Accessibility links

Белсенді наразылық шеруіне байланысты тергеуге шақырту алды


Азаматтық белсенді Талғат Аян баспасөз мәслихатында сауал қойып тұр. Атырау, 20 сәуір 2016 жыл.

Азаматтық белсенді Талғат Аян баспасөз мәслихатында сауал қойып тұр. Атырау, 20 сәуір 2016 жыл.

Атырау қаласында тұрғындарды әлеуметтік желі арқылы «жерді жеке меншікке сатуға» қарсы шеруге шақырған жергілікті азаматтық белсенді Талған Аянға бүгін учаскелік полиция қызметкері тергеуге шақырылғаны туралы қағаз тапсырған.

Атырау облыстық ішкі істер департаменті тергеушісі қол қойған шақырту қағазда Талғат Аянның ертең, 24 сәуірде куәгер ретінде тергеуге жауап беруге шақырылатыны жазылған.

– Менің ойымша, мені алаңға жібермеу үшін жасап отырғандары бұл, - деді Талғат Аян Азаттыққа.

Осының қарсаңында белсенді Facebook әлеуметтік желісіндегі парағында «24 сәуірде сағат 14:00-де қазақтық қос батыры Исатай мен Махамбет ескерткіштері жанына наразылық акциясына шығатыны» туралы хабарлаған. Сол күні облыстық әкімдік сайтында белсендінің Атыраудың орталық алаңында наразылық акциясын өткізу туралы берген өтініші қанағаттандырылмайтыны туралы хабарлама жарияланған. Сонымен бірге хабарламада рұқсат етілмеген шеруге қатысқаны үшін әкімшілік жауапкершілік жүктелетіні жайлы ескерту жазылған.

Қазақстан Жер кодексіне жақында енгізілген өзгерістерге сәйкес, биылғы шілде айынан ауылшаруашылығы мақсатындағы жерді ел азаматтарына аукцион арқылы жеке меншікке сату, сонымен бірге шетелдіктерге, азаматтығы жоқ адамдарға ондай жерді 25 жылға дейін жалға беру басталады. Бұл жаңа өзгеріс әлеуметтік желілерде қызу пікірталасқа ұласқан.

  • 16x9 Image

    Санат ОРЫН ӘЛИ

    Санат 2014 жылы қарашада Азаттықтың Батыс Қазақстандағы тілшісі ретінде қызметке кірісті. 2005 жылы Батыс Қазақстан мемлекеттік университетінің филология факультетін бітірген. Қызмет жолын "Уральская газета" басылымында бастаған. 2006-2014 жылдары Алматы мен Астанадағы түрлі БАҚ-тарда жарияланып тұрған.

XS
SM
MD
LG