Accessibility links

live Коронавирус пен пневмониядан тағы 6 адам қайтыс болды. Елдегі коронавирус ахуалы қандай?

Covid-19 індеті жайлы әлемдегі және Қазақстандағы ақпараттарды шолып шығыңыз.


Маска таққан әйел. Алматы, қыркүйек айы 2020 жыл.

Негізгі деректер

Әлемде Covid-ке шалдыққандар 43,8 миллион адамнан асты. Бір миллион 165 мың адам қайтыс болды. 29,7 миллион адам аурудан жазылған.

Дүниежүзілік денсаулық сақтау ұйымы Қытайдан тараған бұл вирусты "пандемия" деп жариялаған. Коронавирус жайлы қаңтардың басында белгілі болды. Оны алғаш жұқтырғандар Қытайдың Хубэй провинциясының Ухань қаласында тіркелді. Вирус тыныс алу жолын зақымдап, пневмонияны өршітеді. Бұл дерттің көбіне егде жастағылар мен созылмалы ауруы бар адамдарға салдары ауыр болуы мүмкін.

14:54 15.9.2020

ДДСҰ әлем елдерінің індетпен күресін бағалады

Әлемнің пандемиямен күресі "ұжымдық сәтсіздікке" ұшырап, адамзатқа орны толмайтын зардап әкелді. Дүниежүзілік денсаулық сақтау ұйымының ғаламдық дайындық жөніндегі кеңестің (Global Preparedness Monitoring Board) жаңа есебінде осылай деп жазылған.

14 қыркүйекте жарияланған есепте денсаулық сақтау саласы сарапшыларының жылдар бойғы ескертуіне қарамастан әлем елдерінің індетке дайындыққа аз қаражат жұмсағаны жазылған. Баяндамаға сәйкес, көптеген ел басшылары ғылыми, үздік тәжірибелер мен айғақтарға сүйене отырып, ертерек шешім қабылдау мүмкіндігін жіберіп алған. Соның кесірінен қоғамда "сенімсіздік бойлап, індетке төтеп беру күрделенген".

Былтыр жыл соңында Қытайда пайда болғалы бері коронавирустың жаңа түрі кемінде 29 миллион адамға жұққан, 925 мыңнан астам адам қайтыс болған. Пандемия экономиканы күйретіп, әлеуметтік саланы күйзелтті. Баяндама авторларының есебінше, әлем covid-тің кесірінен 11 трлн доллар шығынға ұшыраған.

Әлем бойынша вирус жұқтырғандардың жартысы - Америкада. АҚШ, Бразилия, Мексика әлемде пандемиядан көбірек зардап шеккен елдердің бірі. 13 қыркүйекте ДДСҰ вирус жұқтырғандар санының бір күнде бұрын-соңды болмаған жоғары көрсеткішке жеткенін хабарлады: 24 сағат ішінде әлемде 307 930 адамнан коронавирус инфекциясы анықталған. Еуропада атап айтқанда, Испания, Францияда соңғы апталарда індеттің өршуі байқалған.

Орталық Азияда бұған дейін Өзбекстан коронавирус жұқтырғандар санының көбейгенін хабарлаған. 10 қыркүйекте бір күнде 749 адамнан вирус табылған. Елде вирус жұқтырғандардың жалпы саны 48 мыңнан асқан, 400 адам қайтыс болған. Коронавирус барын мойындамай келе жатқан Түркіменстанда осыған дейін ауруханалардың толып кеткені, респираторлық ауруға шалдыққандардың күрт ұлғайғаны хабарланған.

Тәжікстанда соңғы ақпарат бойынша, 9 088 адамнан коронавирус табылған, 72 адам қайтыс болған. Қырғызстанда вирус жұқтырғандар 44 999 адамға жеткен, 1 063 адам қайтыс болған. Қазақстанда коронавирусқа ұқсас пневмонияға шалдыққандарды қосқанда вирус жұқтырғандар 136 мыңнан асқан, 2000-нан астам адам қайтыс болған. Қазақстан, Өзбекстан, Тәжікстанда кейбір сарапшылар ресми билік жариялаған коронавирус статистикасына күмән келтіреді.

08:56 15.9.2020

Өткен тәулікте 65 адамнан коронавирус табылды, ШҚО-да науқастар қайта көбейді

14 қыркүйекте Қазақстанда 65 адамнан коронавирус инфекциясы табылды. Бір күнде 209 адам жазылды. Бұл туралы денсаулық сақтау министрлігі хабарлады.

Өткен тәулікте ең көп науқас Шығыс Қазақстан облысында (20) тіркелген. Бір күн бұрын мұнда 11 адамнан covid анықталған еді. Дүйсенбі күні Шымкент қаласы, Жамбыл, Маңғыстау, Қызылорда облыстарында бірде-бір науқас анықталмаған.

Коронавирус жұққан адамды ауруханаға әкелген медицина қызметкерлері.
Коронавирус жұққан адамды ауруханаға әкелген медицина қызметкерлері.

Елде коронавирус жұққаны ПТР-тестімен расталғандар саны 106 920 адамға жетті. Дегенмен бұл статистикаға коронавирус жұққаны ПТР-тестімен расталмаған, бірақ клиникалық белгілері covid-ке ұқсас пневмонияға шалдыққандар саны енгізілмеген. Дүниежүзілік денсаулық сақтау ұйымы (ДДСҰ) екі көрсеткішті біріктіруге кеңес бергенмен Қазақстан билігі екеуін екі бөлек жариялап жүр. ДДСҰ мәліметінше, Қазақстанда наурыз айынан бері 136 500 адам коронавирусқа шалдыққан, кемінде 1 999 адам қайтыс болған.

