Accessibility links

Желтоқсан оқиғасы


Желтоқсан оқиғасы

1986 жылы желтоқсанның 16-сы күні Қазақ ССР коммунистік партиясы орталық комитеті басшылығынан Дінмұхаммед Қонаев алынып, орнына Ресейдің Ульянов облыстық партия комитетінің бірінші хатшысы болып істеген Геннадий Колбин тағайындалды. Шешімге наразылық білдірген студент және жұмысшы қазақ жастары желтоқсанның 17-сі күні таңертең Алматыдағы Брежнев алаңына (қазіргі Республика алаңы) шықты. Түрлі деректерде алаңға ондаған мың жастардың шыққанын жазады. Олар биліктен басшыны жергілікті халықтың пікірін ескеріп тағайындауды талап етті. Мәскеу шешіміне наразылық сол күндері Қазақстанның өзге қалаларында да болған.

Қазақстанның жаңа тарихына "Желтоқсан оқиғасы" деген атаумен енген қазақ жастарының наразылық шеруін совет билігі күшпен басып-жаныштады. Көптеген адам оқудан шығарылып, жұмыстан қуылды. 99 адам әртүрлі мерзімге сотталды, екі адам ату жазасына кесілді. Қазақстан 1991 жылы тәуелсіздігін жариялаған соң Желтоқсан оқиғасына қатысқандардың барлығы ақталды. Қоғам белсенділері Желтоқсан оқиғасы салдарынан мерт болған Ләззат Асанова, Ербол Cыпатаев, Қайрат Рысқұлбеков және өзге марқұмдарға құран бағыштап, жыл сайын оқиға өткен Алматыдағы алаңда еске алу шараларын өткізеді.

XS
SM
MD
LG