Азаттық радиосында  жұмыс істейді.

XS
SM
MD
LG