Бұл екі ақын айтыстың екінші күні басталар шақта қазылар алқасының төрағасы Мырзатай Жолдасбеков айтқан сын-ескертпелерден кейін президент Назарбаевты, Астананы және осы қалада өткен ЕҚЫҰ саммитін жырлады. Тек сөз арасында ғана Қазақстанның тәуелсіздігі туралы бірер шумақ айтылды.
Алайда ақындар әзіл сөзге сүйеп, саммиті жерпұшпақтап сынап та алды.
– Армысың, Еркебұланым,
Арманға қанат қақтың ба?
Саммитті өткіземін деп,
Түстің бе алашапқынға?
Елу алты елдің басшысын,
Шабарман, атқосшысын,
Жағдайын жасап күтем деп,
Қас-қабақтарын бақтың ба?
Қымызды судай сапырып,
Шұбаттың дәмін татырып,
Экзотиканы көрсетіп,
Еуропалыққа жақтың ба?
Ту бие тойға сойдырып,
Қазы-қартаға тойдырып,
Ет жемес қонақтарыңды,
Шөп, шаламынан қақтың ба?
Екі күн бойы демалдың,
Дүкен, базарды жаптың да.
Саммитім рахат болды-ау, деп,
Тілекті құдай берді-ау деп,
Көрпеңді орап басыңа,
Ұйқыға әлде баттың ба?
Астаналық досым-ай,
Тәуелсіз күнде осылай,
Снайперлерден сескеніп,
Тығылып үйде жаттың ба?
Шықпаңдар деген пәрмен кеп,
Шығайын десең, дәрмен жоқ.
Еркіндігіңнің бал дәмін,
Екі сағатта таттың ба? – деп жырлаған Қарлығаш Әубәкіроваға қарсыласы Еркебұлан Қайназаровтың жауабы мынандай болды:
– Қарғам-ау, неге сонша басынасың,
Жайым жоқ енді сенен жасыратын.
Саммитті сарсаң қылып жібердің ғой,
Хандардың басы ғана қосылатын.
Мен түгіл мынау ел де үйде отырды,
Дегендей саммит тыныш өтіп алсын.
Бірлігімнің белгісі осы емес пе?
Ешқандай жай болған жоқ шошынатын.
Екі күнге кеткен жоқ ештеңеміз,
Бұған неге басыңды қатырасың.
Бұл Астана - қазақтың үлкен үйі,
Алаштың атын көкке асыратын.
Біз сол үйдің үлгілі баласымыз,
Үлкеннің тілін алып, тосылатын.
Үйіне сыйлы қонақ келген кезде,
Үндемей бір бөлмеде отыратын, – деп жырлады.
Бірақ қазылар алқасының төрағасы Мырзатай Жолдасбеков өткен жылы 1-2 желтоқсанда Астанада өткен ЕҚЫҰ саммиті кезінде астана тұрғындарының жайын сөз еткен ақындардың жырын жоққа шығарды.
– Жаңа Қарлығаш айтып жатыр: біраз кісінің ұғымында "сол саммит болған екі күн осында демалыс берілді, жұрттың бәрі қаладан кетіп қалды, жұмыс істеген жоқ" деген ұғым бар сияқты. Жоқ, олай емес. Мәселен, мәдениет министрлігі және оған қарайтын бүкіл мекемелердің бәрі, Астананың қоғамдық, мәдени ошақтарының бәрі аяғынан тік тұрып қонақ күтті, – деді Мырзатай Жолдасбеков.
Еркебұлан мен Қарлығаштың айтысын мына жерден тыңдай аласыздар: