Accessibility links

2015 жылдың спорт оқиғалары


Қазақстандық спортшы Гузалия Гафурова жеңісіне қуанып тұр. Инчхон, 3 қазан 2014 жыл. (Көрнекі сурет)

Қазақстандық спортшы Гузалия Гафурова жеңісіне қуанып тұр. Инчхон, 3 қазан 2014 жыл. (Көрнекі сурет)

Азаттық биыл әлемде өтетін ірі халықаралық спорт жарыстарының күнтізбесін ұсынады.

2015 жылы шілденің 31-інде Куала-Лумпурда (Малайзия) 2022 жылғы қысқы олимпиаданы өткізетін қала белгілі болады. Қысқы ойындарды қабылдауға Алматы (Қазақстан) мен Пекин (Қытай) үміткер.

Қаңтардың 24-і мен ақпанның 4-і аралығында Гранада (Испания) мен Осрбльеде (Словакияда) қысқы универсиада өтеді. Ал жазғы универсиаданы шілденің 3-і мен 14-і аралығында Кванджу (Оңтүстік Корея) қабылдайды.

2015 жылы футболдан Азия, Америка, Африка чемпионаттары ұйымдастырылады. Азия кубогы Австралияда (қаңтардың 9-ы мен 31-і арасында), Африка кубогы Экваторлық Гвинеяда (қаңтардың 1-сі мен ақпанның 8-і аралығында), Оңтүстік Америка кубогы Чилиде (маусымның 11-і мен шілденің 4-і арасында), Солтүстік Америка чемпионаты АҚШ пен Канадада (шілденің 7-сі мен 26-сы арасында) өтеді.

Маусымның 12-сі мен 28-і аралығында алғаш рет Еуропа ойындары өтеді. Бакудегі ойындарға тек Еуропа елдері қатысады.

Маусымның 6-сы мен шілденің 5-і аралығында Канадада әйелдер футболынан әлем чемпионаты ұйымдастырылады.

ҚЫСҚЫ СПОРТ ҮМІТКЕРЛЕРІ

Фристайлдан жасөспірімдер арасындағы әлем чемпионы, қазақстандық Юлия Галышева қаңтардың 15-і мен 25-і аралығында Крейшбергтегі (Австрия) ересектер арасындағы әлем біріншілігіне қатысады.

Ақпанның 18-і мен наурыздың 1-і арасында әлем чемпионатының қола жүлдегері Алексей Полторанин бастаған Қазақстан шаңғы құрамасы Швецияда өтетін әлем чемпионатына барады.

Элизабет Тұрсынбаева - мәнерлеп сырғанаудан халықаралық жарыстардың жеңімпазы.

Элизабет Тұрсынбаева - мәнерлеп сырғанаудан халықаралық жарыстардың жеңімпазы.

Ақпанның 28-і мен наурыздың 1-і арасында Астанада конькимен жүгіруден әлем чемпионаты ұйымдастырылады. Шорт-трекшілер наурыздың 13-15 күндері Мәскеудегі әлемдік сында жүлдеге таласады.

Қазақстандық жас спортшы Элизабет Тұрсынбаева наурыздың 2-8 күндері Таллинде (Эстония) өтетін жасөспірімдер арасындағы әлем чемпионатына барады.

Сочи олимпиадасының қола жүлдегері Денис Тен 23-29 наурызда болатын Шанхайдағы (Қытай) әлем чемпионатына қатысады.

Наурыздың 3-і мен 15-і арасында Финляндияда биатлоннан әлем чемпионаты өтеді.

ЖАЗҒЫ СПОРТ ЖАРЫСЫНА БАРАТЫНДАР

2015 жыл жазғы спортта Рио-де-Жанейродағы олимпиадаға іріктеу жылы болмақ. Биылғы әлем және құрлық чемпионаттарында олимпиада жолдамалары бөліске түседі.

