Accessibility links

Әблязовтың бұрынғы адвокаты амнистияға ілікті


Елена Тищенко. 3 қыркүйек 2013 жыл.

Елена Тищенко. 3 қыркүйек 2013 жыл.

Қазақстандық бұрынғы банкир Мұхтар Әблязовтың экс-адвокаты, Мәскеуде ұсталған Елена Тищенко экономикалық амнистияға ілігіп, қамаудан босап шықты.

Елена Тищенконың адвокаттарына сілтеме жасаған ресейлік "Известия" басылымының дерегінше, шағымданушы тарап - БТА-банк Тищенкоға байланысты берген талабын ("Әблязовтың Қазақстаннан заңсыз шығарған 3,3 миллиард АҚШ долларын жымқырды") 30 желтоқсанда қайтарып алған.

"Ресейлік тергеушілер қылмыстық істі жапқан соң Елена Тищенко елден шығып кетті, қазір Лондонда баларының жанында" дейді оның адвокаттары Алексей Поздняков мен Сергей Куземин басылымға.

Украина азаматы, Францияда тұруға рұқсат алған 37 жастағы адвокат Елена Тищенко 2013 жылы 31 тамызда шетелден Мәскеуге ұшып келген бойда ұсталып, екі айға қамалған еді. Тергеушілер Тищенконы "Мәскеуде Әблязовтың қылмыстық жолмен иемденген мүліктерін заңдастырумен айналысқан" деп айыптаған.

Мәскеудің Тверь аудандық соты 2013 жылы 30 қазанда тергеушілердің "Тищенконың ісі бойынша әлі біраз тергеу жүргізу қажет" деген сұрауын ескеріп, оның қамауда ұстау мерзімін 2014 жылдың ақпан айына дейін ұзартқан. Қорғаушылары Тищенконы 40 миллион рубль кепіл төлеп қамаудан босатуды сұрағанымен, сот тергеу тарабын қолдаған.

ӘБЛЯЗОВТЫҢ "АДАМДАРЫ" МЕН ӘЙЕЛІН ҚУДАЛАУ

Еуропада оппозициялық олигарх Мұхтар Әблязовпен істес болған Тищенкодан өзге бірнеше адам да назарға ілікті. Чехия Мұхтар Әблязовпен іскерлік байланысы үшін 2012 жылдың мамыр Татьяна Параскевич.

Татьяна Параскевич.

айында Карловы Вары қаласында тұтқындалған банкир Татьяна Параскевичті Украина немесе Ресейге экстрадициялауы мүмкін.

Ол Әблязовпен байланысты «Еуразия» инвестициялық-өнеркәсіптік топ» компаниясының қаржы-есеп басқармасын басқарған.

Ресей мен Украинада Татьяна Параскевичті «Мұхтар Әблязовтың «қылмыстық тобымен» сыбайласып, қазақстандық «БТА банкінен» миллиондаған долларды жымқырған» деп айыптайды.

2013 жылы сәуір айында Қазақстанның сұрауы бойынша Интерпол ​санкциясымен Мұхтар Әблязовтің бұрынғы оққағары Александр Павлов Испанияда ұсталған. Қазақстан билігі оған "қаржылық алаяқтық" және "терроризм" бойынша айыптар таққан.

ӘБЛЯЗОВ ІСІ

2009 жыл - 2005-2009 жылдары "БТА банкін" басқарған Мұхтар Әблязов банкті Қазақстан үкіметі мемлекет меншігіне алған соң Лондонға шығып кетті.

2011 жыл - Қазақстан президенті Нұрсұлтан Назарбаевтың қатаң сыншысына айналған оппозициялық олигархқа Ұлыбритания саяси баспана берді. Қазақстан үкіметі Әблязовты 6 миллиардқа жуық АҚШ долларын жымқырды деп айыптап, Ұлыбритания сотына жүгінді. Ал Әблязов өзіне қатысты қозғалған істердің саяси астары бар деп мәлімдеді. Осы жылы Қазақстан Ұлыбританияға Әблязовты экстрадициялау туралы өтініш түсірді.

2012 жыл - Ақпанда Лондон жоғарғы соты Мұхтар Әблязовты "сотты құрметтемегені" үшін 22 айға қамауға алып, активтерін құрсаулауға үкім етті. Үкіммен келіспеген Әблязов бұл елден де кетіп қалып, бой жасырып жүрді. Наурызда ол апелляциялық шағым жазды. Қараша айында Ұлыбританияның апелляциялық соты ақпандағы үкімді күшінде қалдырды. Осы айда Лондон соты Мұхтар Әблязовтан қазақстандық БТА банктің пайдасына 2,1 миллиард АҚШ долларын өндіріп алу туралы үкім шығарды.

