Поезда православ діні туралы хабар қою жобасы сынға кезікті

Ресейдің мемлекеттік теміржол компаниясы алыс бағытқа жүретін поездарда жолаушыларға арнап христиан дініне қатысты тақырыптардағы аудио бағдарламаларды ойнатуды көздеп отыр. Православ шіркеуінің қолдауымен жүзеге асатын бұл жоба, әсіресе мұсылмандар мекендейтін аймақтарда сынға ілінді.

ТАРИХ, МӘДЕНИЕТ ЖӘНЕ ДІНИ ТАҚЫРЫПТАР

Ресейде пойыз жолаушыларының тарих, философия, дін – соның ішінде орыс православ ағымына қатысты танымын кеңейту үшін арнайы аудио бағдарламаларды ойнату қарастырылып жатыр. Мәскеу патриархиясы мен «Ресей радиосы» арнасының журналисі Людмила Борзяк мұрындық болған бағдарламаларды алыс қашықтыққа жүретін 200-ден астам теміржол көлігіне орнату көзделген.

Танымал орыс діндарларының өмірі, соның ішінде княгина Ольга мен князь Владимирдің тағдыры, Ресейде христиан дінінің таралуы, орыс мемлекетінің құрылуы сияқты тақырыптар бағдарламаға арқау болған. Жолаушылар Фалес пен Кіші Плиний сияқты классик ойшылдар туралы, әртүрлі өнертабыстардың тарихы жайлы толық мағлұмат алады.

Ресей мемлекеттік теміржолының баспасөз-хатшысы Елена Мирошникова Азаттыққа былай деді:

«Бұл жоба қоғамдағы мәдениет пен білім деңгейінің артуына ықпал етеді деп үміттенеміз. Ел тарихына құрмет, ізгілік пен рухани өсу сияқты құндылықтарды дамытуға бағытталған».

«МҰСЫЛМАНДАР НАРАЗЫ БОЛАДЫ»

Бірақ жобаға шүбәмен қарайтындар да бар. Кейбір сарапшылар мұндай жоба мемлекеттік мекемелердегі зайырлылық ұстанымына қайшы шығады дейді. Әсіресе, православтық христиан дінін ұстанбайтын аймақтарда наразылық қатты байқалады.

Негізінен мұсылмандар мекендейтін Татарстанның астанасы Қазан қаласының 17-жасар тұрғыны Адиляның пікірінше, жаңа бастама жұрттың бір бөлігінің ренішін туғызуы ықтимал.

«Мен бұған үзілді-кесілді қарсымын. Мен күнде пойызбен жүремін, тек орыс тілінде баяндайтын православтық тақырыптағы бағдарламаны тыңдағым келмейді. Кейбір адамдар ислам туралы бір ауыз сөз айтпай, тек православтар туралы әңгімелегені үшін қорланып қалуы мүмкін».

Жобаға арқау болған радио бағдарлама Орыс православ шіркеуімен бірге даярланған, онда бес тақырыптың үшеуі дінге арналған.

Дегенмен, жолаушы тыңдағысы келмесе радионың дауысын өшіріп қоюына болады. Шіркеу тарихы бойынша сарапшы Ирина Карацуба пойыз сияқты қоғамдық орындарға діни тақырыпты тықпалау адамдарды діннен алшақтатуы мүмкін екенін айтады. Ал Ресей мемлекеттік теміржолының баспасөз-хатшысы Елена Мирошникова жобаның мақсаты прозелитизм (өз дініне тарту) емес дейді:

«Проваслав діні – біздің мәдениетіміз бен тарихымыздың бір бөлігі. Дінді насихаттауды мақсат етіп отырған жоқпыз».

ДІНДАР ШЕНЕУНІК

Ресей ресми түрде көп конфессиялы ел екенін мақтан тұтқанымен, жоғары лауазымды шенеуніктердің көбі соңғы жылдары Мәскеу патриархына етене жақын жүретіні үшін сынға ілініп отыр.

Орыс православ шіркеуінің басшысы патриарх Кирилл президент Владимир Путиннің ұзақ мерзімді билігін «Құдайдың кереметі» деп сипаттады.

Путинге жақын жүретін Ресей теміржолының жетекшісі Владимир Якунин діншіл адам екенін жасырмайды. Ол православ шіркеуіне сіңірген еңбегі үшін үш орденге – Саровтық әулие Серафим ордені, Мәскеулік әулие князь Даниил ордені және әулие Андрей Рублев орденіне ие болған. Сондай-ақ, Грекия, Сербия, АҚШ, Чехия мен Словакияның православтық ғибадатханаларынан алған марапаттары бар.

Якунин Иса пайғамбар жерленген деп саналатын Иерусалимдегі «қасиетті отты» жыл сайын пасха мейрамы кезінде Мәскеуге жеткізуге жауапты.

Клэр Биггтің мақаласын аударған – Динара Әлімжан