Accessibility links

Айбек Нұрсейіт: «Ғабиттің маған қолы батпай тұрғанын бірден байқадым»


Ережесіз жекпе-жекпен айналысатын спортшы Айбек Нұрсейіт.

Ережесіз жекпе-жекпен айналысатын спортшы Айбек Нұрсейіт.

Ережесіз жекпе-жектен Қытайда өткен халықаралық жарыс финалында тегі қазақ екі спортшының сайысқаны көп талқыланды. Ол спортшылардың бірі Азаттыққа берген сұхбатында қарсыласымен неліктен күш сынаспағанын түсіндірді.

Соңғы күндері әлеуметтік желілердің қазақстандық қолданушылары қазақ ұлтынан шыққан екі спортшының сайысы туралы видеоны бір-бірімен бөлісіп, қызу талқыласып жатыр.

Ол видеода ережесіз жекпе-жектің WBK тұжырымы бойынша Қытайда өткен жарыстың финалында рингке шыққан қазақстандық Айбек Нұрсейіт пен қытайлық Ғабит Тұрғанбектің жекпе-жегі түсірілген.

Бес минутқа созылған жекпе-жектен кейін төреші белсенді қимылдамай қойған екі спортшыға да «спорттық ережеге сай төбелеспегені» үшін қызыл қағаз беріп, нәтижелерін есептемей тастаған.

Айбек пен Ғабиттің сайысын «екеуі де қазақ болғандықтан бір-бірін ұра алмады» деп ризалықпен түсіндірушілер де, «олардың мұндай әрекеті спортқа жат қылық» деп сөккендер де болды.

Қазақстандық спортшы Айбек Нұрсейіт Азаттыққа берген сұхбатында бұл жарыс туралы, Ғабит Тұрғанбекпен рингке шыққан кездегі әрекеті жайлы айтты.

Ережесіз жекпе-жекпен айналысатын қытайлық қазақ Ғабит Тұрғанбек (сол жақта) пен қазақстандық Айбек Нұрсейіт (оң жақта)

Ережесіз жекпе-жекпен айналысатын қытайлық қазақ Ғабит Тұрғанбек (сол жақта) пен қазақстандық Айбек Нұрсейіт (оң жақта)

Азаттық: – Әлеуметтік желіде тараған видеода бейнеленген жарыс қай кезде өтіп еді?

Айбек Нұрсейіт: – Жарыс 5 наурызда Шанхай маңындағы шағын қалада өтті. Бұл жарысқа бару менің жоспарымда болмаған. Бес-алты күн қалғанда жарысқа баруы тиіс спортшылардың бірі қатыспайтынын айтып, оның орнына мен баратын болдым. 70 килограмм салмақта төрт адам шықтық. Мен франциялық, қытайлық қазақ Ғабит Тұрғанбек украиналық спортшыны жеңді. Осылайша екеуміз финалға шықтық. Ғабит екеуміз бір-бірімізді танимыз. Ол Алматыға келіп, бір айдай бізбен бірге жаттығу жасап кеткен.

Азаттық: – Ғабит екеулеріңізді «финалда спорттық ережеге сай жекпе-жек өткізбей, жұдырықтаспай жүріп алды» деп сынаған оқырмандар да бар? Оған қандай жауап айтар едіңіз?

Жекпе-жек алдында «бір-бірімізге жұдырық жұмсамаймыз» деген сияқты келісім болған жоқ. Келісім болса, шықпас едік.

Айбек Нұрсейіт: – Негізі мен финалға шығамын деп ойлаған жоқпын. Басты мақсатым франциялық қарсыласымды жеңу болды. Ғабит екеуміз бір-бірімізді жарыс алдында салмақ өлшеу сәтінде көрдік. Бірақ жекпе-жек алдында «бір-бірімізге жұдырық жұмсамаймыз» деген сияқты келісім болған жоқ. Келісім болса, жекпе-жекке шықпас едік. Финалдық жекпе-жекке мен де, Ғабит те қазақ әнімен шықтық.

Алаңға шыққан соң Ғабит соққы жасамай жүрді. Ғабиттің маған қолы батпай тұрғанын бірден байқадым да, мен де шабуылға шықпадым. Қытай көрерменнің алдында қос қазақ бір-бірінің мұрнын қанатып, көзін шығарып жату жараспайды деген намыс болды. Қанша ақша беріп жатса да, қазақ екенімізді дәлелдегіміз келді. Жекпе-жектен кейін Ғабит екеуміз арнайы банкетте жолығып, қол алыстық.

Азаттық: – Екеуіңіз қызыл қағаз алып, жарыстан шеттетілген соң жүлде кімге берілді?

Айбек Нұрсейіт: – Жарыста арнайы чемпиондық белбеу мен қомақты қаржы сарапқа салынған. Бірақ ол ешкімге берілмеді. Ұйымдастырушылар менің французбен өткізген жекпе-жегімді көріп, алдағы жарыстарға шығуыма мүмкіндік берді. Ғабитке қатысты қандай шешім шығарғанын алдағы күндері білеміз. Келесі жарыс мамырда Талдықорғанда өтеді. Бірақ WBK тұжырымының президенті ол жарыста мені қазаққа қарсы шығармайтынын айтты.

Азаттық: – Әңгімеңізге рақмет.

  • 16x9 Image

    Руслан МЕДЕЛБЕК

    1990 жылы 4 қаңтарда дүниеге келген.

    Қазақ ұлттық университеті журналистика факультетін "Халықаралық журналистика" мамандығы бойынша тәмамдаған.

    Халықаралық спорт журналистері қауымдастығы мен Халықаралық олимпиада комитетінің жас репортері.

    "Спорт", "Қазақ спорты" газеттерінде, "Алматы" телеарнасында журналист-репортер болған. 2012 жылдан бері "Азаттық" радиосының тілшісі. Сочи - 2014 қысқы және Рио - 2016 жазғы олимпиада ойындарынан тікелей хабар таратты.

    Автормен оның Facebook парақшасында да пікірлесуге болады.

Оқырман пікірлері

XS
SM
MD
LG