Атырау облысында әскери билет алғысы келетін жастарға арналған ақылы курс ашылды деп хабарлайды BNews агенттігі.

Енді бұрын әскер қатарында болмаған, 22-27 жас аралығындағы ер азаматтар 210 мың теңге төлеп, 24 күн бойы әскери казармада тұрып, сапта жүру мен дене жаттығуларына машықтанып, қарудан атуды және әскери техниканы жүргізуді меңгерген соң облыстық әскери басқармаға сынақ тапсыратын болады.

Сынақтан сүрінбей өткендерге әскери билет пен тиісті сертификат табыс етіледі, бірақ әскери шен берілмейді. Әскери билетке ие болғандар келісім-шарт бойынша әскери бөлімдерге, полиция мекемесі мен өртке қарсы күрес қызметіне жұмысқа орналаса алады деп хабарланды.

Қазақстан үкіметінің биыл ақпанда қабылдаған №118 қаулысына сәйкес жаңадан ашылған бұл курсқа ай сайын 30 тыңдаушы қабылдау жоспарланған.

Батыс Қазақстан облысының қылмыстық істер жөніндегі ауданаралық мамандандырылған сотында терроризм айыбы тағылған үш ер адамның үстінен қозғалған іс бойынша жабық сот процесі басталды деп хабарлайды BNews агенттігі.

Облыстық соттың баспасөз қызметінің жұма күні берген ақпаратында сот процесінің нақты қай күні басталғаны көрсетілмеген. Тек әлгі үш азаматқа қарсы қылмыстық кодекстің 233 («Террорлық топтың қызметіне немесе ол жасаған террорлық актілерге қатысу») және 179 («Топтасып қарақшылық жасау») баптары бойынша айып тағылғаны айылған.

Ал террорлық топтың жетекшісі Қазақстаннан тыс жерде деп хабарлайды Батыс Қазақстан облыстық сотының баспасөз қызметі.

Бүгіннен бастап Тәжікстан мемлекеті ресми түрде дүниежүзілік сауда ұйымының мүшесі атанды.

Халықаралық ұйымға мүше болу туралы өтінішін Душанбе 2001 жылы мамырда берген. Соңғы 12 жылдың көлемінде ДСҰ-ға мүше елдермен сыртқы сауда, инвестиция және кедендік баж алымына қатысты келіссөздер жүргізілді.

Тәжікстанның ДСҰ-на мүше болатыны туралы былтыр 10 желтоқсанда ел президенті Эмомали Рахмон мен ДСҰ-ның бас директоры Паскаль Лами қол қойған хаттаманы тәжік парламенті биыл қаңтардың 9-ында бекіткен еді.

Тәжікстан дүниежүзілік сауда ұйымына мүше болып қабылданған 159-шы мемлекет. Бұған дейін бұрынғы советтік елдерден алғаш болып 1998 жылы Қырғызстан, одан кейін Латвия (1999), Эстония (1999), Грузия (2000), Литва (2001), Молдова (2001), Армения (2003), Украина (2008) және Ресей (2012) ДСҰ-на мүшелікке қабылданды.

1995 жылы құрылған дүниежүзілік сауда ұйымы мемлекеттер арасындағы сауда және тарифтік келісімдерді халықаралық деңгейде реттейді.

Бүгін Алматы қаласының орталық алаңдарының біріне шыққан бірнеше әйел флэш-моб өткізді. Кейбірі кішкентай бала ерткен, сырт киімнің үстінен «Біз босанғымыз келеді», «Өзіңді тонауға жол берме», «Біз күресеміз» деген жазуы бар ақ жейде киген әйелдер шара барысында «Мемлекетке көмектесіңізші!» деген сөздермен көшедегі жүргіншілерден қайыр сұрап, Қазақстан үкіметі мен еңбек және халықты әлеуметтік қорғау министрін әжуалайтын ән шумақтарын қосылып айтты.

