Accessibility links

Олимпиадаға Қазақстаннан үш семсерлесуші барады


Лондон олимпиадасына қатысатын спортшы-семсерлесуші Элмир Әлімжанов. (Сурет спортшының әлеуметтік желідегі парағынан алынды). 2012 жыл, шілде.

Лондон олимпиадасына қатысатын спортшы-семсерлесуші Элмир Әлімжанов. (Сурет спортшының әлеуметтік желідегі парағынан алынды). 2012 жыл, шілде.

Лондон олимпиадасына 44 елден 212 семсерлесуші қатысады. Ең көп семсерлесуші – АҚШ-тыкі (16 спортшы). Италия мен Ресей – 15, Оңтүстік Корея – 14, Германия - 12, Франция – 11, Египет пен Ұлыбритания 10 адамды жарысқа шығарады.

Лондон олимпиадасында семсерлесуден 10 комплект жүлде бөліске түседі. Бұл сайыс семсер, қылыш, рапира атты үш бағдарламаға бөлінеді.

ҚАЗАҚСТАНДЫҚ ҮШ СПОРТШЫ

Қазақстандық спортшылар семсер (шпага) мен қылыш (сабля) бойынша жүлдеге таласады.

Элмир Әлімжанов олимпиадаға семсерлесу бағдарламасы бойынша қатысады. Ол – жасөспірімдер арасындағы 2006 жылғы әлем чемпионы (бұл атақты командалық жарыста жеңіп алды), ересектер арасында үш дүркін Азия чемпионатының күміс жүлдегері (2008, 2011, 2012), 2012 жылы Эстония астанасы Таллинн қаласында өткен әлем кубогының қола жүлдегері.

Спортшы әлемдік рейтингте оныншы орында тұр. Олимпиада жолдамасын Халықаралық семсерлесу федерациясының рейтингіндегі осы көрсеткіш бойынша алды.

Дмитрий Алексанин шпага бойынша жарысқа қатысады. Халықаралық семсерлесу федерациясының Азия құрылығына бөлген екі жолдамасының бірі осы спортшыға бұйырды. Ол ірі халықаралық жарыстарға алғаш рет қатыспақ.

Элмир Әлімжанов пен Дмитрий Алексаниннің басты қарсыластары – Паоло Пиццо (Италия, 2011 жылғы әлем чемпионы), Николай Новосжолов (Эстония, 2010 жылғы әлем чемпионы), Гаутиер Грумер (Франция, үш дүркін әлем чемпионы), Жун Жин Сун (Корея, 2010 жылғы Азия ойындарының чемпионы).

Юлия Живица – қылыштасудан сынға түсетін, алматылық 22 жастағы спортшы. Ол олимпиада жолдамасын Жапонияның Вакаяма қаласында өткен іріктеу жарысында иеленді. Азия чемпионы (2008 жыл, Сингапур), құрылық біріншілігінің жеңімпазы (2009 жыл, Филиппин). Азия ойындарының қола жүлдегері (2010). Олимпиада ойындарына алғаш рет қатыспақ.

Лондон олимпиадасында Юлия Живицаға ресейлік София Великая (төрт дүркін әлем чемпионы), украиналық Ольга Харлан (Пекин олимпиадасының чемпионы) сынды мықты спортшылар қарсылас болады.
  • 16x9 Image

    Руслан МЕДЕЛБЕК

    1990 жылы 4 қаңтарда дүниеге келген.

    Қазақ ұлттық университеті журналистика факультетін "Халықаралық журналистика" мамандығы бойынша тәмамдаған.

    Халықаралық спорт журналистері қауымдастығы мен Халықаралық олимпиада комитетінің жас репортері.

    "Спорт", "Қазақ спорты" газеттерінде, "Алматы" телеарнасында журналист-репортер болған. 2012 жылдан бері "Азаттық" радиосының тілшісі. Сочи - 2014 қысқы және Рио - 2016 жазғы олимпиада ойындарынан тікелей хабар таратты.

    Автормен оның Facebook парақшасында да пікірлесуге болады.

XS
SM
MD
LG