Accessibility links

Президент Назарбаев Германияда ауруханада жатыр деп хабарлады неміс басылымы


Қазақстан президенті Нұрсұлтан Назарбаев.

Қазақстан президенті Нұрсұлтан Назарбаев.

Германияның «Бильд» газеті сол елдің солтүстігіндегі ауруханалардың бірінде Қазақстан президенті Нұрсұлтан Назарбаевтың жатқанын хабарлады. Алайда оның қандай ем алып жатқаны әзірге белгісіз.

«Бильд» газетінің мәліметінше, Қазақстанның 71 жастағы президенті Нұрсұлтан Назарбаев жұртқа жария қылмай Гамбург-Эппендорф медициналық орталығында дәрігерлік тексеруден өткен, ол жатқан ауруханаға күшті күзет қойылған.

Басылымның жазуынша, Қазақстан президенті неміс ауруханасына Германия сыртқы істер министрлігінің делдалдығымен жатқан. Бірақ министрліктегілер «Франс-Пресс» агенттігінің тілшісіне берген жауабында Нұрсұлтан Назарбаевтың Гамбургте болған-болмағандығынан хабарсыз екендерін айтты, ал аурухана өкілі түсінік беруден бас тартқан.

Азаттық радиосы осы ақпараттың анық-қанығын білу үшін сейсенбі күні Астанадағы Қазақстан президенті әкімшілігіне хабарласты. Алайда телефон тұтқасын көтерген, аты-жөнін айтқысы келмеген адам: «Біз мұндай сұрақтарға жауап бермейміз» деп қысқа қайырды.

Өткен аптада Ақорда Қазақстан президенті Нұрсұлтан Назарбаевтың қысқа мерзімді демалысқа кеткенін хабарлаған еді.

Оқырман пікірлері

XS
SM
MD
LG