Коронавирустың тағы бір мутациясы шықты. Жаңа штамм Ұлыбритания, АҚШ секілді бірнеше елден анықталған
Коронавирустың B1525 деп аталған жаңа түрі Ұлыбритания мен АҚШ секілді бірнеше елден анықталып отыр. Бұл туралы Эдинбург университетінің зерттеушілеріне сілтей отырып, Guardian басылымы хабарлады. Жаңа штамм алғаш рет желтоқсан айында Ұлыбритания мен Нигерияда тіркелген.
Ғалымдардың сөзінше, коронавирустың жаңа түрі желтоқсан айының ортасында Ұлыбританияда тарай бастаған B117 штамына ұқсас, бірақ оның антиденелерге төзімділігі жоғары. Вирустың жаңа нұсқасымен Ұлыбританияда кемі 32 адам, Данияда – 35, Нигерияда – 12 адам тіркелген. АҚШ, Франция, Гана, Австралия, Канада, Иордания және Испания елдерінде бірнеше адамнан анықталған.
Коронавирустың мутациялары былтырғы күзден бастап үлкен мәселеге айналып отыр. Ғалымдар сол кезде Ұлыбританияда SARS-CoV-2 вирусының жұқпалығы жоғарырақ нұсқасы анықталғанын хабарлаған.
Содан кейін ОАР-да тағы бір штамм пайда болды. Сынақ AstraZeneca және Pfizer вакциналарының жаңа штамға қарсы тиімділігі төмен екенін көрсеткен. Осыдан соң ОАР AstraZeneca вакцинасын өндіретін үндістандық компанияға жүгініп, 1 миллион дозаны қайтарып алуды сұраған деп жазды Economic Times басылымы шенеуніктерге сілтей отырып.
Күнделік тіркелетін Covid науқастарының саны бесінші апта қатарынан төмендеп келеді. Бұл туралы Дүниежүзілік денсаулық сақтау ұйымының бас директоры Тедрос Гебрейесус мәлімдеді. Жыл басында аптасына бес миллион адам тіркеліп жатса, қазір бұл көрсеткіш екі миллионға дейін төмендеген.
Джонс Хопкинс университетінің мәліметінше, індет басталғалы әлемде 109 миллионнан астам адам коронавируспен тіркелген. Оның 2,4 миллионнан астамы көз жұмған.
Коронавирус дерегі: 692 науқас, 8 өлім тіркелді
16 ақпан күні Қазақстан денсаулық сақтау министрлігі ПТР тестімен расталған коронавируспен 686 науқас, 6 өлім, коронавирус пневмониясымен 6 науқас, 2 өлім тіркелгенін хабарлады. ПТР тестімен расталған науқастардың дерегі 15 ақпан үшін, коронавирус пневмониясы дерегі 14 ақпан үшін беріліп отыр.
ПТР тестімен расталған коронавирус науқастарының аймақтар бойынша саны мынадай:
Нұр-Сұлтан қаласында -23884 (+53 науқас жаңадан қосылды),
Алматы қаласында – 23745 (+107),
Шығыс Қазақстан облысында – 21252 (+85),
Атырау облысында – 16736 (+25),
Павлодар облысында – 16411 (+80),
Қарағанды облысында – 14778 (+30),
Ақмола облысында – 12709 (+72),
Батыс Қазақстан облысында – 12171 (+47),
Солтүстік Қазақстан облысында - 11882 (+37),
Қостанай облысында – 11506 (+71),
Алматы облысында – 10180 (+49),
Шымкент қаласында – 6016 (+7),
Жамбыл облысында – 5772 (+8),
Түркістан облысында – 4219 (+4),
Маңғыстау облысында – 4165 (+3),
Ақтөбе облысында – 4102 (+4),
Қызылорда облысында – 3731 (+4).
Осылайша, ПТР тестімен расталған коронавирус науқастарының жалпы саны 203 259 адамға жетіп отыр. Ресми дерек бойынша, оның 2652-сі коронавирус ауруынан қайтыс болған. Бұл статистикаға коронавирус жұқтырғаны расталған, бірақ "ілеспе аурудан қайтыс болды" деген жүздеген адам кірмей қалған.
Қазақстан үкіметі ПТР тесті теріс нәтиже көрсеткен, бірақ ауру белгілері бойынша коронавирусқа ұқсайтын пневмония есебін 1 тамыздан бастап жүргізіп келеді. Содан бері пневмонияның бұл түрімен барлығы 48 700 науқас тіркелген. Оның 602-сі қайтыс болған.
