Accessibility links

Португалияда журналистерге сес көрсеткен министр қызметтен кетті


Жоау Соареш.

Жоау Соареш.

Португалия мәдениет министрі Жоау Соареш әлеуметтік желідегі жазбасы қоғам тарапынан сынға ілінген соң отставкаға кетуге мәжбүр болды.

Соареш 7 сәуірде Facebook парақшасында португал тілінде жариялаған жазбасында Португалияда шығатын Publico газетінде министрді сынаған мақалаларда айтылғанды өзін қорлау деп қабылдап, оны жазған екі журналист - Аугусто Сеабре мен Васко Пулидо Валентені «шапалақпен емдеуге» уәде еткен.

Журналистердің Соарешті біліксіз, дөрекі, тамыр-таныстыққа бейім деп сынауы министрдің шамына тиген. Кейін Соареш журналистер атына айтқан сөзі үшін кешірім сұрағанымен, оның жазбасы қоғамда наразылық тудырып, министрді отставкаға жіберуге шақырған талаптар айтылған.

Португалия премьер-министрі Антониу Кошта Жоау Соарештің сөзіне байланысты жұртшылықтан кешірім сұрап, «елде министрлік басқаратын тұлғалар үкімет өкілі екенін естен шығармауы тиіс» екенін айтқан.

66 жастағы Жоау Соареш 1995-2002 жылдар аралығында Лиссабон қаласы мэрі қызметін атқарған. Оның әкесі Мариу Соареш Португалия социалистік партиясының негізін қалап, 1986-1996 жылдар аралығында ел президенті болған.

XS
SM
MD
LG