Accessibility links

Қазақстан ауыр атлеттері олимпиададан шеттетілмейді


Қазақстандық Александр Зайчиков.

Қазақстандық Александр Зайчиков.

Бүгін, 21 шілдеде Халықаралық ауыр атлетика федерациясы (IWF) олимпиадаға қатысатын спортшылар тізімін жариялады. Бұл тізім Халықаралық олимпиада комитетінің келісімімен бекітілген. Ресми тізімде Қазақстан құрамасының атлеттері де бар.

Қазақстан әйелдер құрамасына олимпиадаға Азия ойындарының чемпионы Маргарита Елисеева (48 кг), бірнеше халықаралық жарыстардың жеңімпазы Карина Горичева (63 кг) және екі дүркін әлем чемпионатының күміс жүлдегері Жазира Жаппарқұл (69 кг) қатысады.

Ал ерлер арасында Қытайдан келген легионерлер Арли Чонтей (56 кг) мен Фархад Харки (62 кг), 2012 жылға дейін жарыстарға Әзербайжан атынан қатысқан, кейін Қазақстан азаматтығын алған Нижат Рахимов (77 кг), Денис Уланов (84 кг), Хьюстондағы әлем чемпионатында алтын алған Александр Зайчиков (105 кг) барады.

Осыған дейін Халықаралық ауыр атлетика федерациясы (IWF) қазақстандық ауыр атлет Илья Ильиннің Пекин мен Лондон олимпиадалары кезінде алынған сынамаларынан допинг табылғанын мәлімдеген. Лондонда алтын алған қазақ спортшылары Зүлфия Чиншанло, Мая Манеза мен Светлана Подобедованың да сынамалары оң нәтиже берген. Төртеуі де Рио олимпиадасына қатыспайды.

Басында Қазақстан ауыр атлетика құрамасы Рио олимпиадасына он жолдама алған. Бірақ допинг дауынан кейін Халықаралық ауыр атлетика федерациясы (IWF) екі жолдаманы алып, басқа елдерге берген.

Бұған қоса, IWF допинг дауына ілінген Қазақстан құрамасын бір жыл жарыстардан шеттеу туралы шешім шығарған. Бірақ бұл шектеу қай уақыттан басталатыны белгісіз. Белгілісі, бір жылдық шектеу олимпиада ойындарына әсер етпейді.

  • 16x9 Image

    Руслан МЕДЕЛБЕК

    1990 жылы 4 қаңтарда дүниеге келген.

    Қазақ ұлттық университеті журналистика факультетін "Халықаралық журналистика" мамандығы бойынша тәмамдаған.

    Халықаралық спорт журналистері қауымдастығы мен Халықаралық олимпиада комитетінің жас репортері.

    "Спорт", "Қазақ спорты" газеттерінде, "Алматы" телеарнасында журналист-репортер болған. 2012 жылдан бері "Азаттық" радиосының тілшісі. Сочи - 2014 қысқы және Рио - 2016 жазғы олимпиада ойындарынан тікелей хабар таратты.

    Автормен оның Facebook парақшасында да пікірлесуге болады.

XS
SM
MD
LG