Денсаулық сақтау министрлігінің дерегінше, қазір барлығы 22 733 адам емделіп жатыр. Оның 5090-ы стационарда, 17 643-і амбулаториялық бақылауда. 255 науқастың жағдайы ауыр, 47 науқастың жағдайы өте ауыр. 38 науқас өкпені желдету аппаратына қосылған.
Қазақстан ресейлік "Спутник V" екпесінің Қарағандыда әзірленетін нұсқасын мақұлдады
Қазақстан ресейлік "Спутник V" вакцинасының Қарағандыда өндірілетін нұсқасын тіркеді. Бұл туралы коронавируспен күрес жөніндегі ведомствоаралық комиссия хабарлады.
"Қарағанды фармацевтика кешені (ҚФК) коронавирус инфекциясына қарсы "Гам-КОВИД-Вак" ("Спутник V") дейтін вакцинаны Қазақстан аумағында тіркеу процедурасын аяқтады" делінген комиссия хабарламасында.
Ведомствоаралық комиссияның хабарлауынша, ҚФК Қазақстан денсаулық сақтау министрлігі сараптамалық ұйымының вакцина қауіпсіздігі, сапасы және тиімділігі жөніндегі қорытындысын 13 ақпан күні алған.
"Осы қорытынды негізінде Қазақстан денсаулық сақтау министрлігі медициналық және фармацевтикалық бақылау комитетіне тіркеу куәлігін алу жөнінде өтініш жолданды" делінген хабарламада.
Осылайша, Қазақстан "Спутник V" екпесін қолдануды мақұлдаған 27-ел атанды.
Осы күнге дейін екпені Ресейден өзге Беларусь, Аргентина, Сербия, Алжир, Парагвай, Түркіменстан, Венгрия, БАЭ, Иран секілді елдер мақұлдаған.
Қазақстан ресейлік вакцинаны ресми тіркеуден өткізбей тұрып-ақ сала бастаған. Жалпыұлттық вакциналау 1 ақпанда басталды. Биліктің мәлімдеуінше, ҚФК ақпанның соңына дейін Қазақстан өңірлеріне "Спутник V" вакцинасының 90 мың дозасын жеткізбек.
Перу сыртқы істер министрі Covid екпесін кезектен тыс алғаны үшін отставкаға кетті
Жексенбі, 14 ақпан күні Перу сыртқы істер министрі Элизабет Астете Covid екпесін кезектен тыс қабылдағаны үшін отставкаға кететінін мәлімдеді. Өзінің айтуынша, ол қытайлық Sinopharm компаниясының екпесін елде клиникалық сынақ өтпей тұрып және жалпыұлттық вакциналау бағдарламасы басталмай жатып салдырып алған.
Қызметіне былтырғы қарашада тағайындалған Астете вакцинаны 22 қаңтар күні алғанын, екпені қытайлық вакцинаны сынақтан өткізуге жауапты Каэтано Эредиа университеті ұсынғанын айтты.
"Қандай ауыр қателік жасағанымды түсініп отырмын. Сол себепті вакцинаның екінші дозасын қабылдамайтын болдым. Осыны алға тартып, президентке отставка жөнінде өтініш бердім" деп жазды ол Twitter-де.
Бір күн бұрын ел президенті Франциско Сагасти вакцина төңірегіндеу өзге бір дауға байланысты денсаулық сақтау министрі Пилар Маццеттидің отставкасын қабылдағанын мәлімдеген. Мәселе Перудің экс-президенті Мартин Вискарраның кезектен тыс вакцина алуынан туған.
Былтыр қарашада жемқорлық айыбымен қызметінен кетірілген Вискарра екпе салдыру үшін кезектен аттамағанын, вакцинаны сынақ аясында алғанын айтқан. Бірақ жергілікті басылымдар экс-президенттің түсініктемесіне күдік келтірді деп жазды Reuters агенттігі.
Қаңтар айының басында Перу үкіметі қытайлық Sinopharm компаниясымен вакцинаның 38 миллион дозасын сатып алу жөнінде келісімшарт жасасқан. Өткен аптада осы келісімшарт аясында тапсырыстың 300 мың доза көлеміндегі алғашқы бөлігі жеткізілген. Ал вакциналау бағдарламасы өткен аптаның сейсенбісінде ғана басталған. Екпені бірінші болып вирусты медқызметкерлерге сала бастады.
Джонс Хопкинс университетінің мәліметінше, індет басталғалы Перуде 1,2 миллион адамның Covid инфекциясын жұқтырғаны расталған. Оның 43,7 мыңы көз жұмған.
ПІКІРЛЕР