Accessibility links

Рыпакова Пекин олимпиадасының қола медалін алады


Ольга Рыпакова Рио олимпиадасында.

Ольга Рыпакова Рио олимпиадасында.

Қазақстандық жеңіл атлет Ольга Рыпаковаға 2008 жылғы Пекин олимпиадасының қола медалі тапсырылады. Бұл туралы бүгін Халықаралық жеңіл атлетика федерациясы (IAAF) ресми түрде хабарлады.

Рыпакова Пекин олимпиадасында үш қарғып секіру секторында төртінші орын алған. Ал қола жүлдені грекиялық Хрисопия Деветци иеленген. IAAF Деветцидің допинг сынамасын қайта тексергенде допинг табылғанын мәлімдеп, ресми хаттамада Рыпакованы үшінші орынға шығарды.

Рыпакова үш қарғып секіруден 2012 жылы Лондон олимпиадасында алтын, биыл Рио олимпиадасында қола медаль алған.

Қазақстан 2008 жылы өткен Пекин олимпиадасында 2 алтын, 4 күміс, 7 қола алған. Бірақ Пекин ойындарына қатысқан спортшылардың допинг сынамасын қайта тексергенде үш қазақстандық ауыр атлет Илья Ильиннің (алтын), Ирина Некрасованың (күміс), Мария Грабовецкаяның (қола) сынамасынан допинг табылғаны хабарланған.

Халықаралық олимпиада комитеті бұл спортшылардың медалін қайтарып алу немесе қалдыру туралы шешімді әлі қабылдаған жоқ.

  • 16x9 Image

    Руслан МЕДЕЛБЕК

    1990 жылы 4 қаңтарда дүниеге келген.

    Қазақ ұлттық университеті журналистика факультетін "Халықаралық журналистика" мамандығы бойынша тәмамдаған.

    Халықаралық спорт журналистері қауымдастығы мен Халықаралық олимпиада комитетінің жас репортері.

    "Спорт", "Қазақ спорты" газеттерінде, "Алматы" телеарнасында журналист-репортер болған. 2012 жылдан бері "Азаттық" радиосының тілшісі. Сочи - 2014 қысқы және Рио - 2016 жазғы олимпиада ойындарынан тікелей хабар таратты.

    Автормен оның Facebook парақшасында да пікірлесуге болады.

XS
SM
MD
LG