Accessibility links

Шымкентте де АИ-92 бензині тапшы


Көлікке бензин құйып жатқан адам. (Көрнекі сурет)

Көлікке бензин құйып жатқан адам. (Көрнекі сурет)

Шымкенттегі көлік иелері АИ-92 маркалы бензинге зар бола бастады. Ресми орган өкілі бұл тапшылықты «қалыпты жағдай» деп сипаттайды.

Оңтүстік Қазақстан облысының орталығы Шымкент қаласының тұрғыны Еркін қыркүйектің 8-і күні бірнеше жанар-жағармай бекетіне барса да, бір литрінің бағасы 128 теңгеден деп жазылып тұрған АИ-92 маркалы бензинін еш жерден таппағанын айтады.

– Таңертеңнен бері АИ-92 бензинін құю үшін бірнеше жанар-жағармай бекетіне бардым. Бәрі бітіп қалғанын айтты. Кейбірі тек талонмен ғана беріп жатыр. Ары-бері жүру керек, амалсыздан АИ-80 бензинін құйып жатырмын, – деді «Гелиос» жанар-жағармай бекетінің алдында тұрған Еркін Азаттық тілшісіне.

Азаттық тілшісі де қала ішіндегі жанар-жағармай бекеттеріне барып, АИ-92 бензинін сұрап көрді. Тілші барған бес бекеттің біреуінде ғана бұл бензин еркін сатылып жатты.

«БЕКЕТТЕРДІҢ ЖАНАРМАЙ ҮНЕМДЕЙТІН КЕЗІ»

Шымкентте көлік иелері көп алатын АИ-92 бензині тапшы екенін қаладағы жанар-жағармай бекеттерінің бірінің жұмысшысы Ержан (аты-жөнін атамауды сұрады – ред.) да айтты.

– Мәселен, бүгін АИ-92 бензині қалмады. Талоны бар жүргізушілерге де тауып бере алмай отырмыз, – дейді Ержан.

Оның айтуынша, Шымкентте үш аптадан бері АИ-92 бензині тек талонмен сатылып келген.

«Жанар-жағармай» ассоциациясы Оңтүстік Қазақстан облысы бойынша өкілділігінің төрағасы Қайыпбек Қамбаров та аймақта АИ-92 маркалы бензин тапшы екенін растады.

Алматыда жанармай бекетінде кезекте тұрған автокөліктер. 22 тамыз 2014 жыл. (Көрнекі сурет)

Алматыда жанармай бекетінде кезекте тұрған автокөліктер. 22 тамыз 2014 жыл. (Көрнекі сурет)

– Он күннің ішінде тұрақтылық болады. Жетіспеушілік бар, – деді Қайыпбек Қамбаров Азаттық тілшісіне.

Оның айтуынша, бұл өңірдің АИ-92 бензиніне айлық қажеттілігі – орташа есеппен 50-55 мың тоннна. Өңірдегі ол өнімді сататын 550-ге жуық жанар-жағармай бекетінің – 60-ы ірі компаниялардың, өзгесі – шағын кәсіпкерлердің меншігінде.

Қайыпбек Қамбаровтың сөзінше, «Оңтүстік Қазақстан облысы тұтынатын АИ-92 бензинінің 40 пайызға жуығы Ресейден тасымалданады, бензин қымбаттаған соң тасымал азайған».

– Ал бекеттерде бензин сатуды шектеп немесе талонмен беріліп жатқаны – дұрыс, қалыпты жағдай. Ай сайын ескі айдың 25-інен жаңа айдың 10-ына дейін аймақтағы көпшілік жанар-жағармай бекеттері үнемдеуге көшеді. Бүгінде аймақта бензин жетіспеушілігі сезіліп жатқаны содан, – дейді «Жанар-жағармай» ассоциациясы Оңтүстік Қазақстан облысы бойынша өкілділігінің төрағасы Қайыпбек Қамбаров.

Қазақстандағы мұнай өңдейтін ірі үш зауыттың бірі Оңтүстік Қазақстан облысында орналасқан.

ӨЗГЕ ӨҢІРЛЕРДЕГІ ТАПШЫЛЫҚ

Қазақстанда тамыздың ортасынан бері жанар-жағармай мәселесі жұртты алаңдатып тұр.

Тамыздың соңына таман Ақтауда да негізгі көлік отыны ретінде қолданылатын сұйық газ бағасы екі есе өсіп, жанар-жағармай бекеттерінде кезек күту көбейген. Жергілікті тұрғындар «тапшылық қолдан жасалды» десе, әкімдік пен «ҚазГазӨңдеу» мекемесі «ішкі сұраныстың өскенін» айтады.

Тамыздың 21-інде елдегі ірі мұнай компанияларының бірі «ҚазМұнайГаз» компаниясы жанармай бағасы 10-15 пайызға өсетінін жариялаған. Компания директорының маркетинг бойынша орынбасары Ерлан Қойбағаров бұл қымбатшылыққа екі нәрсе – девальвация мен жанармай құнының маусымдық өсуі себеп болғанын мәлімдеген.

Жанармай бекеттерінің бірінде АИ-92 бензині жоқ екені жайлы жазу. (Көрнекі сурет)

Жанармай бекеттерінің бірінде АИ-92 бензині жоқ екені жайлы жазу. (Көрнекі сурет)

Бензин бағасы қымбаттағаннан кейін Алматыдағы кейбір жанармай құю бекеттері АИ-95 маркалы бензинді талонмен сата бастаған еді. Ал қыркүйектің 3-інен бастап Астанадағы бірнеше жанармай құю станциясы да АИ-92 және АИ-95 маркалы бензиндерді талонмен сату жүйесін енгізген.

Ұлттық экономика министрі Ерболат Досаев жанармай бағасының шегін белгілеп, дизель отынының бір литрінің бағасы – 115 теңгеден, АИ-80 маркалы бензин – 89 теңгеден, АИ-92/93 маркалы бензин – 128 теңгеден аспауы керегін ескерткен.

Қазақстанда соңғы үш жылда көлік жүргізушілер көп тұтынатын АИ-92 бензинінің бағасы бірнеше рет өсіп, бір литрінің құны 128 теңгеге жетті.

Қазір Қазақстандағы мұнай базаларындағы АИ-92 маркалы бензиннің көлемі 95 мың тонна деп хабарланды. Энергетика министрінің орынбасары Ұзақбай Қарабалиннің айтуынша, Қазақстанда бір жылда тұтынылатын бензиннің 30 пайызы Ресейден жеткізіледі.

  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

Оқырман пікірлері

XS
SM
MD
LG