Accessibility links

ЖАҢАЛЫҚТАР

Шардарадағы мектепте екі жұмысшы уланып, бірі қайтыс болды

Жедел жәрдем көлігі. (Көрнекі сурет.)

Түркістан облысы Шардара ауданындағы Шардара мектеп-лицейінде жылу жүйесіне қажетті сұйық отынды құюға келген жанар-жағармай бекетінің екі жұмысшысы уланып, бір адам оқиға орнында қайтыс болған. Бұл туралы 9 қаңтарда Азаттыққа аудандық білім бөлімінің басшысы Ақшагүл Бердәлиева айтты.

Оның сөзінше, қайғылы оқиға 8 қаңтарда сағат 16.00 шамасында Шардара мектеп-лицейінде сұйық отынды бөшкеге құйып жатқанда болған. Мектептің жылу жүйесіне қажетті сұйық отынды тендерде жеңген мердігер компания әкеледі.

Облыстық денсаулық сақтау басқармасының баспасөз хатшысы Мира Мүсілім оқиға орнында екі адам уланып, біреуі қайтыс болғанын растады.

Оның айтуынша, жедел жәрдеммен Шардара аудандық орталық ауруханасының жан сақтау бөліміне жеткізілген науқас әлі есін жимаған. Ол жасанды тыныс алу аппаратымен демалып жатыр.


Шымкент соты Харькованың апелляциялық шағымын қарап жатыр

Кәсіподақ белсендісі Лариса Харькова.

9 қаңтарда Шымкент қалалық соты билік шешімімен жабылған Қазақстан тәуелсіз кәсіподақтар конфедерациясының бұрынғы жетекшісі Лариса Харькованың апелляциялық шағымын қарай бастады.

2018 жылы Шымкенттегі жедел жәрдем станциясы кәсіподақ комитетінің жетекшісі Сәуле Әбдібаева кезінде тәуелсіз кәсіподақтар конфедерациясына аударған 2,5 миллион теңгені Лариса Харьковадан өндіріп алуды талап етіп, сотқа шағымданған. Шымкент қалалық әділет департаменті сот сауалына берген жауабында Әбдібаева басқарып отырған қазіргі кәсіподақ ұйымы бұрынғы жедел жәрдем станциясы кәсіподағының заңды мұрагері бола алмайтынын мәлімдеген. Осыған сүйенген Еңбекші аудандық соты өткен жылы қарашада істі тоқтатқан.

Оқи отырыңыз: Сот Лариса Харькованың ісін тоқтатты

Бірақ Лариса Харькова соттың азаматтық істі тоқтатуына қарсылық білдіріп, апелляциялық шағым түсірген. Оның пікірінше, "2,5 миллион теңге бергенін сотта дәлелдей алмаған" Сәуле Әбдібаева алдағы уақытта оның үстінен қайта арыздануы мүмкін.

- Маған істің тоқтағаны тиімсіз. Сот бұл істі қараудан бас тартуы керек еді. Сонда ғана Әбдібаеваның қайта арыздануға құқығы болмайды. Әбдібаева сотқа ешбір дәлел келтіре алмады. Дәлелі болмай тұрып арыз жазғаны үшін де жауап беруі керек, - дейді ол.

Сот отырысына Харькова мен оның сенімді өкілдері, белсенділер және адам құқығын қорғаушылар, Сәуле Әбдібаеваның қорғаушысы Дәулет Байсейітов қатысты.

Адвокат Дәулет Байсейітов сотта талапкердің дәлелдерін келтіріп жатқанда Лариса Харькова "мынадай өтірікті тыңдай алмаймын" деп сот залынан шығып кетті. Судья тараптарды тыңдап болған соң жұмыс уақытының біткенін айтып, сот отырысы 10 қаңтарда жалғасатынын хабарлады.

2017 жылы жазда Шымкенттегі Еңбекші аудандық соты Лариса Харькованы "бөтеннің сеніп тапсырған мүлкін алаяқтықпен әрі аса ірі көлемде жымқырған" деп айыптап, бас бостандығын төрт жылға шектеп, мүлкін тәркілеуге үкім еткен. Қазақстанда сотталған бұрынғы кәсіподақ басшылары Лариса Харькова, Нұрбек Кұшақбаев және Әмин Елеусіновке өткен жылы Артур Свенссон атындағы халықаралық сыйлық берілген.

Ақтөбеде "есірткіге елітіп, полицияға қарсыласқан" тұрғынның соты басталды

Ақтөбеде "көлік соғып, полицияға қарсылық көрсетті" деп айыпталған Санат Ағадиевтің соты. 9 қаңтар 2019 жыл.

9 қаңтарда Ақтөбе қалалық соты 1974 жылы туған Санат Ағадиевтің үстінен қозғалған істі қарай бастады. Тергеу материалында 2018 жылы 10 қыркүйекте "есірткіге еліткен" Санат Ағадиевтің Toyota Land Cruiser автокөлігімен Ақтөбенің орталық көшесінде бірнеше көлікті соғып, «полицияға қарсылық көрсеткені» және "есірткі қолданғаны" айтылған.

Тергеу оған Қылмыстық кодекстің 293-бабы 2-бөлігінің 3-тармағы (бірнеше рет бұзақылық жасау), 246-бабының 1-бөлігі (салық төлемеу), 378 бабының 1-бөлігі (билік өкілін қорлау) және 380-бабының 1-бөлігі (билік өкіліне күш қолдану) бойынша бірнеше айып тағып отыр. Санат Ағадиевтің өзі сот отырысына қатысқан жоқ. Сотталушының заңды өкілі, зейнет жасындағы әкесі Әлмұхамбет Ағадиевтің айтуынша, билік орындары ұлын мәжбүрлі түрде емдеуге жіберген.

Сот отырысы кезінде сот-медициналық сараптама қорытындысына сілтеме жасаған прокурор Азамат Байболатов Ағадиевтің осыдан бірнеше жыл бұрын болған төбелес кезінде басынан жарақат алып, емделмегенін, кейін есірткі мен ішімдікке әуес бола бастағанын айтты.

- Тергеу Ағадиевтің бұған дейін де бірнеше рет әкімшілік, қылмыстық жауапқа тартылғанын анықтады. Сот оны 2022 жылға дейін көлік жүргізу құқығынан айырған. 2018 жылы 10 қыркүйекте есірткіге елітіп алып көлік жүргізген кезде оның ақыл-есі дұрыс болмаған, - деді прокурор.

Іс материалы бойынша, былтыр 10 қыркүйекте кешке әкесінің Toyota Land Cruiser көлігін айдап әкеткен Санат Ағадиев көшеде Lada және Kia Picanto маркалы екі көлікті соғып, жалпы сомасы бір миллион теңгеден астам шығын келтірген. Жапа шеккендер соттан материалдық шығынды өндіріп беруді сұрады. Өзі зейнеткер, ал ұлы Санат Ағадиевтің науқас екенін айтқан Әлмұхамбет Ағадиев бұл талаптарды орынсыз деп санайды. Көлік иелерінен бөлек сотқа жәбірленуші ретінде полицияның төрт инспекторы қатысты. Олардың айтуынша, көлігінен түсіп, полицияға қарсылық көрсеткен Санат Ағадиевтің қолында "пышақ болған".

