Accessibility links

Байқауды «патриоттық» деуші де, «жағымпаздық» деуші де бар


Қазақстан президенті Нұрсұлтан Назарбаев өз құрметіне аталған «Тұңғыш президент күні» мерекесінде жұртпен амандасып тұр. Астана, 1 желтоқсан 2012 жыл.

Қазақстан президенті Нұрсұлтан Назарбаев өз құрметіне аталған «Тұңғыш президент күні» мерекесінде жұртпен амандасып тұр. Астана, 1 желтоқсан 2012 жыл.

1 желтоқсан – «Тұңғыш президент күніне» орай «Менің атым Нұрсұлтан» байқауын ұйымдастырушылар «елбасыға құрмет» жайлы да айтады. Ал сарапшылар мұны «жеке басқа табыну» деп бағалайды.

Интернет желісінің қазақстандық бөлігін дамытумен айналысатын«Қазконтент» акционерлік қоғамы қарашаның 10-ы мен 30-аралығында «Менің атым Нұрсұлтан» атты эссе конкурсын өткізетінін жариялады. Мекеме бұл шараның мақсаты желтоқсанның 1-інде аталып өтетін «Тұңғыш президент күні» мейрамының танымалдығын арттыру» екенін хабарлайды.

«ЕЛБАСЫҒА – ҚҰРМЕТ, ОТАНҒА – ПАТРИОТТЫҚ»

«Қазконтенттің» өкілі Алтынбек Құмырзақұлының Азаттыққа айтуынша, «жүлдегерлері бағалы сыйлықпен және мақтау қағазымен марапатталатын эсселер байқауына 5-30 жас аралығындағы Нұрсұлтан есімді жастар қатыса алады».

– Байқау талаптары аса қиын емес. Өз есімінің неге Нұрсұлтан деп аталғанын, кім қойғанын, қандай жетістіктерге жеткенін жіпке тізіп, бір-екі беттің көлемінде жазып берсе жеткілікті. Өйткені Нұрсұлтан деген есімді иеленіп, оны алып жүрудің өзі жастарға қиындық туғызады, – деді ол Азаттыққа.

Алтынбек Құмырзақұлы бұл байқау «кішкентай балалардың елбасыға деген құрметін, отанға деген патриоттығын арттыруды мақсат ететінін» айтты.

САУАЛНАМА: 1 желтоқсан қандай мейрам?

«ЖЕКЕ БАСҚА ТАБЫНУ МЕН ЖАҒЫМПАЗДЫҚ»

Бірақ бұл байқау жайлы Азаттыққа пікір білдірген сарапшылар ұйымдастырушылардың «патриоттық» жайлы пікірлерімен келіспейді. Мәселен, саясаттанушы Жасарал Қуанышәлин «мұндай байқаулар – патриоттыққа тәрбиелеу емес, жеке басқа табынуды насихаттаудың көрінісі» деп біледі.

Саясаттанушы Жасарал Қуанышәлин. Алматы, 19 тамыз 2013 жыл.

Саясаттанушы Жасарал Қуанышәлин. Алматы, 19 тамыз 2013 жыл.

– Қазақстанда балаларға Нұрсұлтан есімін беру – жеке басқа табынудың бір көрінісі. Біздің елдің жағдайында осындай атаулармен байқау ұйымдастыру –тек бір бағыттағы насихаттық жұмыс. Бірақ ұйымдастырушылар мұндай байқауларды өз тараптарынан шығармайды. Ол жоғары жақтан арнайы бір адамдардың нұсқауымен бұйрығымен жүзеге асып отыр, – деп жориды Жасарал Қуанышәлин.

Орталық Азия демократияны дамыту орталығының директоры Толғанай Үмбетәлиева да «бұл – жағымпаздықтың көрінісі» деген пікір айтады.

Саясаттанушы Толғанай Үмбетәлиева.

Саясаттанушы Толғанай Үмбетәлиева.

– Бұл жерде ешқандай патриоттық негіз жоқ. Оған қоса «1 желтоқсан –Тұңғыш президент күні» деп атаудың өзі – тұрпайы түрдегі саяси жағымпаздық. Бұл жерде жағымпаздықты тағы бір мәрте жаңғыртудан басқа ештеңе жоқ. Бұл жеке ұйымдастырушылардың көзқарасы болмауы да мүмкін, – дейді Толғанай Үмбетәлиева.

Қазақстан парламенті сенаты «1 желтоқсан – Қазақстан республикасының тұңғыш президенті күні» деген мемлекеттік мерекені бекіткен заңды 2011 жылы желтоқсанда қабылдап, бұл мереке 2012 жылдың 1 желтоқсанынан бері тұрақты түрде тойланып келеді.

Елді ширек ғасырдан бері үзіліссіз басқарып келе жатқан президент Нұрсұлтан Назарбаевтың құрметіне 23 мыңнан астам адамның есімі Нұрсұлтан деп қойылған. Азаттық биыл 6 шілдеде – президент Назарбаевтың 75 жасқа толуы қарсаңында «Менің атым – Нұрсұлтан» атты жоба бастап, Нұрсұлтан есімді мыңдаған қазақстандықтың бірнешеуімен тілдескен. Дүниеге келгеннен бергі өмірлері өздері атын иеленген адамның – Нұрсұлтан Назарбаевтың биліктегі дәуірінде өтіп келе жатқан ол жастар Азаттыққа жетістіктері мен армандарын, реніштерін айтқан. Ол Нұрсұлтандардың арасында актер де, спортшы да, асаба да, студент те, жолсыз-сусыз ауылдағы мектепке барып жүрген оқушы да болған.

КӨРІҢІЗ: Азаттықтың «Менің атым – Нұрсұлтан» жобасы

We are sorry, but this feature is currently not available

  • 16x9 Image

    Нұртай ЛАХАНҰЛЫ

    Нұртай Лаханұлы. 1973 жылы дүниеге келген. 1998 жылы әл-Фараби атындағы қазақ ұлттық университетінің филология факультеті бойынша тәмамдаған.  «Қазақстан-Заман» газеті мен «Қазақ радиосында» қызмет еткен. 2010 жылдан бері Азаттық радиосында  жұмыс істейді.

Оқырман пікірлері

XS
SM
MD
LG