Accessibility links

Медведев Ереван мен Бакуге қару сатуды қолдады


Ресей премьер-министрі Дмитрий Медведев.

Ресей премьер-министрі Дмитрий Медведев.

Ресей премьер-министрі Дмитрий Медведев Әзербайжан мен Арменияға қару-жарақ сатуды қолдайтынын айтты. Ресейлік «Россия 1» телеарнасындағы «Вести в субботу» бағдарламасына берген сұхбатында ол егер Мәскеу жанжал болып жатқан аймаққа қару-жарақ беруден бас тартса, ондай іспен өзге мемлекеттер айналысқан болар еді деген. Медведев қару-жарақ тек пайдалану үшін ғана сатып алынбайды, ол сонымен бірге «тежеуші фактор» қызметін атқарады деп санайды.

2010 жылдан 2014 жылға дейінгі аралықта Ресей мен Әзербайжан тікұшақтар, зениттік-зымыран жүйелері, танктер мен артиллериялық қару-жарақ сатуға қатысты жалпы құны төрт миллиард долларға жуық соманы құрайтын келісім-шарттар жасасқан.

Армения 2013 жылдың бір өзінде Ресейден 16 миллион доллардың қару-жарағын сатып алған. Олардың арасында ауыр қару түрлері де бар деп хабарлайды ВВС. Бірақ 2014 жылы Ереван Мәскеуден қару-жарақ алмаған.

5 сәуірде Әзербайжан мен Армения Таулы Қарабақтағы жанжал аймағында атысты доғару туралы бітім жасасқан. Бірақ көп ұзамай екі тарап оқ атпау жайлы келісімді бұзды деп бір-бірін айыптай бастаған.

Таулы Қарабақтағы жанжал аймағындағы ахуал сәуірдің 2-іне қараған түні ушығып кеткен еді. Одан кейін соңғы 22 жылдағы ең үлкен қарулы қақтығыстар барысында екі жақтан ондаған адам қаза тауып, жараланған, кейбіреуі хабарсыз кеткен.

AzattyqTV

XS
SM
MD
LG