- Ағадиев полиция қызметкерлерінің талабына бағынбады. Пышақ кезеніп, балағаттады. Осыдан соң ескерту ретінде аспанға оқ атуға мәжбүр болдым. Оның заңға сай жазаланғанын қалаймыз, - деді жол-патрульдік полициясының аға инспекторы Нариман Аманғалиев.

Судья Ербол Әбдіхалықов бұл қылмыстық іс бойынша жарыссөз 16 қаңтарда өтетіні туралы хабарлады.

ІІМ: Қарағандыдағы төбелеске күдікті ұсталды

Нарек Гурурян. (Видеодан скриншот.)

Қарағандыда жаңа жыл түні болған төбелеске күдіктілердің бірі, халықаралық іздеу жарияланған Нарек Гурурян ұсталды. Бұл туралы Қазақстан Ішкі істер министрлігінің ресми өкілі Алмас Садубаев хабарлады. Оның айтуынша, Армения азаматы Нарек Гурурян Ресейдің Омбы облысының аумағында ұсталған. "Қазір оны Қазақстанға әкелу жұмыстары ұйымдастырылып жатыр" деді Садубаев.

Ішкі істер министрлігінің хабарлауынша, Нарек Гурурян 1 қаңтарда Қазақстаннан Ресейге өтіп кеткен.

Жаңа жыл түні Қарағандыдағы мейрамханалардың бірінде болған төбелес салдарынан бір адам қаза тауып, төрт адам жараланған. Бұл оқиғаға қатысы бар деген күдікпен сегіз адам ұсталған. Тағы бір күдікті Нарек Гурурянға халықаралық іздеу жарияланған. 6 қаңтарда Қарағандыда жүздеген адам "қылмыскерді" табуды талап еткен. Қарағанды облысы әкімі Ерлан Қошанов іздеу жұмыстары жүріп жатқанын айтқан.

7 қаңтарда интернетте Нарек Гурурян есімді адам видеоүндеу жариялап, "төбелескендер арасында болғанын, бірақ кісі өлтірмегенін" мәлімдеген.

Оқи отырыңыз: Қарағандыдағы оқиғаның хроникасы және биліктің реакциясы

8 қаңтарда Астанада өткен брифингте ішкі істер министрінің бірінші орынбасары Жанат Сүлейменов "жанжалдың ұлтаралық сипаты барын" жоққа шығарған.

"Жанжал тұрмыстық сипатта өрбіген. Бір тарапта бір ғана ұлттың, екінші тарапта өзге бір ұлттың ғана өкілдері төбелесті деген жағдай болған жоқ. Біз тергеу кезінде бұл туралы айтқан жоқпыз, себебі барлығын анықтап алғымыз келді. Тергеу әлі жүргізіліп жатқандықтан, егжей-тегжейлі ақпарат бере алмаймыз" деді Сүлейменов.

9 қаңтарда Қазақстан ішкі істер министрі Қалмұханбет Қасымов пен Арменияның Қазақстандағы елшісі Гагик Галачян кездескен.

Оқиға қалай болған еді?
please wait

No media source currently available

0:00 0:02:08 0:00

Ішкі істер министрі Қасымов Армения елшісімен кездесті

Ішкі істер министрі Қалмұханбет Қасымов.

9 қаңтарда Қазақстан ішкі істер министрі Қалмұханбет Қасымов пен Арменияның Қазақстандағы елшісі Гагик Галачян кездесті. Бұл туралы ІІМ баспасөз қызметі хабарлады.

Министрлік баспасөз қызметінің мәлімдеуінше, екі тарап Қазақстан мен Арменияның қылмыспен күрес, қоғамдық қауіпсіздікті қамтамасыз ету жұмыстарындағы байланыстарын талқылаған.

Жаңа жыл түні Қарағандыдағы мейрамханалардың бірінде болған төбелес салдарынан бір адам қаза тауып, төрт адам жараланған. Бұл оқиғаға қатысы бар деген күдікпен сегіз адам ұсталған. Тағы бір күдікті Нарек Гурурянға халықаралық іздеу жарияланған. 6 қаңтарда Қарағандыда жүздеген адам "қылмыскерді" табуды талап еткен. Қарағанды облысы әкімі Ерлан Қошанов іздеу жұмыстары жүріп жатқанын айтқан.

7 қаңтарда интернетте Нарек Гурурян есімді адам видеоүндеу жариялап, "төбелескендер арасында болғанын, бірақ кісі өлтірмегенін" айтқан.

Оқи отырыңыз: Қарағандыдағы оқиғаның хроникасы және биліктің реакциясы

8 қаңтарда Астанада өткен брифингте Ішкі істер министрінің бірінші орынбасары Жанат Сүлейменов "жанжалдың ұлтаралық сипаты барын" жоққа шығарған.

"Жанжал тұрмыстық сипатта өрбіген. Бір тарапта бір ғана ұлттың, екінші тарапта өзге бір ұлттың ғана өкілдері төбелесті деген жағдай болған жоқ. Біз тергеу кезінде бұл туралы айтқан жоқпыз, себебі барлығын анықтап алғымыз келді. Тергеу әлі жүргізіліп жатқандықтан, егжей-тегжейлі ақпарат бере алмаймыз" деді Сүлейменов.

8 қаңтарда Армения қауіпсіздік кеңесінің хатшысы Армен Григорян қазақстандық әріптесі Ғабит Байжановпен телефон арқылы сөйлесіп, Қарағандыдағы оқиғаны талқылаған. Григорян қаза болған жігіттің туыстарына көңіл айтқан. Екі елдің де кауіпсіздік кеңестерінің хатшылары "тұрмыстық оқиғаға ұлтаралық сипат беруге болмайтынын" атап өткен.


БҰҰ Сауд Арабиясынан қашқан қызға босқын мәртебесін берді

Сауд Арабиясының азаматы Рахаф Мохаммед әл-Кунун (сол жақтан екінші) Бангкок әуежайында Таиланд иммиграция қызметінің басшыларымен кездесіп тұр. 7 қаңтар 2019 жыл.

БҰҰ Сауд Арабиясының 18 жастағы азаматы Рахаф Мохаммед әл-Кунунға босқын мәртебесін берді. Бұл туралы Австралия ішкі істер министрлігі хабарлады. Әл-Кунун босқын мәртебесін беруді осы ел билігінен сұраған.

БҰҰ-ның босқындар ісі жөніндегі агенттігі Австралия билігінен Рахаф Мохаммед әл-Кунунға көмектесуді өтінген. Австралия үкіметі қыздың өтінішін ел заңдарына сай қарауға уәде берді.

Рахаф Мохаммед әл-Кунун австралиялық визасы болғанын, өз отбасынан осы елге қашқысы келгенін мәлімдеген.

Қазір Таиландта әл-Кунунның әкесі мен бауыры жүр, бірақ ол туыстарымен кездесуден бас тартқан.

Әл-Кунун 6 қаңтарда Кувейтте отбасымен бірге демалып жүргенде Таиландқа қашып кеткен. Бірақ ол Бангкок әуежайына жеткен кезде төлқұжатын Сауд Арабиясы елшілігінің өкілі алдап алып қойғанын айтады. Одан кейін қыз Бангкок әуежайындағы қонақ үй бөлмесінен шықпай қойды. Бір тәуліктен соң Таиланд билігі Рахафты еліне немесе Кувейтке қайтармайтынын мәлімдеді. Оны қонақ үйден БҰҰ өкілдері алып кетті.

