Accessibility links

"Жас Алаштың" сот үкіміне шағымы қарала бастады


"Жас Алаш" газетінің сот үкіміне берген апелляциялық шағымын қарау сотына келген халық. Алматы. 4 наурыз 2016 жыл.

"Жас Алаш" газетінің сот үкіміне берген апелляциялық шағымын қарау сотына келген халық. Алматы. 4 наурыз 2016 жыл.

Алматы қалалық сотында "Жас Алаш" газетінің сот үкіміне қатысты апелляциялық шағымын қарау жалғасты. Судья әуелде сот залына журналистерді кіргізбей, арнайы белгіленген, монитор қойылған залға жіберген. Кейін журналистер сот залына кіргізілді.

Сотты үш судьядан тұратын судьялар алқасы жүргізіп жатыр. Бүгінгі апелляциялық шағымды қарау сотына «Жас Алашты» сотқа берген «Жас-Ай» медициналық орталығының жетекшісі Жасан Зекейұлы келді. Сот басталған 25 ақпанда Жасан Зекейұлы сотқа келмей, отырыс кейінге қалдырылған еді. "Жас Алаштың" бас редакторы Рысбек Сәрсенбай бұған дейінгі сотта Жасан Зекейұлы мен жауапкерлердің бірі Қабен Мұқанұлын да қатыстыру туралы өтініш айтқан. Сәрсенбайдың айтуынша, бұл екеуінсіз дау шешілмейді. Бүгінгі сотқа Қабен Мұқанұлы келмеді.

Жасан Зекейұлы «Жас Алаш» газеті мамыр айында өзі туралы жариялаған «Академик» отбасымен соттасып жүр» деген мақала «абыройы мен ар-намысын қаралады» деп сотқа жүгінген. Ол әуелі газетті алты айға тоқтатуды және өзіне 400 миллион теңге моральдық шығын төлеуді сұраған.

Қарашаның 13-і күні Алматының Алмалы аудандық соты "Жас Алаш" басылымы мен журналистеріне қатысты үкім шығарған. Сот «Жас Алаш» газетінің бас редакторы Рысбек Сәрсенбайға, тілшісі Меруерт Тұрлыбековаға, газет оқырманы Қаден Мұқанұлына, Жасан Зекейұлының бұрынғы әйелі Гүлия Әлиханқызына және Гүлия Әлиханқызының әкесі, 76 жастағы Әлиханға, барлығы 40 миллион теңге айыппұл салған. Бұған қоса «Жас Алаш» газетінде Жасан Зекейұлы туралы жазылған мақаланы терістеу міндеттелген. Кейін сот шешіміне наразы жауапкерлер апелляциялық шағым түсірген.

  • 16x9 Image

    Асылхан МАМАШҰЛЫ

    1973 жылы 22 сәуірде дүниеге келген. 1994 жылы Қорқыт ата атындағы Қызылорда пединститутын бітірген. 1997-2000 жылдары әл-Фараби атындағы Қазақ ұлттық университетінің аспирантурасында оқыған. "Қазақ энциклопедиясы" баспасында (2001-2007), республикалық "Ана тілі" газетінде (2007-2009) , "ABDI-press" орталығында (2009-2010) жұмыс істеген. 2011 жылдан Азаттық радиосының тілшісі.

    Тарихи, саяси мәселелер тақырыбында жазады, белгілі тұлғалардың саяси портреттерін жасайды. Автормен оның Facebook парақшасында да пікірлесуіңізге болады.

XS
SM
MD
LG