Accessibility links

Руслан Күлекбаевты сот залына қайта әкелді


Алматыдағы қарулы шабуылға күдікті Руслан Күлекбаев сот залында отыр. Алматы, 25 қазан 2016 жыл.

Алматыдағы қарулы шабуылға күдікті Руслан Күлекбаев сот залында отыр. Алматы, 25 қазан 2016 жыл.

Алматыда қарулы шабуылға күдікті Руслан Күлекбаевты өзінің үстінен өтіп жатқан сот залына қайта алып келді. Бүгін таңертең оны сот басталғанда судьяның талабына бағынбағаны үшін сот залынан шығарып жіберген еді.

Азаттық тілшісінің хабарлауынша, Күлекбаевты сот залына оның адвокатының сұрауымен алып келді. Судья оған сот тәртібіне бағынуын ескертті. Азаттық тілшісі Күлекбаевтың өзі көңілді екені байқалатынын айтады.

24 қазандағы сот тыңдауында 26 жастағы Руслан Күлекбаев денсаулығына байланысты сауалдарға отырып жауап беруді сұрап, сот оны қанағаттандырған.

Бүгінгі сотта жәбірленушілердің кейбір туыстары мен куәгерлер сұралып жатыр. Кешегі сотта жәбірленушілер мен айыпталушылар, оның ішінде Күлекбаев та сөйлеген.

Іс бойынша Руслан Күлекбаевтан өзге бес адам сотқа тартылған. Роберт Лю, Жасұлан Сапарбеков, Дәурен Әсембекұлы, Ербол Құсайынов, Нұрсұлтан Әбдімомынға «заңсыз қару-жарақ сақтады» және «Күлекбаевпен бірге кәсіпкерге қарақшылық шабуыл жасады» деген айыптар тағылған.

"Күлекбаев ісі" бойынша тергеу ол шабуылдан соң бірден ұсталған 18 шілде күні басталған. Билік шабуылды теракт деп атаған. Бұл іс бойынша сот материалдары 61 томнан тұрады.

"Күлекбаев ісі" бойынша соттың алдын ала тыңдауы 17 қазанда өткен.

  • 16x9 Image

    Асылхан МАМАШҰЛЫ

    1973 жылы 22 сәуірде дүниеге келген. 1994 жылы Қорқыт ата атындағы Қызылорда пединститутын бітірген. 1997-2000 жылдары әл-Фараби атындағы Қазақ ұлттық университетінің аспирантурасында оқыған. "Қазақ энциклопедиясы" баспасында (2001-2007), республикалық "Ана тілі" газетінде (2007-2009) , "ABDI-press" орталығында (2009-2010) жұмыс істеген. 2011 жылдан Азаттық радиосының тілшісі.

    Тарихи, саяси мәселелер тақырыбында жазады, белгілі тұлғалардың саяси портреттерін жасайды. Автормен оның Facebook парақшасында да пікірлесуіңізге болады.

XS
SM
MD
LG