BBC телеарнасына сұхбат берген қыз исламнан бас тартқанын, бұл ісі үшін Сауд Арабиясында оны өлім жазасына кесетінін мәлімдеген.

Сауд Арабиясының билігі соңғы жылдары әйелдерге қатысты кей шектеулерді жоя бастағанымен, бұл елде әйелдер құқығы әлі де қатты шектеледі.


EIU: Қазақстан "авторитарлық ел" тізімінен шықпады

Economist Intelligence Unit зерттеу тобының 2017 жылға арналған демократия индексі. (Көрнекі сурет.)

Ұлыбританияда орналасқан Economist Intelligence Unit (EIU) зерттеу тобы әлем елдері бойынша 2018 жылдың демократия индексін жариялады. Ұйым сарапшылары былтыр жалпы әлем көлемінде демократия көрсеткіші нашарлап, я жақсармай, бір қалыпта тұрғанын айтады. Ұйым индексінде Қазақстан бұрынғыдай "авторитарлық режим" орнаған елдер қатарында тұр. Қазақстан сайлау процесі мен плюрализм, үкімет қызметі, азаматтардың саяси өмірге араласуы, саяси мәдениет және азаматтық еркіндік көрсеткіштері бойынша ең көп 10 баллдан 2,94 балл иеленіп, 167 елдің арасында 144-орынға орналасқан.

"Әлем елдерінде биліктен көңілі қалу айқын байқалып, ол саяси институттарға және тікелей демократияның өзіне соққы болып тиді. Азаматтық еркіндік деңгейі де төмендеді. Осыған қарамастан, әлемдік деңгейде демократияның ең маңызды өлшемдерінің бірі - саяси өмірге араласу деңгейі жоғарылады. Азаматтардың саясатқа араласуы азая бастағанымен, олар сайлауда дауыс беріп, наразылық таныта бастады" делінген EIU есебінде.

2018 жылы демократия толық орныққан бес елдің тізімінде Норвегия, Исландия, Швеция, Дания және Канада бар.

Постсоветтік Эстония (23), Латвия (36) және Литва (38) "демократиясы әлсірей бастаған" елдер қатарында тұр. Бұл тізімге АҚШ (25) биыл екінші жыл қатарынан ілігіп отыр. АҚШ 2017 жылы "анық демократия орнаған" елдер тізімінен "демократиясы әлсірей бастаған" елдер тізіміне түскен.

Молдова (79), Грузия, (89), Украина (84), Қырғызстан (98) және Армения (103) индексте "гибридті режим орныққан" елдер тізіміне іліккен.

Ресей мен Беларусь, Әзербайжан және Орталық Азияда Қазақстаннан өзге Тәжікстан, Түркіменстан және Өзбекстан "авторитарлық елдер" тізімінде тұр.


Назарбаев: Сириядағы Қазақстанның 47 азаматы қайтарылды

Қазақстан президенті Нұрсұлтан Назарбаев.

Сириядан Қазақстанның 47 азаматы, оның ішінде 30 бала мен 11 әйел эвакуацияланды. Бұл туралы 9 қаңтарда Ақорданың баспасөз қызметі хабарлады.

Ақорданың ресми сайтында жарияланған видеода президент Нұрсұлтан Назарбаев 6 қаңтарда қазақстандық құқық қорғау органдары мен Сыртқы істер министрлігі жүргізген гуманитарлық операция барысында 47 азаматтың Сириядан елге жеткізілгенін айтады.

"Олар кезінде дағдарыс орнаған елге алданып барып, терроршылар тұтқынына түсіп қалған. Біраз адамдар алданып Сирияға барды да, көпшілігі соғыс кезінде қайтыс болды. Бұл кісілер Қазақстанға оралған соң бір ай біздің жағдайға үйреніп, медициналық бақылаудан өтеді" деді Қазақстан президенті.

Назарбаев Қазақстан қақтығыс аймағында еріксіз жүрген азаматтарды, әсіресе балаларды қайтару жұмыстарын жалғастыра беретінін айтады.

2018 жылы шілде айында Қазақстанның Ұлттық қауіпсіздік комитеті (ҰҚК) Сирия мен Иракта соғыс басталғалы Таяу Шығысқа 800-ге тарта қазақстандық кеткенін хабарлаған. Комитет Сирия мен Ирактағы халықаралық террорлық ұйымдарда 120 ер адам, 250-ден астам әйел және 500 бала барын айтқан.

Былтыр наурызда ҰҚК төрағасының орынбасары Нұрғали Білісбеков Сириядан 125 қазақстандықтың оралғанын, 57 адамның қамауда отырғанын, қалғандарының бақылауда екенін айтқан.


Ал 19 желтоқсанда Қазақстанның Білім және ғылым министрлігі соңғы екі жылда Сириядан Қазақстанға 91 бала қайтарылғанын, қазіргі кезде балаларды қоғамға бейімдеу жұмыстары жүріп жатқанын хабарлаған.

Осыған дейін Азаттықта жарияланған мақалаларда баласы Сирияда қаза болғанын, сонда қалған келіні мен немерелерін Қазақстанға қалай қайтаруды білмей жүргенін айтып бірнеше ата-ана шағымданған.

Шымкентте "9 жасар қызды зорлаған" күдіктіні іздеп жатыр

Көрнекі сурет.

Шымкентте 9 жасар қыз баланы зорлау дерегі бойынша қылмыстық іс қозғалды. Бұл туралы Азаттыққа бүгін қалалық полиция департаменті хабарлады.

Полицияның мәліметінше, 5 қаңтарда Шымкент тұрғыны кәмелет жасына толмаған қызын әлдекімнің зорлағаны туралы арызданған. Оқиғаға байланысты Қылмыстық кодекстің "Зорлау" бабы бойынша қылмыстық іс қозғалып, сотқа дейінгі тергеу амалдары басталған. Күдіктіні ұстау іс-шаралары жүргізіліп жатыр деп хабарлайды полиция.

Ішкі істер департаменті қылмыстық іс қалалық полиция мен прокуратураның бақылауында екенін мәлімдеген.

Оқи отырыңыз: Қазақстанда бала неге зорланады? Сарапшылар пікірі

Бұған дейін Шымкент қаласының прокуратурасы былтыр кәмелет жасына толмаған балаларға жасалатын жыныстық сипаттағы қылмыс саны күрт өскені туралы мәлімдеген. Прокуратураның ақпараты бойынша, былтыр 2017 жылмен салыстырғанда бала зорлау қылмысының саны 18-ден 43-ке дейін көбейген.


Депутаттар Қарағандыдағы оқиғаға байланысты Абаевқа сауал жолдады

Қазақстанның Ақпарат және коммуникациялар министрі Дәурен Абаев.

Парламент мәжілісінің депутаты Нұртай Сабильянов Ақпарат және коммуникациялар министрі Дәурен Абаевтан Қарағандыдағы оқиғаға байланысты "кей ақпарат құралдарында шынайы, анық ақпарат берілуін бақылауды" сұрады.

