Бірқатар жазушылар мен философтар қазақтың басын біріктіретін ұлттық идея қажет екенін алға тартады. Олар Қазақстан тәуелсіздік алғаннан кейінгі нарық заманында қазақтар тұрмыс-тіршіліктің қамымен жүріп, ұлттық идея туралы ойлауға мүмкіндігі болмады деген пікірде. Философтар Қазақстан мемлекетінің тәуелсіздігін әлемнің 200-ге тарта мемлекеті мойындағанын ескере отырып, ендігі кезекте ұлттың басын біріктіретін ұлттық идеяның болуы шарт дейді.

Бірқатар зиялы қауым өкілдері Болатбек Төлепбергеннің «Ұлттық идея-тәуелсіздік тұғыры» атты кітабында жариялаған ұлттық идеяларға қолдау таныта отырып,  оны БАҚ насихаттауды ұсынып отыр.

Жақында Үкіметтің арнайы Қаулысымен оралмандарды қоныстандыруға арналған көші-қон квотасы тоқтады. ҚР Ішкі істер министрлігі Көші-қон полициясының мәлімдеуі бойынша, бұл Үкіметтің айрықша нұсқауына дейін тоқтатылатын болады. 2011 жылдың 22 желтоқсанында 2011-2014 жылдарға арналған көші-қон квотасы жылына 10 мың отбасы болып бекітілген еді. Қазақстан Үкіметі бұл Қаулының күшін жойып, жаңа нұсқаулық дайындап жатқанын мәлімдеді.

Бүгінгі хабарымызда Көші-қон квотасы неге тоқтатылды, Жаңаөзен оқиғасының бұған қаншалықты қатысы бар және алда Ішкі істер министрлігі дайындап жатқан жаңа бағдарлама қандай болуы керек деген сауалдарға жауап іздедік.