Бір сағатқа жуық созылған флэш-моб барысында жиналған 9 мың теңге ақшаны әйелдер Қазақстанның еңбек және әлеуметтік қорғау министріне жолдайтындарын мәлімдеді. ($1=150T)

Биыл ақпанның 17-сінен бастап Қазақстанда айлығы 186 мың теңгеден асатын әйелдерге жүктілік пен бала тууға байланысты берілетін бір реттік төлемді бұрынғы мөлшерінен қысқартуды көздейтін заң өзерісі күшіне енді. Бұған наразылық білдірген жүкті әйелдер Астана мен Алматыда көпшілік шаралар ұйымдастырып, бұл мәселеге қоғамның назарын аударды. Олардың бір тобы бұдан екі апта бұрын Астанада еңбек министрімен де кездесті.

Ресми ақпарат бойынша, Қазақстанда әлеуметтік сақтандыру қорына ақша аударатын 2 миллион 800 мың әйелдің 1,2 пайызы ғана 186 мың теңгеден көп айлық алады.

Сенбі күнгі шарадан Азаттық тілшісі түсірген видео:

АҚШ-тың Техас штатының билігі америкалық отбасы Ресейден асырап алған үш жасар Макс Шаттоның (Максим Кузьмин) өліміне оқыс жағдай себеп болған деген ресми мәлімдеме жасады.

Аймақтық прокуратураның өкілі Бобби Бланд баланың сүйегіне сараптама жасаған төрт дәрігердің әлгіндей ортақ қорытынды шығарғанын айтты. Ал баланың денесіндегі көгерген дақтарды оның «мінез-құлқы бұзылған» кезінде өзін өзі ұстай алмауының салдарынан болған деп түсіндірген дәрігерлер.

Бобби Бланд баланың ажалына ішінде қан тамырының жарылып кетуі себеп болғанын, баладан алынған қан құрамынан ешқандай дәрінің ізі табылмағандығын айтты.

Прокуратура өкілі баланың өліміне байланысты жаңадан айыптар тағылуы мүмкін екендігін де жоққа шығармады.

Есімін Макс Шатто деп өзгерткен ресейлік Максим Кузьмин атты бала өзін асырап алған америкалық ата-анасының Техастағы үйінде қаңтардың 21-і күні қаза тапты. Оның өлімі АҚШ-Ресей арасындағы бала асырап алу мәселесінің алдыңғы қатарға шығуына себеп болды. Ресей президенті жанындағы бала құқығы жөніндегі уәкіл Павел Астахов Шаттоны асырап алған ата-анасы оған психотроптық дәрілер берген деп айыптаған еді.

Бүгіннен бастап Қазақстанда кейбір шетелдік телеарналардың трансляциясы тоқтатылады деп хабарлады Tengrinews сайты.

Осыдан тура бір жыл бұрын қабылданған «Телерадиохабарлар тарату туралы» заңға сәйкес, 2013 жылы наурыздың 1-іне дейін Қазақстанның мәдениет және ақпарат министрлігінде қайта тіркеуден өтпеген шетелдік телерадиоарналардың хабарларын Қазақстанда таратуға тыйым салынады. Министрліктің ақпарат және мұрағаттар комитетінің мәліметі бойынша, 2013 жылдың 1 наурызында есепке қойылған шетелдік телеарналардың саны 159 деп көрсетілген.

Қазақстанда кабельдік телехабар таратушы оператор қызметін көрсететін «Digital TV» компаниясының басшысы Қуат Бахридинов көптеген шетелдік телеарналар Қазақстандағы көрермен аудиториясын азсынатындықтан тиісті есепке тұруға құштарлық танытып отырған жоқ дейді. Оның айтуынша, бүгіннен бастап Russia Today, Bloomberg, World Fashion Channel, Союз және басқа телеарналардың хабарларын тарату доғарылады.

Бұған дейін Қазақстандағы оператор компаниялардың басшылары мәдениет және ақпарат министрлігінен шетелдік телерадиокомпанияларды есепке алу мерзімін 2013 жылдың қыркүйек айына дейін ұзартуды сұраған еді. Шетелдік бұқаралық ақпарат құралдарын есепке қоюдың мемлекеттiк қызмет стандарты 2013 жылы қыркүйектің 12-інде қабылданған.

