Сейсенбі күні Пәкістан премьер-министрі Шаухат Азиз бен АҚШ президенті Джордж Буш екі елдің ынтымақтастығындағы көптеген мәселелерді талқылап, сонымен қоса терроризммен күрес жайында сөйлесті. Ақ үйде өткен 45 минуттық кездесуден кейін, екі ел жетекшісі бірнеше бейбіт тұрғынның өліміне әкелген, АҚШ әскерінің Пәкістанның солтүстігіндегі елді мекенге әуеден соққы берген оқиғасы жайлы сөз қозғамады. Осама бен Ладеннің орынбасары Айман әл Зауахри нысанаға алынып, шабуылданды дегенді Пәкістан үкімет басшысы Шаухат Азиз сынға алған болатын. Бірақ, дүйсенбі күні Уашингтонға келген Азиз тек екі елдің арасындағы ынтымақтастық туралы ғана әңгіме қозғады.