Азаттық тілшісінің хабарлауынша, 9 қаңтарда мәжіліс отырысында Сабильянов депутаттар атынан министр Абаевқа депутаттық сауал жолдады. Сабильянов алдымен депутаттар атынан Қарағандыда жаңа жыл мерекесі кезіндегі жанжалда қаза тапқан 23 жастағы Рақымжан Жансейіттің туыстарына көңіл айтты. Депутат құқық қорғау органдары бұл қылмысты жан-жақты тергеу жұмыстарын жүргізіп жатқанын, қылмысқа қатысы бар адамдардың жазаланатынына сенетінін айтты.

"Дегенмен, бұл оқиғаға байланысты кейбір БАҚ-та түрлі мәліметтер айтылып жатыр. Біздің басты мақсатымыз - саяси тұрақтылық пен қоғамдық татулықты сақтай отырып, мемлекетіміздің тәуелсіздігін тұғырлы, баянды ету. Осыған орай сізден БАҚ-тағы аталған оқиғаға қатысты материалдардың шынайы, тексерілген және нақты болуын қамтамасыз етуіңізді сұраймыз" деді Сабильянов.

Одан кейін мәжілістің Қазақстан халқы ассамблеясы атынан сайланған депутаты Наринэ Микаелян сөйлеп, депутаттық сауалды қолдайтынын мәлімдеді.

Жаңа жыл түні Қарағандыдағы мейрамханалардың бірінде болған төбелес салдарынан бір адам қаза тауып, төрт адам жараланған. Бұл оқиғаға қатысы бар деген күдікпен сегіз адам ұсталған. Тағы бір күдікті Нарек Гурурянға халықаралық іздеу жарияланған. 6 қаңтарда Қарағандыда жүздеген адам "қылмыскерді" табуды талап еткен. Қарағанды облысы әкімі Ерлан Қошанов іздеу жұмыстары жүріп жатқанын айтқан.

7 қаңтарда интернетте Нарек Гурурян есімді адам видеоүндеу жариялап, "төбелескендер арасында болғанын, бірақ кісі өлтірмегенін" айтқан.

Оқи отырыңыз: Қарағандыдағы оқиғаның хроникасы және биліктің реакциясы

8 қаңтарда Астанада өткен брифингте Ішкі істер министрінің бірінші орынбасары Жанат Сүлейменов жанжалдың ұлтаралық сипаты барын жоққа шығарған.

"Жанжал тұрмыстық сипатта өрбіген. Бір тарапта бір ғана ұлттың, екінші тарапта өзге бір ұлттың ғана өкілдері төбелесті деген жағдай болған жоқ. Біз тергеу кезінде бұл туралы айтқан жоқпыз, себебі барлығын анықтап алғымыз келді. Тергеу әлі жүргізіліп жатқандықтан, егжей-тегжейлі ақпарат бере алмаймыз" деді Сүлейменов.

Кеше Армения қауіпсіздік кеңесінің хатшысы Армен Григорян қазақстандық әріптесі Ғабит Байжановпен телефон арқылы сөйлесіп, Қарағандыдағы оқиғаны талқылаған. Григорян "қаза болған жігіттің туыстарына көңіл айтқан". Екі елдің де кауіпсіздік кеңестерінің хатшылары "тұрмыстық оқиғаға ұлтаралық араздық сипат беруге болмайтынын" атап өткен.

Астана әкімі үлескерлер мәселесін шешу мерзімін атады

Астанадағы құрылысы бітпей тұрған "Комсомол" тұрғын үй кешені. 3 шілде 2018 жыл. (Көрнекі сурет.)

Астана әкімі Бақыт Сұлтанов қаладағы тұрғын үйге ақша салып, алданып қалған үлескерлер мәселесі 2022 жылдың соңына дейін шешілетінін мәлімдеді. Қала активімен өткен жиында әкім Сұлтанов Астанада қазір құрылысы уақытында аяқталмаған 29 нысан барын айтты.

"Алданған үлескерлер мәселесін шешу үшін біз барлық проблемаға айналған нысандар құрылысын 2022 жылдың соңына дейін аяқтаудың жол картасын жасадық. Ол айқын экономикалық есепке құрылған" деді қала әкімі.

Бұған дейін Астанада құрылысы уақытында аяқталмаған елуден астам тұрғын үй кешені, уәделі пәтерлерін күтіп жүрген он мыңға жуық үлескер бары айтылған.

Оқи отырыңыз: Жаңа ипотека Қазақстандағы тұрғын үй мәселесін шеше ме?

Былтыр көктемде Қазақстан президенті Нұрсұлтан Назарбаев Астанадағы құрылысты аяқтау үшін бюджеттен қырық миллиард теңге бөлінетінін мәлімдеген.​

Сот белсенді Инсенованың бас бостандығын шектеді

Белсенді Дильнар Инсенова (оң жақта) мен адвокаты Сәбит Исабеков сотта отыр. Алматы, 9 қаңтар 2019 жыл.

Бүгін Алматының Әуезов аудандық сотында белсенді Дильнар Инсеноваға қарсы іс бойынша сотта үкім оқылды. Азаттық тілшісінің хабарлауынша, судья Ерхан Тотыбай Дильнар Инсенованы Қылмыстық кодекстің 189-бабымен ("Сенiп тапсырылған бөтен мүлiктi иемденiп алу немесе талан-таражға салу") айыпты деп танып, бас бостандығын екі жылға шектеуге үкім етті. Бұған қоса сот оның екі жыл қоғамдық қызметпен айналысуына тыйым салды.

Дильнар Инсенованың үстінен қозғалған іс бойынша сот процесі өткен жылы желтоқсанның соңында басталған. Алматы қалалық жұмыспен қамту орталығы белсендінің үстінен азаматтық шағым түсіріп, одан "жымқырған бюджет қаржысын қайтаруды" талап еткен. Прокуратура Инсенованы 189-бап бойынша қылмыстық жауапқа тартуды талап еткен.

Сот тергеуі бойынша, Инсенова өзі жетекшілік еткен тұрғындарды дәрігерлік-әлеуметтік қорғау қоры арқылы мүмкіндігі шектеулі азаматтарды жұмысқа тартқан. Алматы қалалық жұмыспен қамту орталығы қоғамдық ұйымға жұмыс істеген мүгедектерге төлейтін жалақы аударып отырған. Жұмыспен қамту орталығы "Инсенова ақшаны мүгедектерге толық төлемей, 2 миллион теңгеден астам қаржыны өзі жұмсаған" дейді.

Сот барысында Дильнар Инсенова "жымқырды" делінген қаржыны өтегені туралы түбіртегін көрсеткендіктен, судья азаматтық шағым бойынша істі тоқтатты.

Соттағы жарыссөз кезінде Инсенова өзіне тағылған айыпты мойындайтынын, бірақ ісіне өкінбейтінін мәлімдеді.

Судья үкім шығарарда оның кәмелет жасына толмаған екі баласы барын және қылмысын мойындағанын ескеріп, бас бостандығынан айыру емес, шектеу жазасын кескенін айтты.

Дильнар Инсенова сот үкіміне апелляциялық шағым түсіретінін жеткізді.

Тұрғындарды дәрігерлік-әлеуметтік қорғау қорының жетекшісі әрі Құқық қорғаушыларды қорғау және қауіпсіздік мәселелері бойынша коалицияның мүшесі Дильнар Инсенова ипотекаға үй алып, қарызын төлей алмай жүрген азаматтардың наразылық акцияларына қатысып белгілі болған. 2015 жылы қазанда билік оған Ұлттық банк ғимараты алдында "рұқсат етілмеген наразылық акциясын ұйымдастырғаны" үшін айыппұл салған.