Ақмола облысында қар құрсауынан жолда тұрып қалған 700-ден астам адамға жәрдем көрсетілді деп хабарлайды «Қазақстан жаңалықтары» агенттігі.

Бүгін облыстық ішкі істер департаменті берген ақпарат бойынша, наурыздың 1-і күні Бурабай курортының маңында 500 автокөлікте 700-дей адам қар басқан жолдың бойында тұрып қалған. Жергілікті билік орындары оларға ыстық тамақ беруді ұйымдастырып, 70 бала мен әйелді жол бойындағы кафелерге жеткізген.

Астана-Бурабай жолын қардан тазалауға 27 арнайы машина шыққанымен, қарлы боран күрелген жолды лезде қайта жауып, жұмысқа қиындық туғызған. Техника әзер дегенде жолдың бір жақ бөлігін қардан тазартқан соң жол полициясы 200 автокөлікті бастап алып жүріп, сенбінің түнінде Астанаға жеткізген деп хабарлайды облыстық полиция департаментінің баспасөз қызметі.

Наурыздың 2-і күні ауа-райының қолайсыздығына байланысты Шығыс Қазақстан облысында да бірқатар автокөлік жолдары жабылды деп хабарлайды «Қазақстан жаңалықтары» агенттігі.

АҚШ президенті Барак Обама бюджеттің шығыс бөлігін 85 миллиард долларға қысқарту туралы жарлыққа қол қойды.

Енді 1 қазанға дейінгі бюджеттің шығыс бөлігінде әскери мақсаттарға арналған қаржы 46 миллиард долларға азаяды. Сонымен бірге, денсаулық сақтау және өзге де азаматтық салаларға арналған ақшамен бірге елде 750 мыңға жуық жұмыс орнының қысқартылатыны туралы айтылды.

Бұл қысқарту «бүкіл экономикаға ауыр соққы болып тиетінін» атап өткен президент Обама бюджет мәселесіне қатысты өзінің бастамасына тосқауыл қойған республикалық партия өкілдерін сынға алды.

Бұған дейін АҚШ конгресіндегі демократиялық партия мен республикалық партия өкілдері бюджетті қысқартуға қатысты даулы мәселеде өзара мәмілеге келе алмаған еді. Обаманы қолдайтын демократтар дәулеті 1 миллион доллардан асатын адамдарға табыс салығын ұлғайтуды ұсынды, ал бұған қарсылық білдірген республикашылдар әлеуметтік салаларға шығындарды азайтқан дұрыс деп санайды.

Бюджетті қысқарту мемлекеттік қарызға байланысты мәжбүрлі қадам болып отыр. Қазіргі кезде АҚШ-тың мемлекеттік қарызы 11.7 триллион долларды құрайды.

Мемлекеттік телеарнадан сөйлеген Венесуэла вице-президенті Николас Мадуро президенті Уго Чавестің денсаулығының "тым ауыр екенін" мәлімдеді. Бірақ ол Чавестің жағдайы туралы нақты ашып ештеңе айтпады.

Чавес өткен жылдың желтоқсанында Кубада қатерлі ісікке қарсы төртінші рет операция жасатқан соң ақпанда елге оралған еді.

Уго Чавес өткен жылдың қазанында тағы да алты жылға президент болып қайта сайланған еді.

Бангладеште сот "әскери қылмыс жасады" деген айыппен мұсылмандар жетекшісіне үкім шығарған соң басталған наразылық пен зорлық-зомбылықтан 15 адам мерт болды.

Дакка соты бейсенбіде оппозициялық "Жамаат е-Ислами" партиясының вице-президенті, 73 жастағы Делуар Хуссейн Сайедиді "1971 жылы Бангладештің Пәкістаннан тәуелсіздік алу жолындағы соғысы кезінде жасаған қылмыстары үшін" өлім жазасына кескен еді. Оған "жаппай кісі өлімі, зорлық-зомбылық көрсету, тонаушылыққа қатысы бар және үнділерге исламды күштеп қабылдатты" деген айыптар тағылған.

