Accessibility links

Лондонда болған жарылыстардан кемінде 37 адам қаза тапты


Лондоннан жұма күні таңға таман түсіп жатқан мәліметтерде шабуылдардың барысында кемінде 37 адам қаза тапқаны хабарланып отыр. Бейсенбі күні Лондон транспорт жүйесінде болған жарылыстардан, сол сияқты, 700 жуық адам жарақат алды. Лондон метро полициясының өкілі Брайан Паддик метрода жасалған үш жарылысқа және автобуста жасалған жарылысқа кім айыпты екенін әлі біле алмай отырмыз деді. Ұлыбритания бас министрі Тонни Блейер төрт жарылысты ұйымдастырылған террорлық шабуыл деп қабылдады, оның мақсаты – "Үлкен Сегіздік" мәслихатының басталуына кедергі келтіру деді. Британия сыртқы істер министрі Джек Стро бомбалық жарылыстарды "Әл Қаида" ұйымы атқарған көрінеді деді.

Лондондағы жарылыстарды, расында да, "әл-Қаидамен" сыбайлас ұйым мойнына алып отыр. Исламшыл ұйымның веб-сайтында жарияланған хаттағы мәлімдеме, дегенмен, қолма-қол дәйектелген жоқ. Гленеглис қаласында "Үлкен Сегіздік" саммитін өткізіп отырған Тонни Блейер жарылыстар болған соң Лондонға шұғыл барып қайтты. Блейер саммит өз жұмысын алдын-ала жасалған кесте бойынша жалғастыра берсе деп қалайды. Саммит жұма күні Африка елдеріне кедейшілікпен қарсы күресте көмек көрсету мәселелерін талқыламақ. АҚШ, Британия, Германия, Франция, Италия, Канада, Жапония және Ресей басшылары саммитімізді жалғастыра берейік, әйтпесе террористер жеңіске жеттік деп қалады деп уәделесті.

Лондон жарылыстары құрбандарының саны әлі өсуі мүмкін. Британия ресми өкілдері бейсенбі күнгі мәліметтерінде жараланғандардың арасында 45 адам өте ауыр халде деді. Метро жолаушыларының бірі жарылыстан соң жұрт жаппай үрейге түсті деп оқиға жайында былай айтып берді:

- Адамдар айғайлай бастады. Жұрт өзін өте нашар сезінді. Біздің вагондағы адамдар бірін бірі сабырға шақырумен болды, сондықтан біздегі жағдай тәуірірек көрінді маған. Бірақ, басқа вагондардағы адамдар өздерін өте ыңғайсыз сезініп жатқанын ести алдық. Кейбір адамдар балғаларды жұлып алып, әйнектерді бұза бастады, есіктерді ашуға әрекет жасады.

Лондон көлігіндегі жарылыстар былтыр 11 наурызда Испания астанасы Мадрид көлік жүйесінде болған шабуылдарға ұқсайды. Мадрид шабуылдары ұлттық сайлау алдында үш күн бұрын жасалған еді. Лондон шабуылдары да үлкен саяси оқиғаға орайластырылып отыр. Тонни Блейер бейсенбі күні халыққа теледидар арқылы қайырылып, британдықтарды бұл террорлық әрекетке қарсы өз ынтымағын білдіруге шақырды:

- Террористер бізді үркітуге әрекет жасаса да біз қорықпаймыз. Олар осындай тәсілдермен елімізді не болса болмысымызды басқа жолға бұруға әрекет жасаса біз оған бой бермейміз. Олар халық арасына іріткі салып не болмаса жігерімізді әлсіреткісі келсе – біз араздаспаймыз, жігерімізді күшейтеміз.

Ұлыбританиядағы шабуылдардан соң басқа Еуропа елдерінде де қауіпсіздік шаралары күшейтілді. Франция үкіметі төтенше мәжіліс өткізді. Еуропа парламентінің президенті Джозеп Боррел шабуылдардың құрбандарына көңіл айтты. АҚШ сыртқы істер министрі Кондолиза Райс Вашингтонда Британия елшілігіне барып, көңіл айту кітабына қол қойды. АҚШ қауіпсіздік жүйесі ең жоғары сақтық дәрежесіне келтірілді. Мәскеу метросында қауіпсіздік шараларын арттыру бұйырылды.
XS
SM
MD
LG