Accessibility links

ХОК: Пекин мен Лондонға барған тағы 45 спортшы допинг қолданған


Көрнекі сурет.

Көрнекі сурет.

Пекин (2008) және Лондон (2012) олимпиадаларына қатысқан спортшылардың допинг сынамаларын қайта тексерген кезде 45 спортшының қанынан тыйым салынған препарат белгілері табылды деп хабарлады халықаралық олимпиада комитеті (ХОК).

ХОК спортшылардың аты-жөндері мен елдерін айтпаған. Бірақ олардың 30-ы - Пекинге 8 елдің атынан барған, 15-і - Лондонға 9 елдің атынан барған спортшылар екені хабарланды. Ұйым қайталап тексеру шарасы әуелі медаль алған, соның ішінде Пекинде жүлдеге ие болған 23 жеңімпазға қатысты болғанын мәлімдеді.

ХОК бірінші және екінші тексеру кезінде 1243 сынама тексерілгенін, алда әлі екі тексеру барын айтады.

Осыған дейін халықаралық ауыр атлетика федерациясы (IWF) қазақстандық ауыр атлет Илья Ильиннің Пекин мен Лондон олимпиадалары кезінде алынған сынамаларынан допинг табылғанын мәлімдеген. Лондонда алтын алған қазақ спортшылары Зүлфия Чиншанло, Мая Манеза мен Светлана Подобедованың да сынамалары оң нәтиже берген. Төртеуі де биыл өтетін Рио-де-Жанейро олимпиадасына қатыспайды.

Басында Қазақстан ауыр атлетика құрамасы Рио олимпиадасына он жолдама алған. Бірақ допинг дауынан кейін IWF екі жолдаманы алып, басқа елдерге берген.

Бұған қоса, IWF допинг дауына ілінген Қазақстан құрамасын бір жыл жарыстардан шеттеу туралы шешім шығарған. Бірақ бұл шектеу қай уақыттан басталатыны белгісіз. Белгілісі - бір жылдық шектеу олимпиада ойындарына әсер етпейді.

XS
SM
MD
LG