Шілденің 25-і күні таңсәріде бес жасар Хувайдо Тиллозоданың сүйегін Ресейден Тәжікстанға ұшақпен жеткізді. Мәскеу облысындағы Серпухов қаласында кісі қолынан мерт болған баланың ата-анасы, Тәжікстанның еңбек, миграция және жұмыспен қамту министрлігінің өкілдері де осы ұшақпен келді деп хабарлайды Азаттықтың Тәжік қызметі. Хувайдоны сәрсенбі күні Куляб қаласындағы зиратқа қояды.
Өткен жексенбі күні Серпухов қаласындағы үйінің ауласынан жоғалып кеткен кішкентай қыз дүйсенбі күні таңертең өлі табылған. Сот-медициналық сараптамасы қылмыскердің баланы зорлап, кейін пышақтап өлтіргенін анықтаған.
Тәжікстан сыртқы істер министрлігі Серпухов қаласында кісі қолынан мерт болған кішкентай тәжік қызының өліміне байланысты Ресей сыртқы істер министрлігіне нота жіберді. Онда Душанбе Ресей билігін "баланы айуандықпен өлтіру қылмысын мұқият тергеп, жауыздыққа барған қылмыскерді қатаң жазалауға" шақырған.
"Тәжікстан Республикасы мен Ресей Федерациясының дипломатиялық және консулдық мекемелері қылмыс толық тергеліп, үкім шыққанға дейін Ресейдің тиісті органдарымен үнемі байланыста болады", - делінген мәлімдемеде.
Бес жасар тәжік қызы Хувайдо Тиллозода шілденің 23-і күні таңертең Мәскеу облысындағы Серпухов қаласының теміржол станциясына жақын жерден өлі табылған. Хувайдоның әкесі Абдусалом Саидов Азаттық радиосына қызына сот-медицина сараптамасы жасалғанын айтты.
Абдусалом Саидовтың айтуынша, Хувайдоны өлтіру ісі бойынша қылмыстық іс қозғалған. "Тергеушілер әйелім екеумізден бірнеше рет жауап алды", - дейді қыздың әкесі.
Ресейлік басылымдардың хабарлауынша, бес жасар Хувайдо Тиллозода шілденің 22-сі күні отбасы тұратын үйдің ауласында ойнап жүргенде жоғалып кеткен. Баланы бірнеше сағат іздеп, төңіректің бәрін шарлап шыққанмен таба алмаған. Тек дүйсенбі күні зауыттың теміржол тармағы өтетін тұсында тастап кеткен спорт сөмкесінің ішінен кісі қолынан өлген қыздың денесі табылған. Сот-медициналық сараптама көрсеткендей, қызды әуелі зорлап, кейін пышақтап өлтірген.
Ресей тергеу комитетінің Мәскеу облысы бойынша басқармасы бұл қылмысқа күдікті ретінде 28 жастағы жергілікті тұрғын Александр Семиннің ұсталғаны туралы хабарлады.
Тергеушілер оның пәтерінен қыздың аяқ киімі мен саусақ іздерін тапқан. Бір болжам бойынша, аулада ойнап жүрген қызды күдікті ойыншықпен алдап шақыруы мүмкін.
Тағы бір долбар бойынша, дүкенге асыққан әжесі қызды қараусыз қалдырған. Әкесінің айтуынша, өзі дүкенге кеткенде, ал әйелі кіші қызын қарауға айналғанда әлдекім Хувайдоны ұрлап әкеткен.
"Кешкі сағат бестің шамасы болатын. 5-10 минуттың ішінде ұрлап кетті... Денесін таңғы сағат төртте тапты", - деді Азаттыққа Абдусалом Саидов.
Кісі қолынан мерт болған Хувайдо Тиллозода туралы фотогалерея:
Душанбеге Ресейде өлтірілген бес жасар тәжік қызының сүйегін жеткізді
Тәжікстанның Куляб қаласының тумасы Абдусалом Саидов бірнеше жылдан бері отбасымен Ресейдің Серпухов қаласында тұрады. Шілденің 24-і күні Тәжікстанның Ресейдегі елшілігі Хувайдо Тиллозоданың сүйегін атамекеніне жеткізу үшін қажетті құжаттарды толтырып, рәсімдегенін хабарлады. "Қыз бала жоғалып кеткен сәттен бастап елшілік оқиғаны назарда ұстады. Елшіліктің екі қызметкері Хувайдоның ата-анасының жанында бірге болып, қажетті көмектер көрсетті", - деп хабарлады Тәжікстанның Мәскеудегі дипломатиялық өкілдігі.
Қыршынынан қиылған қыздың әкесі Абдусалом Саидов бір аптадан соң Ресейге оралып, қызын өлтірген адамға ең қатаң жазаға тарту үшін қолдан келгеннің бәрін жасауға тырысатынын айтты.