2018 жылы қаңтарда Инсенова өзін пәтерінен күштеп көшірмек болғанда наразылық танытқан.

Белсендіні мәжбүрлеп көшіру (16 қаңтар 2018 жыл)

Астанада полиция Азаттық тілшілерін ұстады

Азаттық тілшісі Өркен Жоямерген.

Бүгін Астанада наразылық танытқан адамдарды суретке түсірмек болған Азаттық тілшісі Өркен Жоямерген мен оператор Ержан Әмірхановты полиция ұстады.

Жоямергеннің телефон арқылы хабарлауынша, әріптесі екеуі парламенттегі жиынға кетіп бара жатқан жолда үкімет үйі маңында наразылық танытып, плакат ұстап тұрған бірнеше адамды көрген. Оператор Ержан Әмірханов наразыларды суретке түсірмекші болған, сол кезде полиция наразыларды, олармен бірге Азаттықтың екі журналисін ұстаған. Оларға не себепті ұсталғандарын түсіндірместен Есіл аудандық ішкі істер басқармасының №13 учаскелік полиция пунктіне апарған.

Сол жерде полиция өкілдері тілшілерді "қателесіп ұстағандарын" айтқан, бірақ олардан наразы топты түсіріп алған суреттерді өшіріп тастауды талап еткен. Алайда Азаттық тілшілері сурет өз меншіктері екенін айтып, оны өшіруден бас тартқан. Бұдан соң полиция Азаттық тілшілерін босатқан.


Наразыларды полиция ұстап әкеткендіктен олардың қандай мақсатпен үкімет үйінің алдына шыққанын анықтау мүмкін болмады. Кейін мәлім болғанындай, наразылар биліктен журналист Тоқберген Әбиевті босатуды талап еткен. Астанадағы "Заң және сот төрелігі" баспасөз клубының және Abiyev.kz сайтының жетекшісі Тоқберген Әбиев "сот пен мемлекеттік органдар жұмысына килігу" ісі бойынша өткен жылы 5 желтоқсанда сот үкімімен бір жылға сотталған. Ол жазасын қоныс колониясында өтеуі тиіс.

Қазақстанда полиция бұған дейін түрлі наразылық шараларынан хабар таратпақ болған Азаттық тілшілерін бірнеше рет ұстаған.

Порошенко патриарх Филаретке "Украина батыры" атағын берді

Украина президенті Петр Порошенко (сол жақта) мен патриарх Филарет. 28 желтоқсан 2018 жыл.

Украина президенті Петр Порошенко патриарх Филаретке Украина батыры атағын берді. Порошенко Филареттің украин православие шіркеуінің тәуелсіздік алу жолындағы күресіне қосқан үлесін ерекше бағалады.

"Ол украин халқының рухани жетекшісі және солай болып қала береді. Сол себепті оған "Украина батыры" атағын бердім" деп жазды президент Facebook-тегі парақшасында.

Патриарх Филарет (Денисенко) Киев патриархатының Украин православие шіркеуін басқарған. Шіркеу 1992 жылы Украин православие шіркеуіне қарасты дін қызметкерлері мен приходтардың бір бөлігі Орыс православие шіркеуінен тәуелсіздігін жариялаған соң құрылған. Әлемдегі өзге православие шіркеулері Украин автокефальді православие шіркеуі мен Киев патриархатының Украин православие шіркеуін мойындамайды.

15 желтоқсанда Киевте собор өтіп, Киев патриархатының Украин православие шіркеуі мен Украин автокефальді православие шіркеуі бірікті. Бұл екі шіркеудің базасында жергілікті православие шіркеуі құрылды. Киев митрополиті болып 39 жастағы епископ Епифаний сайланды. Филарет ол соборда өз кандидатурасын ұсынбады. Бүкіләлемдік патриархат Украинада құрылған жаңа шіркеуді мойындап, 6 қаңтарда оған автокефалия (өзін-өзі басқару құқығы) туралы құжат берді.

Өзбекстанда жаңа саяси партия құрылды

Шавкат Мирзияев, Өзбекстан президенті

Өзбекстанда тағы бір саяси күш - Өзбекстан экологиялық партиясы құрылды. 8 қаңтар күні Ташкенттегі Халықаралық сауда орталығында партия құрылтайы өтті.

Өзбекстанда бұған дейін төрт саяси партия - Халықтық-демократиялық партия, "Адолат" ("Әділет") социал-демократиялық партиясы, "Миллий тикланиш" (Ұлттық қайта өрлеу") демократиялық партиясы мен Либералды-демократиялық партия ("Кәсіпкерлер мен бизнесмендер қозғалысы") болған.

Жаңа партия Өзбекстан экологиялық қозғалысының негізінде құрылды.

Қозғалысқа Өзбекстан мен Тәжікстан Рогун ГЭС-ін салуға қатысты келісімге келе алмай, мәселе дауға айнала бастаған кезде Өзбекстан парламентінен 15 депутаттық мандат берілген.

Өзбекстан президенті Шавкат Мирзияев 2017 жылы 22 желтоқсанда парламентте жасаған алғашқы үндеуінде экологиялық қозғалысқа парламенттен ерекше квота бөлінгенін сынаған.

Мирзияев үндеуінде "Барлық саяси күштерге теңдей жағдай жасайтын және экологиялық қозғалыс өкілдеріне квота бөлуден бас тартатын уақыт жетті деп ойлаймын" деген.


АҚШ ресейлік адвокат Весельницкаяға жаңа айып тақты

Ресейлік адвокат Наталья Весельницкая.

Нью-Йорктің федералдық прокуратурасы ресейлік заңгер Наталья Весельницкаяны Prevezon Holding компаниясының 230 миллион долларын заңдастырмақ болған істі зерттеуге кедергі келтірді деп айыптады. Мұндай ақпарат АҚШ әділет министрлігінің ресми сайтында жарияланды.

Бұл іске ресейлік танымал бизнесменнің тікелей қатысы болған деп хабарланды. Бірақ әзірге оның аты-жөні аталмайды. Весельницкая - Prevezon Holding компаниясының адвокаты.

Ол 2016 жылы маусымда Нью-Йорктегі Трамп-Тауэр кеңсесінде АҚШ-тың қазіргі президенті Дональд Трамптың ұлы кіші Дональд Трамппен кездескен. Оған Трамптың күйеу баласы Джаред Кушнер мен сол кезде президенттікке кандидат Дональд Трамптың сайлауалды штабын басқарған Пол Манафорт та қатысқан.

Хабарламада АҚШ әділет министрлігінің Ресей билігінен тергеуге көмектесуін сұрағаны айтылады. Бірақ Мәскеу күдікке іліккен адамдарды ақтайтын жалған ақпарат жіберген. Ресей өз есебінде "ақшаны заңдастыруға Hermitage Capital қорының негізін қалаушы Уильям Браудердің қатысы бар" деп көрсеткен.

Айыптау құжатында Весельницкаяның АҚШ тергеу органдарына жауап дайындау үшін ресейлік жоғары лауазымды прокурорлармен құпия байланыс орнатқаны айтылған. Әділет министрлігі ол осылайша "сотты жаңылыстырып отыр" деп санайды.

