Шымкентте автокөліктің VIP нөмірлері сатылымға түскен соңғы үш күннен бері бір нөмір саудаланған.
Оңтүстік Қазақстан облыстық ішкі істер департаменті баспасөз қызметінің Азаттық тілшісіне хабарлауынша, Шымкентте автокөліктің VIP нөмірлері сатылымға 20 қазаннан бастап түскен. Соңғы үш күннің ішінде қалада тек қана 007 нөмірі 422 256 теңгеге сатылған.
«20 қазаннан бері сатылымға түсіп жатқан VIP нөмірлердің бірі 007 нөмірін заңды тұлға, яғни жекеменшік фирма сатып алды», − деп хабарлады баспасөз қызметі Азаттыққа.
Қазақстанда 19 қазан күні жол жүрісі туралы жаңа заң күшіне енді. Заңның бір талабы бойынша VIP нөмірлердің бағасы белгіленіп, cатылады.