2013 жыл - Шілдеде Әблязов Францияның оңтүстігінен табылып, Украина сотының талабы бойынша ұсталды.

2014 жыл - Қаңтарда Франция соты Әблязовты Ресей мен Украинаға экстрадициялау туралы үкім шығарды. Сәуірде Францияның кассациялық соты экстрадициялау туралы үкімді тоқтатып тастады. Сәуірде Ұлыбританияның оған берген саяси баспананы жою туралы шешім қабылдайтыны хабарланып, кейін ол процесс тоқтап қалды. 25 қыркүйекте Лион апелляциялық соты Әблязовты экстрадициялау ісін қайта қарай бастады. 24 қазанда Лион соты оны Ресей мен Украинаға экстрадициялауға санкция берді.

2015 жыл - Наурызда Францияның жоғарғы кассациялық соты Әблязовтың өтінішін қанағаттандырмай тастады. Қазанда Әблязовты экстрадициялау туралы бұйрыққа Франция премьер-министрі Мануэль Вальс 17 қыркүйекте қол қойғаны белгілі болды.


2013 жылы шілденің 22-сі күні Мадрид соты Павловты экстрадициялау туралы шешім шығарды, қарашаның 18-і күні Испания жоғарғы соты Павловты экстрадициялауды мақұлдады. Оны экстрадициялау туралы соңғы шешімді Испания министрлер кеңесі шығарады.

2013 жылы маусым айында Польшада Қазақстан билігінің сұрауы бойынша
​Әблязовтың жақын серіктерінің бірі ретінде аталатын Мұратбек Кетебаев та ұсталып, кейін «қамауға негіз жоқ» деп босатылған. Ол жуықта Польшадан босқын статусын алды.

2013 жылы маусымда Мұхтар Әблязовтың әйелі Алма Шалабаева мен кәмелетке толмаған қызы Италияда тұтқындалып, Қазақстанға әкелінген еді. Кейін Италия өкіметі бұл депортацияның заңсыз екенін мәлімдеп, оқиғаға байланысты Италия ішкі істер министрлігінің шенеунігі кінәсін мойындап, жұмысынан босатылды. Шалабаеваның депортациясы туралы іс Италия парламентінде қаралып, бұл оқиға Италия ішкі істер министріне сенімсіздік жариялау тәралы мәселе қозғауға түрткі болды.

24 желтоқсанда Қазақстан құқық орындары Алма Шалабаеваға ешқайда кетпеу ​ туралы қолхатпен ұстау шартын өзгертіп, шетелге шығуына рұқсат берген соң ол қызы екеуі Италияға оралды.

Ал Мұхтар Әблязовтың өзі 2013 жылы 31 шілдеде Францияның оңтүстігіндегі Муан-Сарту қаласында Украинаның сұрауы бойынша ұсталған. Оны "ірі көлемде қаржы жымқырды" деп Қазақстан мен Ресей де сұратқан.

2005-2009 жылдары Қазақстанда "БТА банк" директорлар кеңесінің төрағасы болған Мұхтар Әблязов 2009 жылы банк мемлекет меншігіне өткен соң шетелге кетіп, Лондонға қоныстанған. Ұлыбритания оған 2011 жылы саяси баспана берген.

Қазақстан үкіметі Әблязовты "5 миллиардқа жуық АҚШ долларын жымқырды" ​деп айыптап, Ұлыбритания сотына жүгінген. 2012 жылғы ақпанда Лондон соты Мұхтар Әблязовты "сотты құрметтемегені" үшін 22 айға қамауға алып, активтерін құрсаулауға үкім еткен еді. Онымен келіспеген Әблязов 2012 жылы наурызда апелляциялық шағым жазған. 2012 жылы қараша айында Ұлыбританияның апелляциялық соты ақпанда шығарылған шешімді күшінде қалдырған.

Мұхтар Әблязовқа қарсы Ресейдің заң орындары да қылмыстық іс қозғап, 2010 жылы Мәскеу соты оны тұтқынға алу туралы сырттай үкім еткен.

Әзірге Франция соты Мұхтар Әблязовты абақтыда ұстап отыр.

Оқырман пікірлері

XS
SM
MD
LG