Accessibility links

Оппозициялық БАҚ үшін хабар дайындайтын орталық тінтілді


Тамара Калеева, "Әділ сөз" қорының президенті (сол жақта) және Георгий Архангельский, "Ракурс" продюсерлік орталығының директоры. Алматы, 6 желтоқсан 2013 жыл

Тамара Калеева, "Әділ сөз" қорының президенті (сол жақта) және Георгий Архангельский, "Ракурс" продюсерлік орталығының директоры. Алматы, 6 желтоқсан 2013 жыл

«16/12» арнасына бейне репортаждар әзірлеп келген «Ракурс» продюсерлік орталығы кеңсесін қаржы полициясы тінтіп, мүлкін тәркілеп әкетті деп хабарлады.

Оппозициялық «16/12» ақпараттық арнасы үшін хабар дайындайтын «Ракурс» атты продюсерлік орталық желтоқсанның 6-сы күні жұмысының тоқтап қалғанын хабарлады. Бұған қаржы полициясының орталықтың Алматыдағы кеңсесінде жүргізген тінтуі мен тәркілеуі себеп болған.

- Желтоқсанның 5-і күні кешкі 18.00 шамасында кеңесмізге жиырма шақты адам баса көктеп кірді. Олардың бұл әрекетіне біздің бұрынғы қызметкеріміз Азамат Есбергеннің арызы негіз болған көрінеді. Екі ай бұрын жұмыстан шығып кеткен Азаматтың арызында ««Ракурс» Мұхтар Әблязовтың қаржысына жұмыс істеп жатыр» деп жазылған-мыс. Бірақ бұл арызбен бізді таныстырмады, тек шетін ғана көрсетті, - деді «Ракурс» орталығының жетекшісі Георгий Архангельский.

ТІНТУ МЕН ТӘРКІЛЕУ

«Ракурс» қызметкерлерінің сөзінше, 3-4 сағатқа созылған тінтуден кейін қаржы полициясының қызметкерлері орталықтың техникасын тәркілеп алып кеткен. Олардың ішінде 2 бейнекамера, 15-ке жуық қатты диск, 4 жүйелі блок, 10-ға жуық ноутбук пен сейфт болуы мүмкін. Орталық өкілдері ешқандай тізімдеу мен хаттама толтырудың жасалмағанын айтып шағынады.

Оппозициялық "Голос республики" басылымының журналистері сот залында наразылық танытып тұр. Алматы, 6 желтоқсан 2012 жыл

Оппозициялық "Голос республики" басылымының журналистері сот залында наразылық танытып тұр. Алматы, 6 желтоқсан 2012 жыл


- Тінту менің кабинетімнен басталды. Мені таңқалдырғаны, қаржы полициясының қызметкері менің компютеріме отыра салысымен бірнеше секундта бұрын соңғы мен көрмеген бір файлды ашты. Оның ішінде танымал адамдардың аты-жөні жазылған және жанында көптеген сандар көрсетілген таблица болды. Бұл файлды менің ноутбугыма біреулер тастауы мүмкін. Олай дейтінім, өткен жұмадан сенбіге қараған түні біздің кеңсеміздегі 4 компьютер істен шығып қалған еді. Қызмет көрсету орталығында «USB флешка салатын жерге өте қатты күш түскендігін» айтты. Содан кейін ноутбугымды барлық бағдарламаларды қайта орнату үшін біздің техникалық маманға бердім. Осылайша ноутбук екі-үш күн көптің көз алдында тұрды. Осы кезде біздің кеңсеге бөтен біреулер кіріп, бөтен файлдарды салып кетуі әбден мүмкін, - деді Архангельский.

«ӘБЛЯЗОФОБИЯ»

Георгий Архангельскийдің сөзінше, биылғы жылдың мамыр айында құрылған «Ракурс» продюсерлік орталығының оппозициялық олигарх Мұхтар Әблязовқа қатысы жоқ.

ӘБЛЯЗОВ ІСІ

2009 жыл - 2005-2009 жылдары "БТА банкін" басқарған Мұхтар Әблязов банкті Қазақстан үкіметі мемлекет меншігіне алған соң Лондонға шығып кетті.

2011 жыл - Қазақстан президенті Нұрсұлтан Назарбаевтың қатаң сыншысына айналған оппозициялық олигархқа Ұлыбритания саяси баспана берді. Қазақстан үкіметі Әблязовты 6 миллиардқа жуық АҚШ долларын жымқырды деп айыптап, Ұлыбритания сотына жүгінді. Ал Әблязов өзіне қатысты қозғалған істердің саяси астары бар деп мәлімдеді. Осы жылы Қазақстан Ұлыбританияға Әблязовты экстрадициялау туралы өтініш түсірді.