2017 жылы мамырда Кипрде тіркелген Prevezon Holdings компаниясы Ресей қаржысын заңдастыру ісіне қатысты АҚШ-пен келісімге келген. Компания ол кезде "Ресей теміржолы" компаниясы вице-президентінің ұлы Денис Кацывтың иелігінде болған. Компания істі ақтау үшін АҚШ-қа алты миллион доллар айыппұл төлеуге келіскен. АҚШ билігі бұған жауап ретінде "Prevezon Holdings Ресейде ақша заңдастырмады" деп мәлімдеген.

Весельницкаяның өзі бұған дейін берген сұхбаттарында инвестор Уильям Браудерді жиі айыптаған. Бұл істі тергеу барысында заңгер Сергей Магнитский Мәскеу түрмесінде қаза болды. Сонымен бірге Весельницкая Браудердің "қылмысын ашатын" бірнеше фильм көрсеткен.

БАҚ-тың жазуынша, Наталья Весельницкая 2016 жылы Нью-Йорктегі кездесу кезінде Трамптың кеңесшілеріне өзінде Хиллари Клинтонды "әшкерелейтін материал" барын айтқан. Ал Кушнер бұл кездесуді "уақытты текке өткізу болды" деп атаған.

Трамптың ұлы кездесу туралы әкесінің бейхабар болғаны әрі Клинтонды әшкерелейтін ешқандай материал алмағаны туралы мәлімдеген.


Түркіменстандағы мектептер президент суретін ауыстырып жатыр

Бердімұхамедовтің жаңа портреті.

Түркіменстандағы мектептер мен мемлекеттік мекемелер ел президенті Гурбангулы Бердімұхамедовтің портреттерін жаппай ауыстырып жатыр. Жаңа портрет үшін әр мұғалімнен 5 манаттан (шамамен 0,25 доллар) жинаған. Бұл туралы Азаттықтың Түркімен қызметі хабарлады.

Азаттықтың Түркімен қызметінің тілшісі президент портреті ашық сатылып жатқанын, үлкені 5 манат, кіші суреті 3 манат тұратынын айтқан. Ал ескі портреттерінің құны - 4 манат.

Президенттің суреттері елдегі барлық мемлекеттік мекемелерде ілінген. Бердімұхамедовтің портретін мектеп, аурухана, министрлік ғимараттары, спорт кешендері, аэропорттар, ұшақ салонындары да ілуі міндет.

Азаттықтың Түркімен қызметі бұған дейін президенттің портретіне зақым келтіргендерге жаза қарастырылғанын хабарлаған.

Қазақстан мен Арменияның Қауіпсіздік кеңесі хатшылары тілдескен

Армения Қауіпсіздік кеңесінің хатшысы Армен Григорян.

Армения Қауіпсіздік кеңесінің хатшысы Армен Григорян қазақстандық әріптесі Ғабит Байжановпен телефон арқылы сөйлескен. Кеңес хатшысының баспасөз хатшысы Арег Кочинянның хабарлауынша, тараптар Қарағандыдағы оқиғаны талқылаған. Армен Григорян "қаза болған жігіттің туыстарына көңіл айтқан".

Екі елдің де Қауіпсіздік кеңесінің хатшылары тұрмыстық оқиғаға ұлтаралық араздық сипат беруге болмайтынын атап өткен.

Григорян мен Байжанов "қылмыстық іс жан-жақты әрі ашық тексеріліп, кінәлілердің бәрін тек заң аясында жауапқа тарту маңызды" деген. Бұған қоса, екі ел өзара тұрақты байланыс орнату қажет екенін айтқан.

Оқи отырыңыз: Қарағандыдағы оқиғаның хроникасы және биліктің реакциясы

8 қаңтарда Астанада Қазақстан ішкі істер министрінің бірінші орынбасары Жанат Сүлейменов сегіз адам қамалғанын, шетке қашып кеткен бір адам іздестіріліп жатқанын айтты.

Оның сөзінше, 14 адам төбелескен. Олардың тоғызы - "Древний Рим" мейрамханасының қызметкері. Пышақ жарақатынан қаза тапқан 23 жастағы ер адам мейрамханаға кикілжің шыққан кезде серігінің шақыруымен барған.

Жанат Сүлейменовтің айтуынша, кикілжің қаңтардың 1-іне қараған түні сағат 4 шамасында мейрамхана қызметкерлері киленттерге "мейрамхана жабылатынын ескертіп, тарауды сұрағаннан кейін" шыққан. Кикілжің соңы төбелеске ұласқан. Төбелес болғанын полицияға сағат 4:40 шамасында мейрамхана қызметкерлерінің бірі хабарлаған.

Бұған дейін Армения премьер-министрі міндетін атқарушы Никол Пашинян да пікір білдіріп, оқиғаның ұлтаралық сипаты жоқ деген.

Жаңа жыл түні Қарағандыдағы мейрамханалардың бірінде төбелес болып, бір адам қаза тауып, төрт адам жараланған. Барлығы сегіз адам ұсталған. Тағы бір адам Нарек Гурурянға халықаралық іздеу жарияланған. 6 қаңтарда Қарағандыда жүздеген адам "қылмыскерді" табуды талап еткен. Қарағанды облысы әкімі Ерлан Қошанов іздеу жұмыстары жүріп жатқанын айтқан.

7 қаңтарда интернетте Нарек Гуруян есімді адам видеоүндеу жариялап, "төбелескендер арасында болғанын, бірақ кісі өлтірмегенін айтқан".

Белсенді Мұхтар Тайжанды полицияға алып кеткен

Мұхтар Тайжан.

8 қаңтарда Алматыдағы "Астана" қонақ үйінде Қарағандыдағы оқиғаға қатысты жиын өткізбек болған белсенді Мұхтар Тайжанды қалалық ішкі істер департаментіне алып кеткен. Бұл ақпаратты Азаттыққа Алматы қаласы ішкі істер департаментінің кезекшісі растады. Ал "Астана" қонақ үйінің өкілдері жиын өткізуден бас тартқандарын айтты.

Мұхтар Тайжан жиын өтетіні туралы Facebook желісі арқылы хабарлап, белсенділерді талқылауға шақырған. Осы жазбадан кейін Мұхтар Тайжанға прокурорлар келіп, әңгімелесіп кеткен және кеңес өткізуге кедергі жоқтығын айтқан. Бұл туралы белсенді Facebook арқылы хабарлады.

Оқи отырыңыз: Қарағандыдағы оқиғаның хроникасы және биліктің реакциясы

6 қаңтарда Қарағандыда жүздеген адам "қылмыскерді" табуды талап еткен. Қарағанды облысының әкімі Ерлан Қошанов іздеу жұмыстары жүріп жатқанын айтқан.

Қарағандыдағы оқиғаға қатысты Армения премьер-министрінің міндетін атқарушы Никол Пашинян мен осы елдің сыртқы істер министрлігі мәлімдеме жасаған.

8 қаңтарда Астанада Қазақстан ішкі істер министрінің бірінші орынбасары Жанат Сүлейменов сегіз адам қамалғанын, шетке қашып кеткен бір адам іздестіріліп жатқанын мәлімдеді.

