Accessibility links

Бас мүфти елдегі діни ахуал жайлы «құқық қорғау органдарынан сұрау керек» дейді


Қазақстан мұсылмандары діни басқармасының (ҚМДБ) бас мүфтиі Әбсаттар Дербісәлі. Алматы, 25 шілде 2011 жыл.

Қазақстан мұсылмандары діни басқармасының (ҚМДБ) бас мүфтиі Әбсаттар Дербісәлі. Алматы, 25 шілде 2011 жыл.

«Ал Ақтөбе облысы имамының ауысуына Шұбаршидегі оқиғаның қатысы жоқ» деп мәлімдеді ҚМДБ бас мүфтиі Әбсаттар Дербісәлі


Дүйсенбі, шілденің 25-і күні Алматыда Қазақстан мұсылмандары діни басқармасының (ҚМДБ) бас мүфтиі Әбсаттар Дербісәлі баспасөз конференциясын өткізіп, ел мұсылмандарын алда келе жатқан рамазан айының басталуымен құттықтады.

Бас мүфти ораза айы қарсаңында өзі жасаған үндеудің «кәсіпкерлер тарапынан қолдау тауып жатқанын» хабарлап, биыл рамазан айында берілетін пітір-садақаның ауқымы базардағы 1 килограмм бидайдың бағасына тең екенін айтты.

«БІЗ ҚҰҚЫҚ ҚОРҒАУ ОРГАНЫ ЕМЕСПІЗ»

– Таяуда Ақтөбе облысында болған оқиғаға мүфтилік қандай да бір баға бере ме: бұл саяси терроршылдық па, әлде халықтың әлеуметтік жағдайына байланысты туындаған әрекет пе? – деген Азаттық радиосы тілшісінің сауалына бас мүфти:

– Біз құқық қорғау органы емеспіз. Біз де өздеріңіз сияқты ақпарат құралдарынан ғана біліп отырмыз. Сондықтан құқық қорғау органдарына, мемлекеттің ресми ақпараттарына біз де сенеміз, – деп жауап берді.

«2001 жылғы АҚШ-тағы террорлық әрекеттен соң, қит еткенді исламға жаба беретіндер көбейді. Ислам ізгіліктің, адамгершіліктің діні, сондықтан
Егер біреу мұнай ұрлап, қиянат жасап жатса, ондайды құрықтауға мемлекетіміздің шамасы жетеді

кез-келген нәрсені дінмен байланыстыра берудің жөні жоқ. Егер біреу мұнай ұрлап, қиянат жасап жатса, ондайды құрықтауға мемлекетіміздің шамасы жетеді» дегенді айтты Әбсаттар Дербісәлі.

ҚМДБ бас мүфтиінің айтуынша, облыс имамдары әр бес жыл сайын, ал «жұмысы нашар болса» төрт жылдан кейін қайта сайланады не ауыстырылады. Бүгінге дейін он төрт облыстың ішінде он облыстың имамы ауысыпты. Ал Ақтөбе облысының имамы Шұбарши, Кеңкияқ ауылдарында болған қақтығыстардан бұрын ауысқан.

«ИМАМДАРДЫҢ БАЛА-ШАҒАСЫ ЖОҚ ПА?»

Әбсаттар Дербісәлі Қазақстанда діни сауаты жоғары имамдардың әлі де жетіспей жатқандығын айтты. «Әртүрлі теріс ағымдарға» жол бермес үшін алдағы уақытта республика мешіттерінде қазақстандық діни жоғары оқу орындарын бітірген имамдар жіберілетінін хабарлады. Мүфтидің сөзіне
Имамдардың айлық алмауы – бүгінгі ең үлкен мәселенің бірі

қарағанда, қазір бір университет, бір институт, тоғыз медресе осындай имамдар дайындаумен шұғылданады.

– Имамдардың айлық алмауы – бүгінгі ең үлкен мәселенің бірі. Біз зайырлы мемлекетпіз, дін мемлекеттен бөлек. Бірақ имамдардың бала-шағасы жоқ па? Оның баласы мектепке бармай ма? Имам садақа алса, бәріңіз шулап кетесіздер, – деді Әбсаттар Дербісәлі.

БАС МҮФТИДІҢ «УАҺҺАБ», «СОПЫ» ТУРАЛЫ ПІКІРІ

«Қазір жұма намазға келген кей жастарды «уаһһаб» деп, кейбір имамдар мешіттен шығарып жіберетін көрінеді – оның себебі не?» деген сауалға ҚМДБ бас мүфтиі:

– Біздің еліміздің өз дәстүрі, ұлттық құндылықтары бар, соны насихаттауымыз керек, – деді.

«Ал үстінен қылмыстық іс қозғалып жатқан, «сопылар» аталатын азаматтар жайында не айтасыз?» деген сұраққа:

– Ақпарат құралдарында жазылып жатқандардан өзгені білмеймін. Оны құқық қорғау органдарынан сұрау керек қой, – деп жауап берді Әбсаттар Дербісәлі.
  • 16x9 Image

    Асылхан МАМАШҰЛЫ

    1973 жылы 22 сәуірде дүниеге келген. 1994 жылы Қорқыт ата атындағы Қызылорда пединститутын бітірген. 1997-2000 жылдары әл-Фараби атындағы Қазақ ұлттық университетінің аспирантурасында оқыған. "Қазақ энциклопедиясы" баспасында (2001-2007), республикалық "Ана тілі" газетінде (2007-2009) , "ABDI-press" орталығында (2009-2010) жұмыс істеген. 2011 жылдан Азаттық радиосының тілшісі.

    Тарихи, саяси мәселелер тақырыбында жазады, белгілі тұлғалардың саяси портреттерін жасайды. Автормен оның Facebook парақшасында да пікірлесуіңізге болады.

Оқырман пікірлері

XS
SM
MD
LG