Полицияның хабарлауынша, бірнеше қалада партия жақтастары ұйымдастырған наразылық шарасы полициямен қақтығысқа ұласқан. Сайеди 2010 жылдың маусымында тұтқындалған. Ол - содан бері әскери қылмыстары үшін сотталған үшінші адам. Оппозиция сотты "саяси есеп айырысу" деп атады, ал құқық қорғау ұйымдары соттың әділ өткеніне күмән келтіреді.

Бүгін Алматының Бостандық ауданында сот шешімімен жабылған оппозициялық "Голос республики" газетін шығаратын Данияр Молдашевтың ағасы Асқар Молдашевқа қатысты сот үкімі шықты. Азаттық тілшісінің хабарлауынша, судья Елена Кван Асқар Молдашевты "заңсыз ірі көлемде психотроптық заттарды сақтады" деп айыптап, 4 жылға шартты түрде соттауға, оның 3 жылын сынақ мерзімі етуге үкім шығарған.

Асқар Молдашев 2012 жылдың 31 қазанында тұтқындалған еді. Әуелде оны жоғарыдағы айыптың ауыр тармақтары бойынша айыптап, іс Алматының қылмыстық істер бойынша мамандандырылған ауданаралық сотына алқа билер қарауына жіберілген. Бірақ ол сот Асқар Молдашевтың ісін тергеуге жіберген. Тергеуге дейінгі процесте оған тағылған айып аздап өзгерген.

Асқар Молдашев өзіне тағылған айыпты жоққа шығарады. Ал оның адвокаты Инессе Киселева үкіммен келіспейді. Ол үкімге шағым жасауды қарастыратындарын айтады.

Атырау облыстық дін істері жөніндегі департаментінің бас маманы Нұралы Қайранбаевтың айтуынша, былтыр діни бірлестіктерді қайта тіркеу кезінде алты мешіт жабылған.

- Атырау облыстық ұлттық қауіпсіздік комитеті департаментінің мәліметі бойынша, 1300 адам дәстүрлі емес діни көзқарасты, соның шінде салафизм мен уаххабизм бағыттарын ұстанады, - деді Қайранбаев.

Нұралы Қайранбаев қазір аймақта 39 діни бірлестік қызмет ететінін айтты.

Атырау облысының орталық «Иманғали» мешітінің наиб имамы Еркебұлан Қарақұловтың айтуынша, жалпы алғанда облыстағы діни ахуал "тұрақтаған". "Теріс ағымда жүрген 27 адам ханафи мәзхабын қабылдады" дейді ол.

Еркебұлан Қарақұловтың пікірінше, облыстағы "теріс ағымдар шетелден қаржы алады және ол қаражат ресми діни орталықтарға қарсы жұмыс істеуге бағытталады".

Ирак астанасы Бағдадтың маңындағы шииттер тұратын ауданда бейсенбіде бірнеше жарылыс болып, 22 адам қаза тапты. Ондаған адам жараланды.

Ресми орындардың хабарлауынша, Бағдадтың солтүстік-батысындағы Шула ауданында мейрамхана мен футбол алаңы маңында екі бомба жарылып, одан 15 адам жараланған.

Басқа жарылыстар Бағдадтан оңтүстікке қарай орналасқан шағын қалалар - Азизия, Махмудия және Шурта әл-Рабияда болды. Шабуылдарды әзірге ешкім мойнына алған жоқ.

Бүгін мыңдаған сүнниттер Ирак премьер-министрі Нури әл-Маликиге қарсы акция өткізуді жоспарлап отыр.

Сүнниттер бойы шииттер басқаратын үкімет бізді кемсітіп отыр деп, екі айдан бері наразылық танытып келеді.

АҚШ мемлекеттік хатшысы Джон Керри Вашингтонның сириялық көтерілісшілерге көмек көрсетуге ниетті екенін мәлімдеді. Ол жәрдем азық-түлік және дәрі-дәрмек түрінде берілмек.