Оның сөзінше, 14 адам төбелескен. Олардың тоғызы - "Древний Рим" мейрамханасының қызметкері. Пышақ жарақатынан қаза тапқан 23 жастағы ер адам мейрамханаға кикілжің шыққан кезде серігінің шақыруымен барған.

Жанат Сүлейменовтің айтуынша, кикілжің қаңтардың 1-іне қараған түні сағат 4 шамасында мейрамхана қызметкерлері киленттерге "мейрамхана жабылатынын ескертіп, тарауды сұрағаннан кейін" шыққан. Кикілжің соңы төбелеске ұласқан. Төбелес болғанын полицияға сағат 4:40 шамасында мейрамхана қызметкерлерінің бірі хабарлаған.

Оқиға қалай болған еді?
please wait

No media source currently available

0:00 0:02:08 0:00

ІІМ Қарағандыдағы қылмыс "себебін" атады

Қарағандыдағы мейрамханада болған төбелестен қаза тапқан 23 жастағы жігіттің мәйіті табылды деген орын. Қаңтар 2019 жыл.

Қарағандыда кісі өліміне әкеліп соқтырған жаппай төбелеске қатысты деген күдіктілер арасында Қазақстан мен Армения азаматтары бар. Жергілікті ақпарат агенттіктерінің хабарлауынша, бұл туралы 8 қаңтар күні Астанада өткен брифингте ішкі істер министрінің бірінші орынбасары Жанат Сүлейменов мәлімдеді.

Оның сөзінше, төбелеске барлығы 14 адам - "Древний Рим" мейрамханасының тоғыз қызметкері мен клиенттері қатысқан. Пышақ жарақатынан қаза тапқан 23 жастағы ер адам мейрамханаға кикілжің шыққан кезде серігінің шақыруымен барған.

Жанат Сүлейменовтің айтуынша, кикілжің 1 қаңтарға қараған түні сағат 4 шамасында мейрамхана қызметкерлері киленттерге "мейрамхана жабылатынын ескертіп, тарауды сұрағаннан кейін" шыққан. Кикілжің соңы төбелеске ұласқан. Төбелес болғанын полицияға сағат 4:40 шамасында мейрамхана қызметкерлерінің бірі хабарлаған.

Төбелес кезінде бір адам өліп, төрт адам пышақтан жараланған. Олардың екеуі ауруханаға түскен. Қазір сот санкциясымен сегіз адам қамауға алынған.

Бұған дейін Қарағанды облыстық полициясы кісі өліміне күдікті деп ұсталған үш адамның және іздеу жарияланған Нарек Гуруряннің суретін жариялаған.

Жанат Сүлейменов сонымен қатар тергеушілер іздеу жарияланған күдіктінің 1 қаңтар күні сағат 22-ден кейін Павлодар облысындағы шекара бекеті арқылы Ресей шекарасынан өтіп кеткенін анықтағанын хабарлады. Сүлейменов Ішкі істер министрлігі оқиға туралы неге бірден түсінік бермеді деген сауалға "тергеу амалдарына біраз уақыт қажет болды" деп жауап берді. Ол жанжалдың ұлтаралық сипаты барын жоққа шығарды.

"Жанжал тұрмыстық сипатта өрбіген. Бір тарапта бір ғана ұлттың, екінші тарапта өзге бір ұлттың ғана өкілдері төбелесті деген жағдай болған жоқ. Біз тергеу кезінде бұл туралы айтқан жоқпыз, себебі барлығын анықтап алғымыз келді. Тергеу әлі жүргізіліп жатқандықтан, егжей-тегжейлі ақпарат бере алмаймыз" деді Сүлейменов.

6 қаңтарда Қарағандыда жүздеген адам "қылмыскерді" табуды талап еткен. Қарағанды облысының әкімі Ерлан Қошанов іздеу жұмыстары жүріп жатқанын айтқан.

Қарағандыдағы оқиғаға қатысты Армения премьер-министрінің міндетін атқарушы Никол Пашинян мен осы елдің сыртқы істер министрлігі мәлімдеме жасаған.

Бірер күн бұрын интернетте өзін "Нарек Гурурян" деп таныстырған ер адамның видеоүндеуі жарияланған. Видеодағы ер адам "төбелеске қатысқанын, бірақ ешкімді өлтірмегенін" мәлімдейді. Ол "егер қауіпсіздік пен ашық тергеуге кепілдік берілсе, Қазақстан билігіне берілуге дайын" екенін айтады

"Істеген ісіме жауап беруге дайынмын. Бірақ біреудің ісін мойныма алмаймын. Ешкімді өлтірген жоқпын" дейді видеодағы адам.

Бұдан соң Қазақстан Ішкі істер министрлігі (ІІМ) қылмыстық істің шынайы әрі жан-жақты тергелетініне кепілдік беретінін мәлімдеп, күдікті Гурурянға "жағдайы қиындап кетпеуі үшін" полицияға өз еркімен берілуге шақырған.

Мейрамханадағы өлім және жүздеген адамның талабы

Пекинде мектепте шабуылдан бірнеше оқушы жараланды

Көрнекі сурет.

Пекинде мектептердің біріне әлдебіреу шабуыл жасап, кем дегенде 20 оқушы жараланды. Жараланған оқушылар ауруханаға жеткізілді, олардың үшеуінің халі ауыр. Reuters агенттігінің хабарлауынша, шабуыл жасаған адамды полиция ұстады. Оның кім екені және шабуылды не үшін жасағаны анықталып жатыр.

Жергілікті билік шабуылға қатысты өзге ақпарат бермей отыр. Полиция оқиғаға түсінік беруден бас тартты. Әлеуметтік желілерде жарияланған ақпарат бойынша, балаларды пышақтаған. Xinhua агенттігінің хабарлауынша, дәрігерлер олардың өміріне қауіп жоғын айтады.

Қытайда бұрын балалар шабуылға сирек ұшырайтын. Алайда соңғы кезде мұндай оқиғалар жиілеген. Былтыр маусымның соңында Шанхайда ер адам мектептердің бірінің маңында балаларға пышақ жұмсаған. Салдарынан екі бала қаза тауып, біреуі жараланған. Кейін шабуылдаған адамның Шанхайға келіп, жұмыс таба алмағаны, қоғамнан шабуыл жасап кек алмақ болғаны анықталған.

Былтыр сәуірдің соңында Шэньси провинциясында ер адам мектеп жанында балаларға пышақпен шабуылдап, 7 бала қаза тапқан. Былтыр қаңтарда Қытайдың оңтүстігінде белгісіз адам 12 баланы пышақтап өлтірген. Қылмыскерге таяуда өлім жазасы орындалған.

Анкарада Ресей елшісі өліміне қатысты сот басталды

Мевлют Мерт Алтынташтың Түркиядағы Ресей елшісі Андрей Карловты атқан сәті түсірілген видеодан скриншот. 19 желтоқсан 2016 жыл.

Анкарада Ресейдің Түркиядағы елшісі Андрей Карловтың 2016 жылы желтоқсанда қастандықтан қаза табуына қатысты күдіктілердің соты басталды. Бұл туралы BBC хабарлады.

Тергеу бұл істегі 28 айыпталушыны елде тыйым салынған FETO ұйымына қатысы бар деп атайды. Террорлық ұйым деп танылған FETO жетекшісі Фетхулла Гүлен АҚШ-та тұрады.

