11 желтоқсан күні Гонконг орталығына жүздеген полицейлер келді. Олар көшелердегі наразылар орнатқан баррикадаларды бұзу туралы сот шешімін орындамақ. Көптеген шерушілер наразылық акциялары өткен жерлердегі көрпе-жастықтарын жинап, кетуге әзірленіп жатыр. Бірнеше ай бұрын демонстранттар құрған шатырлар лагерінің ортасында "Біз әлі ораламыз" деген сары баннер ілінген. Мұндай сөздерді наразылар асфальтқа да жазып тастаған. Шерушілер 2017 жылы өтетін Гонконг басшысының сайлауын ашық әрі еркін өткізуді талап етеді. Пекин кандидаттарды алдын ала іріктегісі келеді.