2012 жыл - Ақпанда Лондон жоғарғы соты Мұхтар Әблязовты "сотты құрметтемегені" үшін 22 айға қамауға алып, активтерін құрсаулауға үкім етті. Үкіммен келіспеген Әблязов бұл елден де кетіп қалып, бой жасырып жүрді. Наурызда ол апелляциялық шағым жазды. Қараша айында Ұлыбританияның апелляциялық соты ақпандағы үкімді күшінде қалдырды. Осы айда Лондон соты Мұхтар Әблязовтан қазақстандық БТА банктің пайдасына 2,1 миллиард АҚШ долларын өндіріп алу туралы үкім шығарды.

2013 жыл - Шілдеде Әблязов Францияның оңтүстігінен табылып, Украина сотының талабы бойынша ұсталды.

2014 жыл - Қаңтарда Франция соты Әблязовты Ресей мен Украинаға экстрадициялау туралы үкім шығарды. Сәуірде Францияның кассациялық соты экстрадициялау туралы үкімді тоқтатып тастады. Сәуірде Ұлыбританияның оған берген саяси баспананы жою туралы шешім қабылдайтыны хабарланып, кейін ол процесс тоқтап қалды. 25 қыркүйекте Лион апелляциялық соты Әблязовты экстрадициялау ісін қайта қарай бастады. 24 қазанда Лион соты оны Ресей мен Украинаға экстрадициялауға санкция берді.

2015 жыл - Наурызда Францияның жоғарғы кассациялық соты Әблязовтың өтінішін қанағаттандырмай тастады. Қазанда Әблязовты экстрадициялау туралы бұйрыққа Франция премьер-министрі Мануэль Вальс 17 қыркүйекте қол қойғаны белгілі болды.


- Біз Мәскеулік «Московская правда» газеті құрылтайшысы болып табылатын «Студия на Покровке» компаниясымен арада келісім-шарт жасап, оларға бейнерепортаждар дайындайтын болып келіскенбіз. Біздің жұмысымыздың ақшасы банк арқылы, ресейлік рубль мен доллармен түсіп келді. Шоттарымыз ашық, ешқандай құпия болған емес. Ол ақшаның Әблязовтікі екенін кім, қайдан шығарып жүргені белгісіз. Бүгінде біздің билік «Әблязофобияға» шалдыққаны сонша, барлық ақша Әблязовтікі секілді болып көрінеді көздеріне. Екіншіден, бұл тінту – Жаңаөзен оқиғасының қарсаңында осылайша ақпараттық кеңістікті тазартудың амалы, - дейді Архангельский.

Бірақ «Ракурстың» жетекшісі продюсерлік орталықтың YouTube желісі арқылы тарайтын оппозициялық «16/12» ақпараттық арнасына да бейнематериалдар әзірлеп келгендерін айта кетті. 2012-2013 жылдары K+ телеарнасы мен «Республика» газеті бастаған 28 БАҚ сот шешімімен «экстремистік біртұтас БАҚ» ретінде танылып, жабылып қалған болатын. Қазақстан билігі бұл ақпарат құралдарын президент Нұрсұлтан Назарбаевтың режимін сынаушы, оппозициялық олигарх, қазір Францияда уақытша қамауда отырған Мұхтар Әблязовпен байланысы бар деп сипаттап келген. Аталған 28 БАҚ жабылған соң осы ұжымда жұмыс істеген бірқатар журналистер бірнеше жекеменшік шағын студиялар аша бастады. Олардың ішінде «16/12» ақпараттық арнасы да бар.

Елдегі сөз бостандығын бақылайтын «Әділ сөз» қорының президенті Тамара Калеева, қаржы полициясының бұл әрекеттерін «тәуелсіз басылымдарға жасалып жатқан қысымның жалғасы» деп біледі.

- Билікте түсініксіз қорқыныш бар. Басында Әкежан Қажыгелдин (бұрынғы премьер-министр – ред.), Рахат Әлиевтен (президент Назарбаевтың бұрынғы күйеу баласы – ред.) қауіптенді. Енді міне Мұхтар Әблязовтан сонша қорқып, не істеп, не қоярын білмейді, - дейді ол.

Бұл іске қатысты, Қаржы полициясы мен арызды түсірген журналист Азамат Есбергеннен қандай да бір жауап алу мүмкін болмады.
  • 16x9 Image

    Мәншүк АСАУТАЙ

    1980 жылы туған. Е.Бөкетов атындағы Қарағанды мемлекеттік университетін бітірген.

    Қарағанды қаласындағы жергілікті телеарнада қызмет еткен. 2004 жылдан бері Азаттықтың тілшісі. 

    Автормен оның Facebook парақшасында да пікірлесуге болады.

XS
SM
MD
LG