Римде "Сирия достары" тобының жиыны аяқталған соң сөйлеген Джон Керри АҚШ Сирияның азаматтық оппозициясына 60 миллион АҚШ доллары көлемінде көмек беретінін де айтты.

Италиядағы келіссөздерге Сирия ұлттық оппозициялық коалициясының жетекшілері, Сирия оппозициясына қолдау көрсететін Еуропа және араб елдерінің өкілдері қатысты.

Керри Вашингтонның Башар Асадқа осылай қысым көрсетіп, елдің демократияға өтуіне жағдай жасауды көздеп отырғанын айтты. Ол "Башар Асадтың уақыты таяды, ол биліктен кетуі керек" деп мәлімдеген.

Жиын барысында Джон Керри Сирия ұлттық оппозициялық коалициясының басшысы Муаз әл-Хатибпен кездесті.

Рим папасы ХVІ Бенедикт бейсенбіде ресми түрде қызметінен кетті. Сегіз жылға жуық уақыт папа тағында отырған ол тікұшақпен Ватиканнан Римнің маңындағы Кастель-Гандольфодағы папалардың жазғы сарайына аттанды.

85 жастағы понтифик "денсаулығына байланысты" қызметінен кететіні туралы 11 ақпанда жария еткен еді. Ол 600 жыл ішінде қызметінен "денсаулығына байланысты" бас тартқан алғашқы папа болып отыр. Осы айда жаңа папа сайланғанға дейін папа міндетін Бенедиктің орынбасары, кардинал Тарчизио Бертоне атқарады.

Кардиналдармен қоштасу жиынында Бенедикт өзінің ізбасарына "толықтай бағынатынын" айтты. Ол кардиналдарды жаңа папа сайлауда ауызбіршілік танытуға шақырды.

Дүниежүзінде шамамен 1 миллиард 200 миллион адам католик дінін ұстанады.

Алматы қаласында бірқатар ақпарат құралдарының жабылуы мен қызметін тоқтату туралы судьялар мен сот төрағалары өткізіп жатқан брифингке "Панорама", "Жас Алаш" газеттерінің және Гүлжан Ерғалиева басқаратын Nuradam.kz сайтының журналистерін кіргізбей қойды деп хабарлайды Азаттық тілшісі.

Алматы қалалық сотында түстен кейін Алматы қалалық соты кассациялық алқасының судьясы Шолпан Құрманбекова, судья Гүлмира Бейсенова, Бостандық және Медеу аудандық соттарының төрағалары бірқатар оппозициялық ақпарат құралдарының жабылуына қатысты жиын өткізіп жатыр.

Брифинг "Взгляд" газеті, "К-плюс" телеарнасы мен оларды қайталайтын интернет ресурстары, "Голос республики" басылымы мен басқа да бірқатар оппозициялық басылымдардың жабылуына арналған. Жиында Guljan.org сайты қызметінің 3 айға тоқтатылғаны жайлы да айтылады делінген баспасөз хабарында.

Франция президенті Франсуа Олланд бүгін Мәскеуде Ресей президенті Владимир Путинмен кездесіп жатыр. Кездесу алдында Олланд ресейлік ақпарат құралдарын Путинмен кездесуінда талқыланатын мәселелер жайлы хабардар етті.

Олланд "Эхо Москвы" радиосына Путиннен Ауғанстаннан Франция әскері мен әскери техникаларын шығаруда көмек сұрайтынын білдірді. "Голос России" радиосына сұхбатында Путинді Францияның Сириядағы топтарға қару-жарақ жеткізуге қойылған эмбаргоны бұзбайтынына сендірмек екенін айтты.

Олланд кездесуде Сирия дағдарысын реттеу жолдары табылатынынан үмітті екенін де жасырмады.

Кремль таратқан ақпаратта күн тәртібінде Еуропа Одағы мен Ресей арасындағы ынтымақтастық, заңсыз есірткі айналымымен және терроризммен күрес мәселелері талқыланатыны айтылған.

27 ақпанда Ақтөбе облысында пойызға басылған теміржол жұмысшыларының тағы бірі қайтыс болды деп хабарлайды "Қазақстан жаңалықтары" агенттігі.

