Accessibility links

Президент Назарбаевтың «интернеттегі қорғаушылары» кім екені белгісіз


Қазақстан президенті Нұрсұлтан Назарбаев баспасөз мәслихатында сөйлеп тұр. Берлин, 8 ақпан 2012 жыл. (Көрнекі сурет)

Қазақстан президенті Нұрсұлтан Назарбаев баспасөз мәслихатында сөйлеп тұр. Берлин, 8 ақпан 2012 жыл. (Көрнекі сурет)

«Әділ сөз» баспасөз қорғау ұйымы «Қазақстан президентінің саяси, адами беделін, ар-абыройын қорғауды мақсат ететін» интернет-қауымдастығынан «ерекше» хат алғанын жазады. Бірақ хатта аттары аталған мекемелер ондай қауымдастықты білмейтінін айтады.

«Қайырлы күн, сіздерге «Kazakhstan Online» интернет-қауымдастығы жазып отыр. Бұл қауымдастық Қазақстан Республикасының президенті – Ұлт көшбасшысы Н.Ә.Назарбаевтың саяси, адами беделін, ар-абыройын интернет кеңістігінде қорғауға бағытталған. Ұйымыңыз ниеттестік танытып, төменде көрсетілген есепшоттардың біріне терминал арқылы ақша құйып, қаржылай көмектесе алады» деп жазады белгісіз ұйым.

Мұнан кейін «интернет-қауымдастық өкілдері» «қаржылай көмек беріп, ниеттестік танытқандардың» тізімі президент әкімшілігі мен «Самұрық–Қазына» ұлттық әл-ауқат қорына жіберілетінін «ескертеді».

«БІРЕУГЕ «ЖАСАҢДАР» ДЕП АЙТПАЙМЫЗ ҒОЙ»

Бұл «қауымдастық» туралы білмек болып, әуелі Қазақстан президентінің әкімшілігіне хабарластық. Баспасөз қызметінің өкілі Қанат (фамилиясын айтпады):

– Бұл – өздерінің жеке бастамасы. Себебі бізге ешкім мұндай бастама айтып келген жоқ. Біз біреуге «жасаңдар» деп айтпаймыз ғой. Бізбен келісілмеген, – деді.

Президент әкімшілігінің баспасөз өкілі сөзінің соңында ресми өтініш жіберу қажет екенін айтты. Алайда ресми өтініш жібергенімізбен, оған әлі жауап келген жоқ.

Мұндай ресми сауалды «Самұрық-Қазына» ұлттық әл-ауқат қорына да жолдаған едік. Қордың жұртшылықпен байланыс департаментінен:

– «Kazakhstan Online» аталатын қауымдастықтың Қорға еш қатысы жоқтығын және онымен ешқандай байланыстың болмағанын хабарлайды, – деген жауап алдық.

Өткен аптада «Қазақстан президентінің ар-абыройын қорғауды мақсат ететін» интернет-қауымдастық өкілдері көрсеткен электронды адреске де хат жібергенбіз – одан әлі күнге дейін жауап келмеді.
  • 16x9 Image

    Мақпал МҰҚАНҚЫЗЫ

    1985 жылы дүниеге келген.
    2006 жылы Абылай хан атындағы Қазақ халықаралық қатынастар және Әлем тілдері университетін бітірген.
    2007 жылдан бері Азаттық радиосының тілшісі.

    Мақпал жаңа технологиялар, блогосфера, жастар өмірі мен түрлі әлеуметтік мәселелер туралы жазады. Автормен оның Facebook парақшасында да пікірлесуіңізге болады.

Оқырман пікірлері

XS
SM
MD
LG