Ресейдің Түркиядағы елшісі Андрей Карлов 2016 жылы 19 желтоқсанда Анкарада өнер көрмесіне сөйлеп тұрғанда ол жерге күзетші кейпінде кірген 22 жастағы Мевлют Мерт Алтынташ есімді адам оны ту сыртынан бірнеше рет атып жаралаған. Елші ұзамай жарақатынан көз жұмды. Бұрын полицияда қызмет істеген Алтынташтың өзі полициямен атыста оққа ұшқан. Алтыншаш дипломатты атқан кезде "Аллаху акбар! Алеппоны ұмытпаңдар!" деп айқайлаған.


Нығматулин Қытай елшісімен екіжақты қарым-қатынасты талқылады

Қазақстан парламенті мәжілісінің төрағасы Нұрлан Нығматулин (оң жақта) мен Қытайдың Қазақстандағы елшісі Сяо Чжаню. Астана, 8 қаңтар 2019 жыл.

Парламент мәжілісінің төрағасы Нұрлан Нығматулин Қытайдың Қазақстандағы төтенше және өкілетті елшісі Сяо Чжанмен кездесіп, екі ел қарым-қатынасының даму барысы туралы әңгімелесті.

Парламент мәжілісі баспасөз қызметінің хабарлауынша, Нығматулин Қазақстан мен Қытайдың екіжақты өзара қарым-қатынасы қазір стратегиялық әріптестік деңгейіне шыққанын айтқан. Нығматулин сонымен қатар Қазақстандағы "Нұрлы жол" бағдарламасының Қытайдың "Бір белдеу, бір жол" жобасымен түйіндестіру нәтижесінде Қорғас бекетінің, Ақтау портының, Қазақстан-Түркіменстан-Иран жаңа теміржол желісінің және Батыс Еуропа - Батыс Қытай халықаралық жолының ашылғанын айтқан.

Елші Сяо Чжан 2019 жылдың екіжақты стратегиялық әріптестікті одан ары нығайтуда маңызды болатынын айтқан. Дипломаттың сөзінше, қазір "Нұрлы жол" бағдарламасы мен "Бір белдеу, бір жол" жобасы аясында 55 ірі инвестициялық индустриалдық жоба іске асырылып жатыр, ал биыл бірнеше жаңа жоба іске қосылмақ.

Мәжіліс баспасөз қызметі таратқан ақпаратта Нығматулин мен Сяо Чжанның кездесуде туыстары Қытайдан Қазақстанға шыға алмай отыр деген этникалық қазақтардың жағдайын талқылағаны, я талқыламағаны айтылмайды.

АҚШ әскери кемесі Қара теңізге кірді

АҚШ әскери кемесі (Көрнекі сурет).

АҚШ-тың USS Fort McHenry әскери кемесі Қара теңіздегі Румыния портына барды. АҚШ кемесі қарашаның соңында Керчь бұғазында Ресей күштері Украина әскери кемелерін теңізшілерімен бірге ұстағаннан бері бірінші рет Қара теңізге еніп отыр.

Румыния мен АҚШ шенеуніктері десант кемесі Константа портына 7 қаңтар күні барғанын және ол жерде 10 қаңтарға дейін болатынын айтады. Бұдан соң ол Румыния фрегатымен бірге Қара теңіздің Румынияға тиесілі бөлігінде әскери оқу-жаттығу өткізбек. Жаттығуға қанша америкалық әскер қатысатыны белгісіз.

АҚШ әскери-теңіз күштерінің өкілі ТАСС агенттігіне USS Fort McHenry кемесі Қара теңізге әскери кемелердің теңіздерде жүріп-тұру тәртібін айқындайтын халықаралық Монтре келісіміне сай барғанын айтады.

25 қарашада Ресей шекарашылары Керчь бұғазы арқылы Мариупольге бармақ болған Украинаның үш кемесін ұстаған. Ресей билігі кемелер Ресейдің Қырым жағалауындағы аумағына заңсыз кірмек болды деп санайды. Киев болса Ресей мен Украина арасында 2003 жылы жасалған келісім бойынша украин кемелерінің Қара теңіздің Ресейге тиесілі аумағында жүруіне болатынын айтады.

Үш кемеде болған 24 украин теңізшісі сот санкциясымен Мәскеудегі тергеу абақтысына қамауға алынды. Олар Ресейдің мемлекеттік шекарасын бұзды деп айыпталып отыр. Теңізшілер өздерін әскери тұтқынбыз деп санайды.


ІІМ: Қарағандыдағы қылмыстың шынайы тергелуіне кепілдік береміз

Өзін "Нарек Гурурян" деп таныстырған ер адам.

Қазақстан Ішкі істер министрлігі (ІІМ) "Қарағандыдағы жаппай төбелеске қатысты" деген күдікті Нарек Гуруряннің видеоүндеуіне түсінік берді. Министрліктің ресми өкілі Алмас Садубаевтың хабарлауынша, қазірге дейін Қарағандыда "бұзақылық жасап, 23 жастағы жігітті өлтірді" деген күдікпен сегіз адам қамауға алынған, Нарек Гурурян есімді азаматқа іздеу жарияланған.

Бұған дейін интернетте өзін "Нарек Гурурян" деп таныстырған ер адамның видеоүндеуі жарияланған. Видеодағы ер адам "төбелеске қатысқанын, бірақ ешкімді өлтірмегенін" мәлімдейді. Ол "егер қауіпсіздік пен ашық тергеуге кепілдік берілсе, Қазақстан билігіне берілуге дайын" екенін айтады

"Істеген ісіме жауап беруге дайынмын. Бірақ біреудің ісін мойныма алмаймын. Ешкімді өлтірген жоқпын" дейді видеодағы адам.

Алмас Садубаевтың айтуынша, Қазақстан ІІМ қылмыстық істі шынайы, жан-жақты тергеуге кепілдік береді және күдікті Гурурянға "жағдайы қиындап кетпеуі үшін" полицияға өз еркімен берілуін ұсынады. "Интернетте күдіктінің өз еркімен берілуге дайын екенін мәлімдеуіне байланысты екі күн бұрын оның туыстарына қызметкерлеріміздің байланыс нөмірлері берілді. Алайда, бүгінге дейін ешкім байланысқа шықпады" деді Садубаев.

Ол тергеу амалдары ішкі істер министрлігінің бақылауына алынғанын айтады.

Бұған дейін Қарағанды облыстық ішкі істер департаменті 22 жастағы Гурурянның және ұсталған үш адамның фотосын жариялаған.

Қарағанды облыстық әкімдігінің хабарлауынша, Жаңа жыл түні Қарағандыдағы мейрамханалардың бірінде төбелес болып, бір адам қаза тауып, төрт адам жарақаттанған. Барлығы жеті адам ұсталған. Тағы бір адам Нарек Гурурянға халықаралық іздеу жарияланған.

6 қаңтарда Қарағандыда жүздеген адам "қылмыскерді" табуды талап еткен. Қарағанды облысының әкімі Ерлан Қошанов іздеу жұмыстары жүріп жатқанын айтқан.

Қарағандыдағы оқиғаға қатысты Армения премьер-министрінің міндетін атқарушы Никол Пашинян мен осы елдің сыртқы істер министрлігі мәлімдеме жасаған.

Тағы

XS
SM
MD
LG