"Қазақстан теміржолы" ұлттық компаниясы баспасөз қызметінің хабарлауынша, 27 ақпанда Ақтөбе облысындағы Никельтау-Қандыағаш теміржол учаскесінің Бақай-Тоқмансай өткелінде жұмыс істеп жатқан бес теміржолшыны жүк пойызы қағып кеткен.

Оқиға болған жерде екі теміржолшы (1972 жылы және 1978 жылы туған) бірден мерт болған, кейінірек ауыр жарақаттан тағы бір жұмысшы (1976 жылы туған) көз жұмған. Енді бір жұмысшы жаралы.

Компания қазір комиссия құрылып, оқиғаның мән-жайы анықталып жатқанын хабарлады.

Ресейлік "Роспотребнадзор" өкілінің хабарлауынша, жылқы етінің ДНҚ-сы Мәскеуге Австриядан әкелінді деген шұжық пен ет өнімдерінен табылған.

Ал Нидерландының ірі жиһаз компаниясы IKEA Еуропаның бес еліндегі Швецияда өндірілген Вена шұжықтарын құрамында жылқы еті бары белгілі болған соң мейрамханаларынан алып тастады. Мұның алдында компания тефтель тағамын сатылымнан алып тастаған еді.

Бұл өнімдер компанияның Франция, Испания, Ұлыбритания, Ирландия және Португалиядағы фирмалық жиһаз дүкендерінде "шошқа еті мен сиыр етінен жасалған" деп сатылған еді. Дүйсенбіде компания 24 мемлекетте бұл тағамды сатуды доғарды.

Еуропада жылқы етіне қатысты шу қаңтарда басталған еді. Даудан соң Еуропаның бірқатар мемлекеті ет өнімдерін тексере бастаған.

АҚШ мемлекеттік хатшысының Оңтүстік және Орталық Азия жөніндегі көмекшісі Роберт Блэйк Орталық Азия елдеріне исламшыл содырлардан тікелей қауіп төніп тұрмағанын айтты. Бірақ, оның айтуынша, "Өзбекстан ислам қозғалысы" ұйымы аймақта өз ықпалын кеңейту стратегиясы аясында Орталық Азияға орнығып қалуды қарастырып жатыр.

Конгрестің сыртқы істер комитеті алдында есеп берген Блэйк "Орталық Азия мемлекеттері радикализмге бастайтын және АҚШ-тың аймақтағы мүддесіне қауіп төндіретін проблемаларға тап болып отыр" деді.

Оның айтуынша, АҚШ терроризм сияқты трансшекаралық проблемаларды шешуге аймақ елдерінің үкіметтеріне көмектесіп жатыр.

Бірақ ол "Вашингтонның аймақ елдері жетекшілерін демократия орнату және адам құқықтары саласында реформалар жасауға көндіріп бағатынын" да ескертті.

Әйгілі пианист, "қырғи-қабақ соғыс" кезеңінің музыканты Ван Клиберн 78 жасында АҚШ-тың Техас штатындағы үйінде қайтыс болды. Ол ұзақ уақыт бойы сүйек қатерлі ісігімен ауырған.

Клиберннің даңқы 23 жасында (1958 жылы - СССР әлемде бірінші болып жасанды спутник ұшырып, ғарыш саласында АҚШ-ты басып озған соң) Мәскеуде өткен Чайковский атындағы тұңғыш халықаралық конкурстың жеңімпазы атанғанда жайылды. Клиберн конкурстың ақтық сәтінде шығармасын орындаған соң залдағы көрермендер сегіз минут бойы оған құрмет көрсетіп, қол шапалақтап тұрды.

1958 жылы советтік дирижер Кирилл Кондрашиннің жетекшілігімен Клиберннің орындауындағы "Фортепианоға арналған тұңғыш Чайковский концертінің жазбасы" басылып шықты. Бұл тарихта "классикалық музыканың тұңғыш платина альбомы" деген атпан қалды.

