Астана ішкі саясат басқармасы мәлімдеуінше, жарты жыл уақытта қала халқының саны 128800-ге артқан.
Әкімдік берген түсініктемеде, мүлік легализациясы мен көлеңкелі экономикадан шығу бағдарламалары нәтижесінде сауда-саттық орталықтары, өндіріс орындары жетекшілері есепке алынбаған жұмысшыларын көші-қон органдарына тіркей бастаған. Жыл басынан 61 300 адам есепке алынған.
«Сонымен бірге, 2015-2016 жылғы электоралды компания кезіндегі үйлер мен пәтер аралап, тұрғындарды есепке алу шарасы оң әсер етті», - делінген Астана әкімдігі ақпаратында.
Жыл басынан бері Астанада 871 200 адам тіркеуге тұрған. Аталған шаралар нәтижесінде 1 шілдеде астаналықтар саны 999780 адамға жеткен.
4 шілдеде әкімдік Астананың миллионыншы тұрғыны дүниеге келгенін хабарлаған. Жергілікті билік Астана күні қарсаңында туған сәбидің отбасына пәтер сыйға тартқан.
