Accessibility links

Бас прокуратураға шағыммен келгендерді полиция ұстады


Бас прокуратураға келгенде ұсталған әйелдердің бірін полиция көлікке отырғызып жатыр. Астана. 18 желтоқсан, 2013 жыл.

Бас прокуратураға келгенде ұсталған әйелдердің бірін полиция көлікке отырғызып жатыр. Астана. 18 желтоқсан, 2013 жыл.

Астанада тұрғын үй дауымен Қазақстан бас прокуратурасына арыз беруге келген ондаған адамды полиция ұстап әкетті.

Желтоқсанның 18-і күні Астанада Қазақстан бас прокуратурасына арыздануға келген ондаған адамды полиция ұстады. "Махаббат" тұрғын үй кешені тұрғындары өздерін үйлерінен күштеп шығаруға наразылық танытып, бас прокуратураға арыз тапсыруға жиналған еді.

Тұрғындардың бірі Айжамал Балтабаеваның айтуынша, 2009 жылы 400-ден астам адам 49 пәтерді жалға алу туралы келісім-шартқа отырып, тұрғын үй кешені иесіне ақша төлеп келген. Алайда қожайын үйді басқа компанияға сатып жіберіп, жаңа қожайын олардан пәтерлерді босатуды талап еткен. Сот тұрғындардың келісім-шарттарын жарамсыз деп тауып, оларды пәтерлерінен шығару туралы шешім қабылдаған. Бірақ олар пәтерден шығаруға наразылық танытып, келісім-шарт жасасқан адамдардың үстінен арызданған.

Тұрғындар өздерімен келісім-шарт жасасқан тұлғалардың үстінен түсірген арызы бойынша қылмыстық іс қозғауды, я осы кезге дейін пәтерге төлеп келген ақшаларын қайтарып бергізуді сұрап бас прокуратураға шағым жазды. Тұрғындар арасынан үш адам арызды тапсыруға прокуратура кеңсесіне кірді.

"Махаббат" тұрғын үй кешені тұрғындары бұған дейін даулы іске қатысты сот шешіміне наразылық білдіріп, қыркүйек айында бас прокуратура алдында акция өткізген. Ол жолы прокуратура ғимарат алдындағы көшені жауып наразылық танытқан азаматтардың барлығын полиция ұстап әкеткен еді.

Бас прокуратура алдындағы наразылық туралы видео:

Оқырман пікірлері

XS
SM
MD
LG