"Иранның ядролық бағдарламасы мәселесін реттеуге қатысты Тегеран мен батыс елдерінің ұсыныстары бір-біріне жақындай түсті" деп мәлімдеді бүгін Иран қауіпсіздік кеңесінің хатшысы Саид Жалили.

Алматыда бүгін аяқталған келіссөздерден кейінгі брифингте сөйлеген Саид Жалили тараптар келісөздердің келесі кезеңін 5-6 сәуірде тағы да Алматыда өткізетін болып уағдаласқанын жеткізді.

Оның айтуынша, Алматыдағы келіссөздерде осыдан сегіз ай бұрын Мәскеудегі келіссөздерде жасалған ұсыныстарды қалай орындау керектігі талқыланған.

Иран делегациясының басшысы батыс елдері жасаған ұсынысқа қатысты да айтты. Ол "Батыстың бұл жолғы ұсынысында Иранның "Фордо" уран байыту зауыты туралы сөз болған жоқ" деді.

Ал келіссөздерді жүргізген Еуропа Одағының сыртқы істер және қауіпсіздік жөніндегі комиссары Кэтрин Эштон "Иран жағы біз жасаған ұсыныстарды талқылап көруі қажет" деді.

Алматыда өтетін келіссөздердің кезекті кезеңіне дейін, 17-18 наурызда Иран мен алты ел сарапшылары Стамбулда (Түркия) кездеспек.

Иранның ядролық бағдарламасына қатысты келіссөздерге БҰҰ Қауіпсіздік кеңесіне мүше АҚШ, Қытай, Ресей, Ұлыбритания, Франция және Германия қатысады.

Алматыда өтіп жатқан Иранның ядролық бағдарламасына қатысты алты елдің келіссөздері аяқталды деп хабарлайды "Интерфакс-Қазақстан" агенттігі.

БҰҰ Қауіпсіздік кеңесіне мүше АҚШ, Ресей, Қытай, Ұлыбритания, Франция және Германия қатысқан келіссөздер кеше түсте басталған. Бүгінгі кездесу шамамен екі сағатқа созылды.

Иран делегациясы келіссөздер қорытындысы бойынша брифинг өткізбек. Азаттық келіссөздер қорытындысы жайында қосымша хабарлап отырады.

Биыл бес мың мемлекеттік қызметкер Астанадан аймақтарға жіберіледі деп хабарлайды Tengrinews.kz сайты.

Президент аппараты жетекшісінің орынбасары Ғабидұлла Әбдірахымовтың айтуынша, биыл орталық органдардан ауылдарда әкімдердің аппаратын құру үшін облыстарға 5 мың қызметкер жіберіліп, аймақтарға үлкен құзырет берілмек.

Оның сөзіне қарағанда, аймақтарға министрліктердегі штаттық қызметкерлер жіберіледі.

Ақмола облысында "дәстүрлі емес" діни ұйым өкілдеріне "заңсыз алтын өндірумен айналысты" деген айып тағылып, қылмыстық іс қозғалды деп хабарлайды облыстық қаржы полициясы департаментіне сілтеме жасаған "Қазақстан жаңалықтары" агенттігі.

Департаменттің баспасөз қызметінің ақпараты бойынша, діни ұйымның бірнеше мүшесінің үстінен "заңсыз кәсіпкерлікпен айналысу" фактісі бойынша қылмыстық іс қозғалған. Оларға "қылмыстық топ құрып, облыстың Бестөбе елді мекеніндегі кеніштен алтыны бар материалды заңсыз өндіріп, өңдеумен және оны сатумен айналысты" деген айып тағылып отыр.

Қаржы полициясының баспасөз қызметі арнайы операция барысында күдіктілерден алтыны бар материалдарды өңдейтін құрылғылар, құрамында алтыны бар 6 килограмнан астам материал табылғанын" айтады. Полиция діни ұйым мүшелерінен "діни әдебиеттер мен атыс қаруын тәркілеген".

"Қылмыстық топтың ұйымдастырушысы тұтқындалды. Іс тергеліп жатыр" дейді баспасөз қызметі.