Осы аптада карантин ережелерінің тағы жеңілдейтіні хабарланды. Енді бизнес нысандары демалыс күндері де істейді. Дегенмен бұған дейін індет өршігендіктен кейбір аймақта (БҚО-да Теректі ауданында, Шымкент, Атырау) карантиннің күшейгені де хабарланған.

Кейбір мамандар коронавирусқа ұқсас пневмонияға шалдыққандар мен covid-пен байланысты адам өлімі азаймай отырған кезде биліктің карантинді жеңілдету туралы шешімін сынаған.

17:57 14.9.2020

Қырғызстан денсаулық сақтау министрлігі covid есебіндегі айырмашылық себебін түсіндірді

Қырғызстан үкіметінің коронавирус статистикасында сәйкессіздіктер анықталды. Денсаулық сақтау министрлігі түсініктеме берді.

Коронавируспен күрес жөніндегі республикалық штаб мәліметінше, 18 наурыз бен 14 тамыз аралығында коронавирус жұққандар 44 928 адам болған, 41 023-і жазылған. 1063 адам қайтыс болған. 2 410 адам емделіп келген. Алайда барлық осы айтылған мәліметті қосқанда 44 496 болып шығады. Бұл штаб жариялаған жалпы мәліметтен 432 адамға аз.

Денсаулық сақтау вице-министрі Бакыт Жангазиевтің айтуынша, коронавирустан қайтыс болғандар статистикасын қайта қараған кезде осындай айырмашылық пайда болған.

"Статистиканы қайта қарап шықтық, сол себепті дерек өзгерді. Бұл адамдар (430 адам өлімі ) коронавирус ауруына шалдыққанмен олардың өліміне басқа аурулар мысалы, инфаркт себеп болған. Сол себепті коронавирус жұқтырғындар дерегіне қосылғанмен, covid-пен байланысты адам өлімі есебіне қосылмаған" деді вице-министр.

18 тамызда Қырғызстан денсаулық сақтау министрлігі коронавирустан қайтыс болғандар санын қайта қарап шыққан. Covid жұққан науқастардың өлімінің себебін зерттейтін арнайы комиссия құрған.

"Комиссия өзге елдердің тәжірибесін зерттеп, 2019-2020 жылдың 7 айындағы адам өлімі дерегін сараптай отырып, бұған қоса covid-ті анықтау және адам өлімін кодтау бойынша Халықаралық әдістемелік кеңеске сүйене отырып, коронавирустан қайтыс болғандардың 437-інің өліміне covid себеп болмаған деген қорытынды жасады" делінген штаб хабарламасында.

Штаб мәліметінше, 358 адамның өліміне – жүрек қан-тамыр аурулары, 24 пайызы – миокард инфарктіден, 13 пайызы ми қан айналым жүйесінің бұзылуынан, 10 пайызы – бүйрек жетіспеушілігі, 32 пайызы өзге себептерден (суицид, онкологиялық т.б аурулар) қайтыс болған.

11:45 14.9.2020

Батыс Қазақстан облысындағы ауылда індет қайта өршіп, карантин күшейтілді

Батыс Қазақстан облысы Теректі ауданының әкімшілік орталығы Федоровка ауылында карантин күшейтілді. Соңғы аптада бұл ауылда он адамнан коронавирус табылған.

12 қыркүйектен бастап елді мекенде азық-түлік және азық-түлік емес базарлар, сауда орталықтары жабылған. Қоғамдық тамақтану орындарының жұмыс істеуіне тыйым салынған. Тек сыртта орындары бар 30-дан аспайтын шағын дәмханалар ғана жұмыс істеп жатыр. Тұрғындар мейрамхана, дәмхана, асханалардан тамақты тек сатып алып кете алады. Азық-түлік дүкендері ашық.

Билік спорт алаңдары, саябақтар мен алаңдарды жапқан. Қоғамдық көлік жұмысының уақыты да шектелген. 65 жастан асқан адамдарға көшеге өте қажет жағдайда ғана шығуға кеңес берілген.

Жабылған базар.
Жабылған базар.

Батыс Қазақстан облысында ресми статистика бойынша, наурыз айынан бері 6 809 адамнан коронавирус табылған, 100 адам қайтыс болған. Коронавирусқа ұқсас пневмонияға қанша адамның шалдыққаны белгісіз. Денсаулық сақтау министрлігі аймақтағы жағдай туралы жеке мәлімет беруге уәде бергенмен әзірге уәдесін орындамады.

Санитар мамандар облыстағы эпидемиологиялық ахуалды "салыстырмалы түрде тұрақты" деп бағалайды.

Коронавирус жұқтырғандар санының азаюына байланысты билік 17 тамыздан бастап шілде айының басында енгізген карантин шараларын жеңілдете бастаған еді.

Батыс Қазақстан облысы вирус жұқтырғандар саны жағынан республикада бесінші орында (Алматы және Нұр-Сұлтан қалалары және Атырау, Қарағанды, Шығыс Қазақстан облыстарынан кейін) тұр.

Соңғы мәлімет бойынша, елде коронавирус пен covid-ке ұқсас пневмонияға шалдыққандар саны 136 513 адамға жеткен. Кемінде 1999 адам қайтыс болған.

Тағы

ПІКІРЛЕР

XS
SM
MD
LG