Accessibility links

Пауэрлифтинг чемпионы биыл да атағын қорғамақ


Сайфолла Тілеуберді. Пауэрлифтинг спортынан 2014 жылы АҚШ-тың Флорида шатында өткен әлем чемпионатының жүлдегері. Монғолия қазағы. Сурет жеке мұрағаттан алынды.

Сайфолла Тілеуберді. Пауэрлифтинг спортынан 2014 жылы АҚШ-тың Флорида шатында өткен әлем чемпионатының жүлдегері. Монғолия қазағы. Сурет жеке мұрағаттан алынды.

Былтыр АҚШ-та пауэрлифтингтен әлем чемпионатында алтын алған Моңғолия қазағы Сейфолла Тілеубердіұлы атағын қорғау үшін биылғы әлем біріншілігіне дайындалып жатыр.

27 жастағы моңғолиялық спортшы Сайфолла Тілеубердіұлы 2015 жылғы халықаралық жарыстарға Моңғолия астанасы Улан-Батордағы өзінің жеке орталығында жаттығып жатыр. Спортшы алдымен Жапониядағы әлем чемпионатына, кейін Мәскеудегі әлем кубогына барады. Ал тамызда Орландода (АҚШ) өтетін әлем чемпионатына қатысады.

Сайфолла барлық жарыстарға жалғыз баратынын, жеке бапкері мен кеңесшісінің жоқ екенін айтады.

«Биылғы жарыстарға қатысу шығындарын өз қалтамнан шығарамын. Мемлекеттен арнайы көмек жоқ. Жаттығу да өзім ашқан жеке фитнес орталығымды өтеді» дейді ол.

Жарыстарға баратын қаржы табу үшін моңғолиялық қазақ жеке кәсібін ашқан. Ол негізгі мамандығы бойынша Улан-Баторда тергеуші болып жұмыс істейді.

Сейфолла – совет кезеңінде Ресейдегі жоғары оқу орындарында оқыған баян-өлгийлік қазақ интеллигенциясы отбасыларының бірінде туған. Әкесі – инженер, шешесі – заңгер. Қазір екеуі де зейнетте. Спортшының өзі де Баян-Өлгийде туып-өскен.

«Негізі боксшы болғым келген. Оқушы кезімде бокс үйірмесіне жиі баратынмын. 2009 жылы Улан-Батордағы полиция академиясына оқуға түсіп, дене шынықтыру пәнінің мұғалімі мені пауэрлифтингке алып келді. Бұрын қол күресті қатар алып жүргем, қазір пауэрлифтингке ден қойдым» дейді әлі үйленбеген бойдақ жігіт Азаттық тілшісіне.

Сайфолла Тілеуберді жарысқа қатысушылармен бірге. Сурет жеке мұрағаттан алынды.

Сайфолла Тілеуберді жарысқа қатысушылармен бірге. Сурет жеке мұрағаттан алынды.

Сейфолла Тілеубердіұлы пауэрлифтингпен 21 жасында айналыса бастаған. Бұл спортпен қатар қол күреске де қызығады. Осы екі спорттан бірнеше халықаралық жарыста жүлде алған. 2010 жылы Сейфолла халықаралық аренадағы алғашқы ірі жеңісіне жетіп, пауэрлифтингтен Улан-Батордағы Азия чемпионатында алтын алады. Бір жыл өткен соң қол күрестен Өскемендегі Азия біріншілігінде қола медаль иеленеді.

Спортшы 2014 жылы пауэрлифтингтен Моңғолия чемпионатында үшсайыс қорытындысы бойынша 917 килограмм көтеріп, ел рекордын жаңартады. Сол жылы ол АҚШ-та өзінің ең ірі табысына қол жеткізеді. Майамиде өткен әлем чемпионатында Сейфолла 125 килограмм салмақ дәрежесінде зілтемірді иығына қойып көтеру бойынша 380 килограмм нәтижемен әлем рекордын да жаңартты.

«Жыл сайын нәтижемді жақсартуға тырысамын. 2013 жылы Прагада өткен әлем чемпионатында қола, 2014 жылы Майамиде алтын алдым. Биыл алтынның санын көбейту басты мақсатым» дейді спортшы.

Майамидегі пауэрлифтингтен әлем чемпионатына ардагерлер арасындағы жарысқа барған 58 жасар қазақстандық спортшы Боранбай Бейсенбаев моңғолиялық қазақ жігіттің қайратын өз көзімен көрген.

«Сайфолла алдымен 350 килограмды иығына қойды да еркін отырып, тұрды. Кейін 370 және 380 килограмды да еш қиналмай көтеріп, алтын алды» дейді ол.

Сайфолла Тілеубердіұлы қазір өзінің жеке орталығында бірнеше баланы жаттықтырып жүр.

«Пауэрлифтингке ебі бар деген төрт-бес баланы іріктеп алып, соларды дайындап жүрмін. Алдағы уақытта жаттықтырушы ретінде де шәкірттерімнің жеңісін көргім келеді» дейді ол.

Пауэрлифтинг зілтемірді жатып көтеру, тұрып көтеру және иықпен көтеру сынды үш сайыстан тұрады. 1972 жылдан бері әлем чемпионаты ұйымдастырылып келе жатса да, бұл спорт түрі олимпиада бағдарламасына енбеген.

  • 16x9 Image

    Нұртай ЛАХАНҰЛЫ

    Нұртай Лаханұлы. 1973 жылы дүниеге келген. 1998 жылы әл-Фараби атындағы қазақ ұлттық университетінің филология факультеті бойынша тәмамдаған.  «Қазақстан-Заман» газеті мен «Қазақ радиосында» қызмет еткен. 2010 жылдан бері Азаттық радиосында  жұмыс істейді.

  • 16x9 Image

    Руслан МЕДЕЛБЕК

    1990 жылы 4 қаңтарда дүниеге келген.

    Қазақ ұлттық университеті журналистика факультетін "Халықаралық журналистика" мамандығы бойынша тәмамдаған.

    Халықаралық спорт журналистері қауымдастығы мен Халықаралық олимпиада комитетінің жас репортері.

    "Спорт", "Қазақ спорты" газеттерінде, "Алматы" телеарнасында журналист-репортер болған. 2012 жылдан бері "Азаттық" радиосының тілшісі. Сочи - 2014 қысқы және Рио - 2016 жазғы олимпиада ойындарынан тікелей хабар таратты.

    Автормен оның Facebook парақшасында да пікірлесуге болады.

Оқырман пікірлері

XS
SM
MD
LG