Төңкерістен кейінгі Каир
3 шілде күні Египет президенті Мухаммед Мурсиді елдің әскер басшылары қызметінен алып тастады. Президент орнынан кеткен сәтте Каир тұрғындары мерекелік шеруге шықты. Тахрир алаңында фейерверктер атылып, жұрт жеңісін тойлады. Египетте соңғы күндері президентке және оның исламшыл партиясына қарсы шерулер басталған еді. Египет қорғаныс министрі Абдел Фаттах әл-Сиси "президент сайланғанға дейін жарлық шығару құқығы конституциялық сотқа берілетінін, ел билігін уақытша үкімет қолға алатынын" мәлімдеді. Александрия қаласындағы қақтығыстардан үш адам қаза тапқаны хабарланды.