Қазақстан жанкүйерлері үшін дзюдодан 24-30 тамызда Астанада өтетін әлем чемпионаты, күзде Дохадағы (Катар) бокстан әлем біріншілігі маңызды. Қазақстандық дзюдошы Максим Раков 2009 жылы Роттердамда (Голландия) өткен әлем чемпионатында алтын алған. Содан бері Қазақстан дзю-додан әлемдік сында алтын ала алмай келеді.

2013 жылғы Алматыдағы әлемдік жарыста төрт алтын алған қазақ боксшылары Дохадағы әлем чемпионатына фаворит ретінде барады.

20-29 қарашада Хьюстонда (АҚШ) өтетін ауыр атлетикадан әлем чемпионатында Қазақстан атлеттері Рио-де-Жанейро жолдамасына таласады.

Күрес түрлерінен 2014 жылы Ташкентте өткен әлем чемпионатында Қазақстан бірде-бір медаль ала алмады. Енді қазақ балуандары 2015 жылы 7-15 қыркүйекте Лас-Вегастағы (АҚШ) әлем чемпионатында жүлдемен қатар олимпиада лицензиясын алу үшін де күреседі.

Брасс әдісімен жүзуде қазақстандық Дмитрий Баландин Азия ойындарының үш алтынын жеңіп алды. Инчхон, 26 қыркүйек 2014 жыл.

Брасс әдісімен жүзуде қазақстандық Дмитрий Баландин Азия ойындарының үш алтынын жеңіп алды. Инчхон, 26 қыркүйек 2014 жыл.

Шілденің 24-і мен тамыздың 8-і аралығында Қазанда (Татарстан) су спорты түрлерінен әлем чемпионаты өтеді. Бұл сынға Қазақстаннан Азия ойындарының үш дүркін чемпионы Дмитрий Баландин де барады.

22-30 тамызда әлемнің жеңіл атлеттері Пекинге (Қытай) жиналып, әлем чемпионатына қатысады.

Қазақстан велоспортшылары 19-27 қыркүйекте Ричмондтағы (АҚШ) әлем чемпионатына барады.

2015 жылы таэквондодан әлемдік жарыс Ресейдің Челябинск қаласында (12-18 мамыр) семсерлесуден әлем біріншілігі Мәскеуде (13-19 шілде) өтеді.

Күзде спорттық гимнастикадан әлем чемпионаты Глазгода (Шотландия), көркем гимнастикадан әлем біріншілігі Штутгардта (Германия) ұйымдастырылады.

АЗИЯ ЧЕМПИОНАТТАРЫ

10-14 ақпанда Таиландта велоспорттан, сәуірде Сингапурде дзюдодан, шілдеде Непалда ауыр атлетикадан Азия чемпионаты өтеді.

Мамырдың 6-сы мен 10-ы аралығында Дохада (Катар) күрес түрлерінен,әлем чемпионаты ұйымдастырылады.

Қазақстан боксшылары 2-11 маусымда Бангкокта (Таиланд) өтетін Азия чемпионатына қатысады.

Волейболдан Қазақстан әйелдер құрамасы 20-28 мамырда Пекиндегі (Қытай) Азия чемпионатына барады.

Маусымның 1-і мен 5-і аралығында Кобеде жеңіл атлетикадан Азия чемпионаты өтеді.

  • 16x9 Image

    Руслан МЕДЕЛБЕК

    1990 жылы 4 қаңтарда дүниеге келген.

    Қазақ ұлттық университеті журналистика факультетін "Халықаралық журналистика" мамандығы бойынша тәмамдаған.

    Халықаралық спорт журналистері қауымдастығы мен Халықаралық олимпиада комитетінің жас репортері.

    "Спорт", "Қазақ спорты" газеттерінде, "Алматы" телеарнасында журналист-репортер болған. 2012 жылдан бері "Азаттық" радиосының тілшісі. Сочи - 2014 қысқы және Рио - 2016 жазғы олимпиада ойындарынан тікелей хабар таратты.

    Автормен оның Facebook парақшасында да пікірлесуге болады.

Оқырман пікірлері

XS
SM
MD
LG